ABAGAMBI 1
1
Abayuda na Abasimeoni bakobwata Adoni‐Bezeki
1Nyuma Yoshua gakure, Abaisraeli bakaboria Omonene, “Nabanto b’egesaku ki ase egati yaito barabe abe ritang’ani korwania Abakanani?”
2Omonene akabairaneria, “Abayuda mbabe abatang’ani kogenda; rora, nabekire ense eria ase amaboko abo.”
3Abayuda bagatebia Abasimeoni bamwabo, “Inchuo motiire amo naintwe gochia ase orogongo orore omwando oito, torwanie Abakanani. Erio nyuma intwe natogende amo nainwe ase orogongo orore orwaino.” Ase ayio Abasimeoni bakagenda amo nabarabwo. 4Erio Abayuda bakagenda korwana esegi, na Omonene akabeka Abakanani na Abaperisi ase amaboko abo; Abayuda bagaita abanto chilifu ikomi agwo Bezeki. 5Bakanyora Adoni‐Bezeki agwo, bakamorwania, na bakabua Abakanani na Abaperisi. 6Adoni‐Bezeki agatama, korende Abayuda bakamobwatia, bakamobwata na komobutora ebiara ebinene bi’amaboko na ebi’amagoro. 7Erio Adoni‐Bezeki agateba, “Abaruoti emerongo etano na ebere, abwo ebiara biabo ebinene bi’amaboko na ebi’amagoro biabutoretwe, barenge gochora amatori korwa nyaro y’emesa yane. Na bono Nyasae onkoreire inche buna inche nabakorerete barabwo.” Akarentwa Yerusalemu, agakwera aroro.
Abayuda bakobua Yerusalemu na Heburoni
8Abayuda bakarwania Yerusalemu bakayoira. Bagaita abanto b’aroro nemioro, naende bagasamba omochie nomorero. 9Nyuma y’ayio bagatirimboka korwania Abakanani abamenyete ase ense y’ebigoro, na gochia irianyi ase Negebu, na ase ense omweya. 10Naende bakagenda korwania Abakanani abamenyete ase omochie o Heburoni, oyio orenge korokwa Kiriati‐Ariba agwo ritang’ani. Bakabua Sesai, na Ahimani, na Talimai.
Otinieli okobua omochie o Debiri
11Korwa agwo Abayuda bakagenda korwania abanto b’omochie o Debiri, oyio orenge korokwa Kiriati‐Seferi agwo ritang’ani. 12Kalebu agateba, “Onde bwensi oraumokere Kiriati‐Seferi na koyoira, nimoe omoiseke one Asika abe mokaye.” 13Otinieli, mosinto o Kenasi, omomura omoke omwabo Kalebu, akabua omochie oyio. Erio Kalebu akamoa Asika, omoiseke oye, akaba mokaye. 14Ekero Asika aigete bw’Otinieli, akamoboria asabe ise amoe oboremo. Erio agwo Asika agaika korwa etigere igoro, na Kalebu akamoboria, “Ninki oganetie?” 15Asika akairaneria, “Nekeegwa nganetie, ekiagera ngwansogetie okang’ira ase ense enyomo ya Negebu. Ase ayio, ing’a chinsoko chi’amache.” Kalebu akamoa chinsoko chia rogoro amo nechia maate.
