ABAGAMBI 20
20
Abaisraeli bakwebeka ang’e kogenda korwana esegi
1Abaisraeli bonsi korwa Dani goika Beeri‐Seba, amo nab’ense ya Gileadi bakarua chinka chiabo, bagasangererekana amo, bakabwatana, bakaba buna omonto oyomo ase obosio bw’Omonene agwo Misipa. 2Abatang’ani b’abanto bonsi b’ebisaku bionsi bi’Abaisraeli bagacha ase omosangererekano oria bw’abanto ba Nyasae. Abwo barenge gotaara namagoro babogoretie emioro, nigo barenge chilifu amagana ane. 3Bono abanto b’egesaku kia Benjamin bakaigwa ng’a Abaisraeli batiirire gochia Misipa. Abaisraeli bakabora, “Totebie, naki obonyaka obo bwakorete bokaba!” 4Omolawi oria, omosacha bw’omokungu oria oitetwe moeneno, akairaneria, agateba, “Nigo nachete Gibea, omochie, bw’Ababenjamin, inche na omokungu one o sere‐sere, erinde torare aroro agwo ase obotuko. 5Abanto ba Gibea bagacha kondwania, bagaetanana enyomba ase narenge botuko, bakagania bang’ite; nabarabwo bagakorera omokungu one o sere‐sere obonyaka goika agakwa. 6Inche nkabogoria omokungu one o sere‐sere, nkanachana omobere oye ebing’ese, ngatoma abanto, nabarabwo bakaira ebing’ese biria ase ense yonsi y’omwando bw’Abaisraeli, ekiagera Abagibea bakorete ebibe bi’obonyaka ase egati y’Abaisraeli. 7Inwe Abaisraeli mwensi, karue amang’ana aino ay’ogosemia igoro ase aya akorekanire!”
8Abanto bakaimoka, bakabwatana buna omonto oyomo, bagakwana, “Onde tarua asetore agende mwaye, ase eema yaye gose nyomba mwaye. 9Korende aya naro amang’ana torakorere Gibea. Igo togoaka obomera, torore gose mbarabi bagochia koyorwania. 10Torusie abanto ikomi korwa ase abanto rigana erimo, na abanto rigana erimo korwa ase abanto elifu eyemo, na abanto elifu eyemo korwa ase abanto chilifu ikomi, korwa ase ebisaku bionsi bi’Abaisraeli. Abanto aba nabasangererie chindagera korwa ase abanto, erinde babarentere baria bagochia korwania Gibea o Benjamin, ekiagera barabwo bakorire ogosaria kw’obosooku ase egati y’Abaisraeli.” 11Ase igo Abaisraeli bonsi bagasangererekana, bakabwatana amo buna omonto oyomo, bakarwania omochie oria.
12Abanto b’ebisaku bi’Abaisraeli bagatoma abanto gochia ase chiamate chionsi chia Benjamin, bakabora, “Nobokayayu bore naki, obo bwakorekanire ase egati yaino? 13Bono barente abanto baria abanyaka ba Gibea, erinde tobaite, torusie obobe obo borue ase Abaisraeli.” Ababenjamin tibaigwerete Abaisraeli bamwabo, 14korende bakarua emechie yabo, bagacha agwo Gibea, erinde barwanie Abaisraeli. 15Ababenjamin abwo baroberetigwe korwa ase emechie yabo ase rituko riria nigo barenge chilifu emerongo ebere na isano nemo, abamanyete korwanera emioro. Amo nabwo mbarengeo abanto amagana atano na abere, abachoretwe korwa ase omochie o Gibea. 16Ase egati y’abanto aba nigo barenge abanto bachoretwe amagana atano na abere, barenge abanyakebee. Kera omonto obo nigo amanyete koruta rigena nenduruche, erio orenga agatukia akamo, ogaaka, tarenge gokamocha. 17Abaisraeli batasang’anaine n’Ababenjamin, bakaroberia abanto chilifu amagana ane babogoretie emioro; abanto aba nigo bamanyete korwana esegi.
Abaisraeli bakorwana esegi n’Ababenjamin
18Abaisraeli bakaimoka, bakagenda Beteli koboria ogosemia korwa ase Nyasae, bakaboria, “Mbarabi asetore barabe abe ritang’ani gochia korwania Ababenjamin?”
Omonene akairaneria, “Abayuda nababe abe ritang’ani”.
19Erio Abaisraeli bakaimoka bonsi mambia chuni, bagatoora ang’e nomochie o Gibea, 20na abanto babo bagasoka, bakagenda korwania Ababenjamin. Bakaroberia abarwani korwana esegi ase omochie o Gibea, 21korende Ababenjamin bagasoka korwa Gibea, bagaita Abaisraeli chilifu fu emerongo ebere na ibere, ase rituko erio. 22Ase igo Abaisraeli, bakeremia naende, bakaroberia abarwani barwanie aase aria ase beroberetie rituko rie ritang’ani. 23Erio Abaisraeli bagatiira gochia Beteli, bakaba bakorera ase obosio bw’Omonene goika mogoroba, bakamoboria, “Natonyare naende kogenda korwana n’Ababenjamin abanto baminto?”
Omonene akairaneria, “Genda, mobarwanie!”
