AYUBU 18
18
Bilidadi ogokwana
1Bilidadi Omosua akairaneria, akabora:
2“Inee! Ngoika ririri ogochia korigia amang’ana agokwanwa?
Yarengererie, nyuma yaye naintwe tokwane.
3Nase ki tokobarwa koba buna ching’iti?
Nase ki tokobarwa koba abanto batamanyeti gento kende?
4Inee! Aye nigo ogwetandora ase engencho y’endamwamu yao,
ense nigo egochia gotigwa bosa ase engencho yao?
Gose egetare ngetigerigwe korwa aase aye?
5“Amaene, omobaso bw’omokori amabe norime,
gose amasase aye takobara.
6Oborabu bore ase obomenyo bwaye
nigo borabe omosunte,
na etaya yaye ere asare nerimigwe.
7Amatambokero aye are ne chinguru nakeeigwe,
na emeroberio yaye emoiyerie inse.
8Amagoro aye nabwatwe noboreba,
abe ogotaara ase egati ye chiirima.
9Oboreba mbomobwate ase egetingiro
na omoeto nomobwate omong’userere bokong’u.
10Engori y’ogotegerwa nebiswe ase riroba ase agotacha,
na oboreba botegwe ase enchera agoeta.
11Nabe okogoswa na kwoboyigwa korwa ase chinsemo chionsi,
nkomoseria atame namagoro.
12Enchara nemorie goika chinguru chiaye chiere,
na emechando nemobeere ang’e komoiyeria.
13Oborwaire mbokoore risankwa ri’omobere oye,
oborwaire obotang’ani bw’amakweri mbogundie ebiimo biaye.
14Nataboranwa ne chinguru korwa ase obomenyo konya asemeretie,
erio airwe ase omoruoti bw’okwoboyia okonge.
15Abanto abaao mbabe bakomenya ase eema yaye;
amagena ’omorero nasiarerwe ase enka yaye.
16Emeri yaye iyome inse ye riroba,
ne chinsagia chiaye nachisusane.
17Oyio takoinyorwa ase ense nonya ng’ake,
gose nonya nerieta riaye tirikogenderera koinyorwa agwo ase enchera.
18Ere narusigwe korwa ase oborabu arutwe gochia ase omosunte;
naende aserigwe korwa ase ense.
19Takoba nomwana gose abanto b’ororeria rwaye ase egati y’abanto bamwabo,
gose monto onde oye tagotigara ore moyo agwo ase amenyete.
20Abanto bamenyete bosongo mbakumie igoro ye rituko ri’ogosirigwa kwaye,
na abamenyete moocha mbaondokigwe namang’ana ayio.
21Ekeene, obomenyo bw’abatamoirogeti Nyasae nabo bore igo,
na aase ay’abataganeti komomanya Nyasae nabo are igo.”
Currently Selected:
AYUBU 18: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
