RUTU 1
1
Elimeleki na abanto baye bagochia komenya ase ense ya Moabu
1Ase amatuko aria, ekero abagambi ebina barenge kogambera Abaisraeli, enchara enene ekaba ase ense yabo. Ase ayio, omonto oyomo o Bethlehemu, ase ense y’Abayuda, akaimoka amo na mokaye na abamura baye babere, akagenda komenya ase ense y’Abamoabu ase engaki gete. 2Omonto oria nigo arenge korokwa Elimeleki, na mokaye Naomi, na abamura baye babere Mahaloni na Kilioni. Barabwo n’Abaefarati barenge. Ekero bamenyete aaria Moabu, 3Elimeleki agakwa, agatiga Naomi ore omoboraka, ore nabamura baye babere. 4Barabwo bakanyuoma abaiseke b’Abamoabu; oyomo nigo are korokwa Oripa na oyonde Rutu. Nyuma kabamenyire aroro koreng’ana emiaka ikomi, 5Mahaloni na Kilioni nabarabwo bagakwa. Igo Naomi agakwerwa omosacha oye na abamura baye babere.
Naomi okoirana gochia Bethlehemu, na Rutu okogenda amo nere
6Naomi kare agwo ase ense y’Abamoabu akaigwa ng’a Omonene ororeire abanto baye amabera, obaeire endagera naende; ase ayio akamanora korua ense eria amo na baka bamura baye. 7Barabwo bagatiga aase aaria bamenyete, korende ekero barenge kogenda gochia ase ense y’Abayuda, 8Naomi agatebia baka bamura baye ng’a bairane, na kera oyomo agende komenya mwa ng’ina. Naende akabora, “Omonene abakorere amaya, buna inwe mwakorerete baria bakwete, mogankorera nainche. 9Omonene abanchere kera oyomo oino anyuomwe naende, na anyore mwaye.”
Erio Naomi akabanyunyunta ase okobatiga. Korende barabwo bagachaka korera mono, 10bakamotebia, “Yaya, titokogotiga! Nigo torigetie kogenda amo naye ase abanto baino.”
11Korende Naomi akabairaneria, akabatebia, “Abana baane, irana mogende seino! Nase ki moganetie kogenda amo nainche? Inee! Ninyare naende korwa ase enda yane koibora abana bagochia koba abasacha baino? 12Abana baane, irana mogende seino, ekiagera inche nagotire mono, tinkonyuomwa naende. Nonya nare korengereria ng’a ninde nogosemeria, na onye nare konyora omosacha rero, nyibore abana abamura. 13Inee, nkoganya mware goika bakine? Gose ngwetanga mware timonyuomwa nabasacha bande? Taibo, abana baane. Omonene ong’onchokeire na kong’a emechando, nainche nabechandeire mono.”
14Naende bagachaka korera mono goetania. Erio Oripa akanyunyunta ng’ina biara, akamotiga, korende Rutu akaanga komotiga. 15Ase igo Naomi agatebia Rutu, “Naama! Oripa, moka momura omwabo omosacha oo, oiranire ase abanto baye, na ase enyasae yaye. Naye irana, mogende komo!”
16Korende Rutu akamoiraneria, “Tagonsorora ng’a ngotige. Tiga ngende amo naye. Aande onsi ase aye ogochia, nainche nao ndachie; na aande onsi ase aye oramenye, nainche nao ndamenye. Abanto bao mbabe abanto baane, na Nyasae oo nabe Nyasae one. 17Aase aye orakwere, nainche nao ndakwere, na ntindekwe aroro. Tiga Omonene ang’e egesusuro bono na kogenderera onye gento kende kegochia konyatanana korwa asore, otatiga amakweri oka.” 18Ekero Naomi aroche ng’a Rutu otenenire bokong’u ase ebirengererio biaye bi’okogenda amo nere, takwana gento kende.
19Ase igo barabwo babere bakagenderera orogendo rwabo, bagaika Bethlehemu. Ekero baigete aroro, abanto bonsi b’omochie bakaeegaeega ase engencho yabo, na abakungu bakaborania, bagoteba, “Inee! Oyo Naomi?”
20Naomi akabatebia, “Timondoka Naomi, ndoke Mara,#1:20 Mara, engencho yaye: obororo ekiagera Nyasae Omobui ondeteire obororo obonge. 21Ekero nagendete nigo narenge omonda, korende Omonene ong’iranirie inde namaboko amasa. Nase ki rende mokondoka Naomi bono, ekero Omonene Omobui ang’onchokeire na ondeteire amaakwa?”
22Naboigo Naomi airanete korwa ase ense y’Abamoabu amo na Rutu, oria Omomoabu, moka momura oye. Barabwo bagaika Bethlehemu ekero abanto konya bachakire kogesa esairi, endagera enga buna engano.
Currently Selected:
RUTU 1: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020