ABAGAMBI 19
19
Omolawi na omokungu oye o sere‐sere
1Ase amatuko aria ekero omoruoti atarenge ase Abaisraeli, narengeo omonto gete Omolawi omenyete buna omomenyi rogoro kegima ase ense y’ebitunwa y’Efraimu. Ere agatwara omokungu o sere‐sere korwa Bethlehemu o Yuda. 2Omokungu oyio tarenge omwegenwa ase omosacha oye, erio akamotiga, akairana gochia o ise, aaria Bethlehemu, akamenya aroro ase engaki y’emetienyi ene. 3Omosacha oria akaimoka ore nomosomba oyomo ne chitigere ibere, akagenda kogamba nere ase obwororo, agateema komoebereria airane nere. Omokungu oria akamosoyia nyomba mwa ise, na ise akamoroisia ase omogoko. 4Ise biara akamoboria abeere aroro; erio akaba amo nere amatuko atato, bakaria na konywa, bakarara aroro. 5Rituko ria kane bakaboka mambia chuni, na Omolawi oria akebeka ang’e kogenda, korende ise omosubati oria akamotebia, “Kararia endagera onyore chinguru, erio mogende.”
6Abanto baria babere bagaikaransa aroro, bakaria na konywa amo. Erio ise omosubati oria agatebia omonto oria, “Koranche, orare aiga naende ase obotuko bwa rero, oigwe buya.”
7Ekero omonto oria aimogete naende ng’a agende, ise omosubati oria akamosorora arare agwo naende. 8Rituko ria gatano, mambia chuni, akaimoka agachaka kogenda. Korende ise omosubati oria akamotebia, “Karie endagera onyore chinguru. Ganya goika omobaso orakenda.” Ase ayio bakaragera amo bonsi babere.
9Ekero omonto oria amo nomokungu oye o sere‐sere, na omosomba oye, baimogete kogenda, ise omosubati oria akamotebia, “Rora bono omobaso oerire, na bwaisire koiira, nagosoroire, beera aiga ase obotuko bwa rero naende, oigwe buya. Ankio oimoke mambia chuni, ochake orogendo, ogende seino.”
10Korende omonto oria tancha korara aroro ase obotuko boria. Ase igo akaimoka amo nomokungu oye o sere‐sere, bagachaka orogendo rwabo gochia Yebusi, (noro Yerusalemu), babwate chitigere chiabekire ebiikaransero. 11Bagaika ensemo erochie Yebusi, na konya bwairire, omosomba agatebia omonene oye, “Inchuo, togobere gochia ase omochie oyo bw’Abayebusi, erio torare aroro ase obotuko obo.”
12Omonene bw’omosomba oria akabora, “Titokogobera kogenda korara ase omochie bw’abanto batari Abaisraeli, korende tobaetanie togende Gibea.” 13Naende agatebia omosomba oye, “Eta togende, torore gose ntoike Gibea gose Rama, erio torare aroro ase obotuko obo.” 14Bakagenderera orogendo rwabo, na ekero baikire ang’e na Gibea, omochie bw’Ababenjamin, konya bwairiire kegima. 15Bakagobera gochia Gibea, barare aroro ase obotuko boria. Kobasoire aroro, bagaikaransa eraaro isiko, ase omochie oria, korende onde tarenge bwanchete kobasoyia nyomba mwaye ase obotuko obwo.
16Ekero baikaranseteo, omogaaka oyomo agacha, orenge korwa mogondo. Ere nigo arenge omonto bw’ense y’ebitunwa y’Efraimu, na bono nigo arenge omomenyi bw’omochie o Gibea. (Abanto b’aase aria nigo barenge Ababenjamin). 17Omogaaka oria akarora omogendi oria ase eraaro eria, akamoboria, “Ng’ai okorwa? Naende ng’ai okogenda?”
18Omogendi oria akamoiraneria, “Igo tokorwa Bethlehemu o Yuda, tokogenda rogoro kegima ase ense y’ebitunwa y’Efraimu, nao seito. Igo nagenda Bethlehemu o Yuda, na bono nkogenda inde ase enyomba ya Nyasae. Onde tari bwanchire gonsoyia nyomba mwaye. 19Obonyansi obwomo na endagera ende ye chitigere ntobwate. Naboigo ntobwate omogati na edivai bitoisaine inche na omokungu oyo, omosomba oo, na omosae oyo ore amo naintwe, abasomba bao. Titoremeiri gento kende gionsi.”
20Omogaaka oria akamotebia, “Kabe nomorembe! Tiga inche ngokonye ase kende gionsi oremeire. Tokonyara korara isiko aa ase eraaro botuko.” 21Erio akabasoyia nyomba mwaye, akaa chitigere endagera. Na ekero besibirie amagoro abo, bakaria na konywa.
22Ekero barenge kwegokia igo, abanto bande abanyaka b’omochie oria bagacha mobosokano, bagaetanana enyomba na goaka egesieri, bagatebia omogaaka oria, “Mosokie omonto oria ocha mwao, erinde torare nere tomosarie.”
23Omonto oria, omonyene enyomba, agasoka, akabatebia, “Taibo, abaminto, timobaisa gokora obokayayu buna obwo. Omonto oyio nomogeni one. Timobaisa komokorera obonyaka buna obwo. 24Rora, nimbwate omoiseke one omwekungi, na omonto oyo nabwate omokungu oye o sere‐sere, tiga mbasokie asemore bono. Mobakorere obonyaka buna moganetie, korende timobaisa gokorera omonto oyo egento buna ekio gi’okogechia.” 25Korende abanto baria tibamoigwera. Erio Omolawi oria akabwata omokungu oye o sere‐sere, akamoira isiko asebare. Barabwo bagakora obonyaka nere bakamokorera bobe ase obotuko obogima goika mambia; na ekero bwachia gokiamoka bakamotiga agende.
26Ekero bwachia koba mambia, omokungu oria agacha, akagwa inse ase egesieri ki’enyomba y’omonto oria omosacha oye arenge, akarara aroro goika ense egakiamoka na koraba. 27Omosacha oye akaimoka mambia, akaigora ebisieri, na ekero are gosoka agenderere orogendo rwaye, akanyora omokungu oye o sere‐sere oraire obwatete omoriibo o inse bw’egesieri ki’enyomba. 28Omonto oria akamotebia, “Imoka, tochake orogendo!” Korende omokungu oria tamoiraneria. Erio akamoimokia, akamobeka ase etigere igoro, agachaka orogendo rwaye gochia inka bwoye. 29Na ekero aigete inka bwoye, akaimokia omoyio, akabwata omokungu oye o sere‐sere, akamonachana ekiimo ase ekiimo goika ebing’ese ikomi na bibere. Erio agatoma abanto, nabarabwo bakabiira chinsemo chionsi ase ense y’Abaisraeli. 30Abanto bonsi abaroche amang’ana ayio nigo bakwanete, “Amang’ana anga buna ayio tana gokorekana, gose kororekana, korwa rituko riria Abaisraeli baruete ense ya Misiri goika rero! Rengereria amang’ana aya! Mogambe inki moranyare gokora!”
Currently Selected:
ABAGAMBI 19: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
