ABAGAMBI 11
11
Yefta
1Yefta Omogileadi nigo arenge omorwani etuoni. Ere nigo arenge omwana bw’omokungu omotayayi, na ise Yefta nigo arenge korokwa Gileadi. 2Omokungu omonyuome o Gileadi nere boigo akamoiborera abana abamura, na ekero barabwo babete abanto abanene bagaseria Yefta korwa inka, bakamotebia, “Aye tokonyara konyora omwando ase enyomba ya tata, ekiagera nigo ore omwana bw’omokungu omoao.” 3Erio Yefta agatama korwa ase bamura bamwabo, akagenda ase ense ya Tobu. Agwo agasang’ana nabanto batechigeti, nabarabwo bakana‐gotaara nere.
4Engaki egaika, ekero Abaamoni bachagete korwania Abaisraeli. 5Ekero keria abagaaka ba Gileadi bakagenda korangeria Yefta korwa ase ense ya Tobu, 6bakamotebia, “Inchuo obe omotang’ani oito, erinde tonyare korwania Abaamoni.”
7Korende Yefta akabairaneria, “Inwe mwanyangete na moganseria korwa ase enyomba ya tata. Nase ki mwachire asende bono, ekero mwanyorire emechando?”
8Abagaaka baria ba Gileadi bakamoiraneria, “Ayio naro agerire twakoiraneire bono: Ntorigetie aye ogende amo naintwe, otokonye korwania Abaamoni, na obe omotang’ani oito, na oyo bw’abanto bonsi ba Gileadi.”
9Yefta agatebia abagaaka baria, “Onye mokong’irania inka naende ngende korwania Abaamoni, na Omonene karabeke abanto abwo ase amaboko aane, inche nimbe omotang’ani oino.”
10Abagaaka ba Gileadi bakamoiraneria, “Ntokore buna gwatebire. Omonene nabe kirori ase egati yaito.” 11Ase igo Yefta akagenda amo nabagaaka ba Gileadi, na abanto babo bakamobeka akaba omogambi na omotang’ani obo. Yefta agakwana amang’ana aye onsi ase obosio bw’Omonene agwo Misipa.
12Erio Yefta agatoma abanto ase omoruoti bw’Abaamoni komoboria, “Ndiomana ki obwate asende? Nase ki gwachire korwania ense yane?”
13Omoruoti bw’Abaamoni akairaneria abanto abwo batometwe na Yefta, “Ekero Abaisraeli barwete Misiri mbairete ense yane korwa orooche rw’Arinoni goika orwa Yaboki, na goika Yorodan. Ase ayio bono yeiranie nomorembe.”
14Naende Yefta agatoma abanto eria kabere ase omoruoti bw’Abaamoni, 15bamotebie “Oko nokoiraneria kwa Yefta: Abaisraeli tibairete ense y’Abamoabu, gose ey’Abaamoni, 16korende ekero barwete Misiri nigo baetete ase egati y’erooro gochia Enyancha Embariri, bagaika Kadeshi. 17Korwa agwo bagatoma abanto gochia ase omoruoti bw’Edomu bamoborie ribaga baetere ense yaye. Korende omoruoti bw’Edomu tanchete gotegerera amang’ana ayio. Naende bagatoma abanto ase omoruoti o Moabu, nere boigo tabaete ribaga. Ase ayio Abaisraeli bagatigara agwo Kadeshi. 18Erio bagaeta ase egati y’erooro, bagaetanana ense y’Edomu na ense ya Moabu, bagaika moocha y’ense ya Moabu, goika ng’umbu y’orooche rw’Arinoni. Bagatoora agwo, korende tibaambogete Arinoni, ekiagera oro norobebe rwa Moabu. 19Erio Abaisraeli bagatoma abanto gochia ase Sihoni, omoruoti bw’Abaamori, agwo Hesiboni bamoborie ribaga baete ase ense yaye, bagende ase ense yabo abanyene. 20Korende Sihoni tabegenete Abaisraeli, na tabaete ribaga baete ase ense yaye. Agasangereria abarwani baye, na barabwo bagatoora agwo Yahasi, bakarwania Abaisraeli. 21Korende Omonene, Nyasae bw’Abaisraeli, akabeka Sihoni amo nabanto baye ase amaboko ’Abaisraeli, nabarabwo bakababua. Abaiisraeli bakaira ense yonsi y’Abaamori baria bamenyete ase ense eria. 22Bakaira ense yonsi y’Abaamori ekaba eyabo, korwa Arinoni goika Yaboki, na korwa erooro goika Yorodan. 