24Ase igo Abaisraeli bakagenda korwana n’Ababenjamin rituko ria kabere. 25Ase rituko erio Ababenjamin bagasoka korwa Gibea, bakarwana n’Abaisraeli, bagaita abanto chilifu ikomi na isano, abamanyete korwanera emioro. 26Erio Abaisraeli bonsi bagatiira gochia Beteli, bakaba bakorera. Bagaikaransa aroro agwo ase obosio bw’Omonene, bakeng’ata rituko riria goika mogoroba, na bakaruera Omonene ebing’wanso bi’ogosambwa na ebi’omorembe. 27Abaisraeli bakarigia ogosemia korwa ase Omonene. (Esanduku eria ere ne chibao chirikire okobwatanana kwa Nyasae nao yarenge ase amatuko aria, 28na Finehasi, mosinto bw’Eleazari o Haroni nigo arenge gokora emeremo y’obokuani ase Esanduku eria.) Abaisraeli bakaboria Omonene, “Natonyare naende kogenda korwana esegi n’Ababenjamin baminto, gose bono ngotiga tore?”
Omonene akairaneria, “Imoka mogende, ekiagera ankio nimbeke abanto abwo ase amaboko aino.”
29Abaisraeli bakabeka abarwani bakaboa goetanana omochie o Gibea. 30Na ase rituko ria gatato bakagenda korwania Ababenjamin, bakeroberia ase okorwana agwo Gibea, buna chingaki chiria chie ritang’ani. 31Ababenjamin bagasoka, bakagenda korwana nabanto abwo, bakang’uswa gochia aare korwa ase omochie oria, na buna chingaki chiria chinde bagachaka goita Abaisraeli ase enchera enene egotiira gochia Beteli, na ase eyende ekogenda Gibea, naboigo naase aarabu. Bagaita Abaisraeli ang’e emerongo etato. 32Ababenjamin bagateba, “Twababuire buna chingaki chiria chinde.”
Korende Abaisraeli konya barobeirie ng’a babang’use korwa ase omochie oria, erinde bagende gochia ase chinchera chinene. 33Abaisraeli bonsi bakaimoka korwa ase barenge, erio bakeroberia agwo Baali‐Tamari, na baria baboete bakaoroka mobosokano korwa ase bebisete, ang’e na Gibea. 34Erio abanto chilifu ikomi, abachoretwe korwa ase Abaisraeli bonsi, bakagenda korwania omochie o Gibea, na esegi eria ekaba entindi. Ababenjamin tibamanyete ng’a ogosirigwa kwabo konya gwaikire ang’e. 35Omonene akabua Ababenjamin ase obosio bw’Abaisraeli; nabarabwo bagaita Ababenjamin chilifu emerongo ebere na isano, ne rigana erimo, ase rituko riria. Abanto abwo bonsi baitetwe nigo bamanyete korwanera emioro. 36Ase igo abanto ba Benjamin bakarora ng’a babuirwe.
Obobui bw’Abaisraeli
Abaisraeli bakairana gochia nyuma korwa ase Ababenjamin, ekiagera begenete Abaisraeli baria baboerete omochie o Gibea. 37Barabwo bagasoka, bakarindokera omochie oria, bagaita abanto bonsi b’omochie nemioro. 38Bono ekemanyererio giancheranetwe ase egati y’ekeombe ekenene ki’abarwani b’Abaisraeli na abanto bebisete baboete nakio eke: Ekero barenge korora rikundesi ri’erioki rigochongororoka korwa ase omochie oria, 39erio abarwani b’Abaisraeli bairane nyuma. Ababenjamin konya bachakire goita Abaisraeli, bagaita abanto koreng’ana emerongo etato. Erio bagateba, “Ekeene, Abaisraeli babuirwe ase obosio bwaito, buna chingaki chiria chinde.” 40Korende ekero ekemanyererio keria kie rikundesi ri’erioki kiarorekanete korwa ase omochie oria, Ababenjamin bakarigereria magega, bagakumia korora omochie omogima okoyia, na erioki richongororogete gochia igoro. 41Erio Abaisraeli bakaonchoka, bakairana, na Ababenjamin bagasogwa nomoondoko, ekiagera nigo baroche ng’a ogosirigwa kwabo kwabacheire ang’e. 42Ase ayio bakeonchora, bagatama korwa ase Abaisraeli gochia ensemo y’erooro, korende bakanarigwa nabarwani baria abange, na baria barwete ase omochie, bagaitwa. 43Abaisraeli bakagenderera goita abanto ba Benjamin, bakababwatia na kobatiringera inse goikera aase gete moocha ya Gibea. 44Abarwani chituoni b’Ababenjamin chilifu ikomi na isano na isato bagaitwa. 45Abatigarete bakeonchora, bagatama gochia erooro ase egetare kia Rimoni. Abanto chilifu isano bagaitwa ekero baare ase enchera gotama. Abaisraeli bakabwatia abatigarete naende goika Gidomi, na abanto chilifu ibere bagaitwa. 46Ababenjamin abaitetwe ase rituko riria nigo barenge chilifu emerongo ebere, na isano. Abanto abwo bamanyete korwana esegi y’emioro, naende nigo barenge abakong’u b’esegi.
47Korende abanto amagana atano na rimo bagatooreka, bakaonchoka, bagatama gochia ensemo y’erooro, ase egetare kie Rimoni, bakamenya ase egetare keria ase emetienyi ene. 48Abaisraeli bakairana naende korwania Ababenjamin bakabaita nemioro, bagaita abanto, ne chitugo, bagasiria ebinto bionsi banyorete aroro. Bagasamba nomorero emechie yonsi yarenge ase ensemo eria.
Currently Selected:
ABAGAMBI 20: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