Obobui bw’abanto b’egesaku kia Yuda na ekia Benjamin
16Abanto b’ororeria rw’oyomo bw’Abakeni, ise biara Musa, bakagenda amo n’Abayuda korwa ase Omochie bw’Emekendo#1:16 Omochie bw’Emekendo noro Yeriko gochia erooro, irianyi y’Aradi, ase ense ya Yuda, na bakamenya ase egati y’abanto b’aroro. 17Abayuda bakagenda amo n’Abasimeoni bamwabo, bakarwania Abakanani aria Sefati na kobabua. Bakaragereria omochie oria, bakayosaria kegima; nyuma y’ayio bakayoroka Horima.#1:17 Horima, engencho yaye: ogosarigwa 18Abayuda bakaira Gasa, na Asikeloni, na Ekironi, amo ne chinsemo chiaetanaine emechie eyio. 19Omonene nigo arenge amo n’Abayuda, na barabwo bakaira ense y’ebitunwa, korende tibanyarete goseria abanto bamenyete ase ense omweya, ekiagera abanto abwo nigo babwate chigari chi’ebioma. 20Na buna Musa atebete, Kalebu akaegwa omochie o Heburoni, nere agaseria abanto batato b’ororeria rw’Anaki korwao. 21Korende abanto b’egesaku kia Benjamin tibaseretie Abayebusi, abanto bamenyete Yerusalemu. Ase ayio Abayebusi nigo bagendererete komenya Yerusalemu amo n’Ababenjamin nonya ngoika rero iga.
Abanto b’egesaku kia Yusufu bakobua Beteli
22Abanto b’egesaku kia Yusufu bakagenda korwania omochie o Beteli, na Omonene nigo arenge amo nabarabwo. 23Bagatoma chirooti gochia Beteli. Omochie oyio nigo orenge korokwa Lusu agwo ritang’ani. 24Abanto baria chirooti bakarora omonto oyomo ogosoka korwa ase omochie oria, bakamotebia, “Tworokie ng’ai toranyare gosoera omochie oyo, naintwe ntogokorere amaya.” 25Akaborokia ase baranyare gosoera omochie oria. Barabwo bagaita abanto bande bonsi b’omochie nemioro, korende bagatiga omonto oria amo neamate yaye bare moyo. 26Omonto oria akagenda ase ense y’Abahiti, akaagacha omochie aroro, akayoroka Lusu, buna ore korokwa goika rero iga.
Chinsemo chi’ense Abaisraeli batairete
27Abanto b’egesaku kia Manase tibaseretie abanto bamenyete Beti‐Sehani, na Taanaki, na Dori, na Ibileamu, na Megido, amo nebichie biabo. Korende Abakanani baria mbagendererete komenya ase ense eria. 28Agwo nyuma, ekero Abaisraeli babeire ne chinguru, bakabetereria Abakanani babakorere emeremo emekong’u, korende tibabaseretie korwa ense eria.
29Abanto b’egesaku ki’Efraimu tibaseretie Abakanani abamenyete ase omochie o Geseri. Ase igo Abakanani bakagenderera komenya ase egati yabo.
30Abanto b’egesaku gia Sabuloni tibaseretie abanto bamenyete ase emechie ya Kitironi na Nahalali. Ase ayio Abakanani baria bakagenderera komenya agwo ase egati yabo, korende bakabetererigwa kobakorera emeremo emekong’u.
31Abanto b’egesaku gi’Aseri tibaseretie abanto bamenyete ase emechie y’Ako, na Sidoni, na Alabu, na Akisibu, na Heliba, na Afeki, na Rehobu. 32Nabo Abaaseri bagendererete komenya ase egati y’Abakanani, ababiare b’ense eria, ekiagera barabwo tibaseretigwe korwao.
33Abanto b’egesaku kia Nafutali tibaseretie abanto bamenyete ase emechie ya Beti‐Semesi na Beti‐Anati. Ase igo bakaba bakomenya ase egati y’Abakanani, ababiare b’ense eria, bakabetereria abanto ba Beti‐Semesi na Beti‐Anati kobakorera emeremo emekong’u.
34Abaamori bakamiga abanto b’egesaku kia Dani gochia ense y’ebigoro gose tibabatigerete ribaga batirimboke gochia ase ense omweya, 35Abaamori bakabwaterera ensemo yabo y’egetunwa kia Heresi, na Ayaloni, na Shaalabimu, korende abanto b’egesaku kia Yusufu bakabaengera, bakababetereria babakorere emeremo emekong’u.
36Sugusu ya Sera orobebe rw’Abaamori rokagenda goetera egetirimboko ki’Egetunwa ki’Ebiuge.
Currently Selected:
ABAGAMBI 1: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