23Omonene, Nyasae bw’Abaisraeli, nere oseretie Abaamori ase engencho y’abanto baye Abaisraeli. Inee! Aye bono nigo oganetie koira ense yabo? 24Aye togotwara egento Kemosi, enyasae yao, yakoeire, kebe ekiao? Naboigo naintwe natoire ense y’abanto baria Omonene Nyasae aseretie korwa ase amasio aito. 25Bono aye nigo okorengereria ng’a nomuya ore kobua Balaki, mosinto o Sipori, omoruoti bw’Abamoabu? Inee! Ere nomanete n’Abaisraeli nonya ng’ake? Gose narwanete esegi nabarabwo? 26Ase engaki y’emiaka amagana atato Abaisraeli nigo bamenyete Hesiboni na Aroeri, amo nebichie bionsi biaetanaine emechie eyio, na emechie yonsi yare ase chingegu chi’Arinoni. Nase ki motairete chinse echio ase engaki eyio yonsi? 27Inche ase ayio tindakora ebibe asore; aye nigo ogokora bobe asende ase ogokora esegi nainche. Omonene nere omogayani. Ere nanache ekina rero ase egati y’Abaisraeli na Abaamoni.” 28Korende omoruoti bw’Abaamoni taigwerete gose gosika amang’ana aya Yefta amotomerete.
29Erio omoika o Nyasae ogacha igoro ya Yefta, na ere agaeta ase egati y’ense ya Gileadi na eya Manase, akagenderera goeta Misipa ase Gileadi, na korwa aroro akagenda, agaika ense y’Abaamoni. 30Yefta akamoriera Omonene eira na gotiana, akabora, “Aye korabeke Abaamoni ase amaboko aane, 31erio nebe ng’a onde bwensi orasoke korwa ase egesieri ki’enyomba yane abe omotang’ani kondotota ekero ndairane korwa ase Abaamoni inde nobobui, oyio nabe oyoo, Omonene, na inche nimorue abe ekeng’wanso ki’ogosambwa asore.”
32Yefta akaamboka gochia ng’umbu, akagenda korwania Abaamoni, na Omonene akababeka ase amaboko aye. 33Ere akabaita korwa Aroeri goika chinsemo chia Miniti, akaira emechie emerongo ebere goikera Abeli‐Keramimu, akabaita ogoita okonene. Abaamoni bakabugwa, bakabekwa inse y’obogambi bw’Abaisraeli.
Omoiseke o Yefta
34Yefta akairana gochia inka bwoye aaria Misipa, na agwo akarora omoiseke oye ogocha komorotota, okobugia ekebangarara na gotenga. Omoiseke oria, nere bweka Yefta abwate, tabwate mwana onde, omomura gose omoiseke. 35Ekero Yefta aroche omoiseke oria, agatandora chianga chiaye, akarera, “Obee! Omoiseke one! Kwagerire enkoro yane yairianyekire. Naende kwandeteire emechando emenene. Inche narierete Omonene eira, ngatiana, na tinkonyara gotiga eira eria nariete.”
36Omoiseke oria akamotebia, “Tata, onye kwarierete Omonene eira, inkorere aya gwakwanete, ekiagera Omonene okoruseirie egesiomba ase ababisa bao Abaamoni.”
37Naende omoiseke oria akamotebia, “Inkorere egento ekemo gioka! Ing’a ribaga ri’emetienyi ebere, erinde ngende amo nabasani baane ase ebitunwa, na aroro toetanane na korera, ekiagera ningenderere koba omwekungi.” 38Ise akamotebia, “Genda!” Akamotoma agende ase engaki y’emetienyi ebere. Igo omoiseke oria akagenda amo nabasani baye gochia ase ebitunwa, na aroro agwo bakareera obwekungi bwaye. 39Ekero emetienyi ebere yaerete, omoiseke oria akairana ase ise, nere ise akamokora buna arierete Omonene eira ng’a akore. Omoiseke oria tabete nomosacha.
Nyuma y’ayio okaba omogiro ase Abaisraeli, 40ng’a abakungu b’Abaisraeli nigo barenge kogenda kobokia amagombo ase okoinyora omoiseke o Yefta, oria Omogileadi, ase engaki y’amatuko ane ase kera omwaka.
Currently Selected:
ABAGAMBI 11: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
