ABAGAMBI 21
21
Abanto ba Benjamin bakonyorerwa abakungu
1Bono Abaisraeli konya barire eira na gotiana agwo Misipa ng’a, “Onde tari ase egati yaito oranyare korua omwana oye omoiseke konyuomwa nomonto bw’egesaku kia Benjamin.” 2Abanto bakagenda Beteli, bagaikaransa aroro ase obosio bwa Nyasae goika mogoroba, bagaaka amariogi, bakarera nobororo, 3bagakwana, “Ayee! Omonene, Nyasae bw’Abaisraeli, nase ki amang’ana aya abeire asetore intwe Abaisraeli ng’a rero egesaku ekemo giasirire korwa asetore?”
4Rituko ria kabere abanto bakaimoka mambia chuni bakeagachera egesasimero aroro. Erio bakarua ebing’wanso bi’ogosambwa na ebi’omorembe. 5Abaisraeli bakaboria, “Mbarabi ase ebisaku bionsi bi’Abaisraeli batachicha ase omosangererekano, ase obosio bw’Omonene?” Barabwo konya barire eira na gotiana ng’a omonto onde bwensi otacheti ase Omonene agwo Misipa goika aitwe. 6Abaisraeli nigo barorerete Ababenjamin bamwabo amabeebe, bakabora, “Rituko ria rero egesaku ekemo giasirigwe korwa ase Abaisraeli. 7Ngento ki torakore tonyorere abwo batigarete abakungu, ekiagera ntwariete eira na gotiana ase obosio bw’Omonene ng’a titokorua nonya noyomo bw’abaiseke baito anyuomwe noyomo obo?”
8Naende bakaboria, “Gesaku kende nkereo ki’ebisaku bi’Abaisraeli getachicha ase Omonene agwo Misipa?” Bakanyora ng’a onde tari nonya noyomo korwa Yabesi o Gileadi ochete ase omosangererekano oria agwo ase egetwori. 9Ekero abanto baare koroberigwa na goitaagwa, bakanyora ng’a onde tacheteo nonya noyomo korwa ase abanto ba Yabesi o Gileadi, 10omosangererekano ogatoma abanto abaremu mono chilifu ikomi na ibere, bakabachika, “Genda moite abanto ba Yabesi o Gileadi nemioro, moite nabakungu na abana abasinini. 11Aya naro morakore: Moite kera omonto omosacha, na kera omokungu omenyanire nomosacha, mobasirie kegima.” 12Bakanyora abaiseke abekungi, abwo konya bataramenyana nomosacha onde bwensi, amagana ane, ase egati y’abanto ba Yabesi o Gileadi, bakabarenta ase batoorete agwo Silo, omochie oria orenge ase ense ya Kanani.
13Erio omosangererekano bwonsi bw’abanto bagatoma amang’ana gochia ase abanto ba Benjamin baria barenge ase egetare kia Rimoni, bakabarareria omorembe. 14Ababenjamin bakairana ase engaki eria, na Abaisraeli bakaa abaiseke baria korwa Yabesi o Gileadi, bataitetwe babe abakungu babo; korende abwo tibabaisanete abasacha b’Ababenjamin.
15Abaisraeli bakarorera Ababenjamin amabeebe, ekiagera Omonene aatanenete ebisaku bi’Abaisraeli. 16Abagaaka b’omosangererekano oria bakaborania, “Naki torakore tonyorere abasacha baria batigarete abakungu, ekiagera abakungu bonsi baitirwe korwa ase Ababenjamin?” 17Naende bagateba, “Ababenjamin abatooregete goika banyorerwe abanyamwando, erinde egesaku ekemo korwa ase Abaisraeli tigesirigwa kegima. 18Korende nonya naboigo, intwe titokonyara korua abaiseke baito banyuomwe nabarabwo.” Abaisraeli konya barire eira na gotiana ng’a, “Omonto oria orarue omoiseke oye anyuomwe n’Ababenjamin aragererigwe.”
19Erio bagateba, “Rora, ndire Rituko ri’Omonene ria kera omwaka agwo Silo, sugusu ya Beteli, irianyi ya Lebona, moocha y’enchera ere gati ya Beteli na Sekemu.” 20Bagachika Ababenjamin, bakabatebia, “Genda mwebise moboe ase emegondo y’emesabibu, 21motengere mono ekero abaiseke ba Silo bagosoka gochia gotenga, erio moimoke korwa ase emegondo y’emesabibu, na kera omonto akurure omoiseke oyomo bw’abaiseke baria ba Silo, amoire ase orogongo rwa Benjamin abe mokaye. 22Na ekero abaise, gose abamura bamwabo, barache kobasoera asetore, intwe nigo torabatebie: Komoranche mobabatigere, ekiagera titwanyorerete kera omonto omokungu ekero gi’esegi, na ekiagera inwe abanyene timwababaete babe abakungu babo, timori nokomocha kw’ogosaria eira eria twatiananetie.”
23Ababenjamin bagakora buna batebetigwe. Kera oyomo akaira omoiseke korwa ase baria baare gotenga agwo Silo, akaba mokaye. Erio bakairana, bakagenda ase emiando yabo, bakaagacha emechie yabo naende na komenya aroro. 24Ase engaki eria Abaisraeli bakarua aase agwo, na kera omonto akagenda ase egesaku kiaye na ase eamate yaye, na ase omwando oye.
25Ase amatuko aria omoruoti tarenge ase Abaisraeli, kera omonto nigo arenge gokora kende gionsi aroche kere ekeronge asare.
Currently Selected:
ABAGAMBI 21: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
