AYUBU 19
19
Ayubu okoiraneria Bilidadi
1Erio Ayubu akairaneria, akabora:
2“Inee! Ngoika ririri morabe mokogechia omoyo one
na mogonsenyenta namang’ana aino?
3Mwabeire mogonchecheria ara ikomi.
Inee! Timori korora obosooku gonkorera bobe iga?
4Ee, nonya ekeene nakorire okomocha,
okomocha okwo nokwane.
5Inwe onye mogwetogia ng’a nabaya more kombua
na kong’enekeria igo kobwatekana nogochaywa kwane,
6rirorio momanye ng’a Nyasae orentire amabe aya asende,
na ontegire noboreba bwaye.
7Rora, nigo nkorera mono ngoteba: Nakoreirwe bobe,
korende tindi koiranerigwa;
nigo nkorangeria neriogi rinene ng’a nkonywe,
korende ekeene, oboronge tibori gokorwa.
8Nyasae oagachire orwaki aase ngoeta,
obekire omosunte ase ebinchera ngoeta.
9Ong’urire obonene bwane.
Orusirie egutwa korwa ase omotwe one.
10Korwa ase chinsemo chionsi ong’iyeirie,
bono inche nasirigwe;
osimoire ogosemeria kwane buna omote ogosimorwa.
11Obeire nekeririanda ekenene asende,
na ombarire ng’a nomobisa oye inde.
12Ebiombe bi’abarwani baye b’esegi nigo bigocha bire amo,
biabekire eburi ase ngoetera;
biatoorire biang’etananire ase chinsemo chionsi chi’obomenyo bwane.
13“Nyasae ogerire abaminto bantigire, bambeereire aare,
na abanto twamanyaine bantigire, babeire buna tibamanyeti.
14Abanto baminto bantigire, na abasani twanchaine mono banyebire.
15Abanto bamenyete mwane banyebire;
na abasomba baane abaiseke bambarire buna omoeti;
nabeire omomenyi ase amaiso abo.
16Ekero nkorangeria omosomba one, ere tari kong’itabera,
otatiga ekero namosoroire, nario rioka agocha.
17Omoika okorwa ase omonwa one nigo ogotiokera omokungu one bobe;
nigo inde okogechia ase abamura baminto torwete enda eyemo.
18Nonya nabana abake banchayire;
ekero ngotenena nigo bagonkwana bobe.
19Abasani abagisangio banyinyerire na kogechigwa nainche;
nabwo nanchete bang’onchokeire na gonkora bobe.
20Amauga ’omobere one atongororire ase risankwa ne chinyama,
natigeirwe egesabo getubete amaino gioka.
21Inwe abasani baane, ndorera amabeebe, ndorera amabeebe,
ekiagera okoboko kwa Nyasae kwang’akire!
22Nase ki nainwe mogonchanda buna Nyasae anchandire?
Inee! Timoisanegeti ase ogonchanda omobere one?
23“Naki yare koba buya onye amang’ana aane narikwa bono!
Yare koba buya arikwe ase ebuku,
24ee, arikwe nekaramu eroisirie korwa ase risasi, ekioma egekong’u,
amang’erwe ase egetare abeo kare na kare.
25“Korende nimanyete ng’a Omobooria one moyo are,
omoerio nigo aratenene igoro ye riroba.
26Nyuma risankwa ri’omobere one korirabe riasarekire,
erio nindore Nyasae ntari ase omobere one.
27Nimwerorere inche omonyene;
amaiso aane namorigererie, ayane, tari ay’omonto omoao.
“Nimoganetie mono ase enkoro yane ime.
28Moise goteba: Nase nchera ki tokomochanda?
Nigo mokorengereria ng’a ninche nagerire amabe onsi anyorire?
29Inwe iroka ogoitwa nomoro,
ekiagera oyore nekeririanda nigo akoegwa egesusuro ki’ogoitwa nemioro;
erio monyare komanya ng’a okogambigwa nkoreo.”
Currently Selected:
AYUBU 19: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
