YOSHUA 24
24
Yoshua ogokwana nabanto agwo Sekemu
1Yoshua agasangereria ebisaku bionsi bi’Abaisraeli agwo Sekemu. Akarangeria abagaaka b’Abaisraeli, na abatang’ani, na abagambi, amo nabaraai babo, nabarabwo bagacha ase obosio bwa Nyasae. 2Erio Yoshua agakwana nabanto bonsi, akabatebia, “Aya naro Omonene, Nyasae bw’Abaisraeli; agokwana: Agwo kare chisokoro chiaino amo na Tera, ise Ibrahimu, na Nahori, nigo bamenyete ng’umbu y’orooche rw’Eufarati bakaba bagokorera chinyasae ching’ao. 3Korende inche nkarusia Ibrahimu, sokoro yaino, korwa ng’umbu y’orooche orwo, nkamotang’ana, ere agaeta ase ense engima ya Kanani; nkamenta oroiboro rwaye. Nkamoa Isaka, 4na Isaka nere nkamoa Yakobo na Esau. Esau nkamoa ense y’ebitunwa ya Seiri ekaba eyaye, korende Yakobo na abana baye bagatirimboka gochia Misiri. 5Erio ngatoma Musa na Haroni, ngaaka Abamisiri namaakwa aya nabarenterete, na nyuma y’ayio nkabarusia inwe aroro. 6Nkarusia chisokoro chiaino korwa Misiri, mogaika ase Enyancha Embariri, Abamisiri bakababwatia goikao ne chigari ne chibarasi. 7Erio chisokoro chiaino chikarera asende inche Omonene, mbakonye, na inche nkabeka omosunte ase egati yaino na Abamisiri. Nkaonchora enyancha egatuba Abamisiri ekabamera. Ee, mwaroche namaiso aino aya nakorete ase Abamisiri. Erio ase engaki entambe mokamenya ase erooro.
8“Nyuma y’ayio nkabarenta ase ense y’Abaamori, baria bamenyete moocha ya Yorodan. Barabwo bakabarwania, korende inche nkababeka ase amaboko aino. Inwe mokaira ense yabo, na inche nkabasiria ase amasio aino. 9Erio Balaki, omoruoti o Moabu, mosinto o Sipori, akaimoka kobarwania inwe Abaisraeli. Akarangeria Baalamu, mosinto o Beori, achiche kobaragereria, 10korende tinancha koigwera Baalamu. Ase ayio akabasesenia, nainche nkabatooria korwa ase amaboko a Balaki. 11Mokaamboka Yorodan, mogaika Yeriko. Abanto ba Yeriko bakabarwania, naboigo Abaamori, na Abaperisi, na Abakanani, na Abahiti, na Abagirigasi, na Abahivi, na Abayebusi bakorete, korende nkababeka ase amaboko aino. 12Ngatoma ebiaramba bikabarasa, na ase ebio abaruoti babere b’Abaamori bagasirigwa bosio bwaino, tari ase emioro yaino, gose ase amata aino. 13Nkabaa ense ase motakorete emeremo, na emechie motaagachete. Nigo momenyete ase emechie eyio na koria okwama kw’emesabibu na okw’emezeituni motasimegete.
14“Ase igo moiroke Omonene na komokorera ase okoigwera na ase obwegenwa. Rusia korwa asemore chinyasae chiria chisokoro chiaino chiare gokorera aaria ng’umbu y’orooche rw’Eufarati na ase ense ya Misiri; mokorere Omonene bweka. 15Kerabe timogokiri gokorera Omonene, rirorio mwechorere rero oyo mwanchete gokorera, onye ne chinyasae chiria chisokoro chiaino chiakorerete ng’umbu y’orooche rw’Eufarati, gose chinyasae chi’Abaamori, baria momenyete ase ense yabo. Korende inche amo nabanto b’enyomba yane ntomokorere Omonene.”
16Abanto abwo bakairaneria, “Taibo. Titorigeti gotiga Omonene na gokorera chinyasae ching’ao. 17Naki Omonene, Nyasae oito, nere otong’anyetie intwe amo ne chisokoro chiaito korwa Misiri, ense eria ase twarenge abasomba. Nere okorete ebikone ebinene ase amasio aito, naende nere otorendete aande onsi twaetete ase egati y’abanto aba bonsi. 18Omonene agatosereria Abaamori aba bonsi abamenyete ase ense eye. Ase ayio, ntorigetie komokorera Omonene. Ere nere Nyasae oito.”
19Yoshua agatebia abanto, “Timokonyara komokorera Omonene. Ere Nyasae omochenu, na Nyasae bwe risemi; takobaabera ogosaria kwaino na ebibe biaino. 20Moise gotiga Omonene na gokorera chinyasae ching’ao, nere neonchore abatige, nabae egesusuro na abasirie, nyuma kabakoreire amaya ritang’ani.”
21Erio abanto abwo bakamoiraneria, “Taibo! Intwe inatomokorere Omonene.”
22Yoshua akabatebia, “Inwe mwebereire birori ng’a mwachorire Omonene.”
Bakairaneria, “Ee, twebereire birori intwe abanyene.”
23Akabatebia, “Rusia chinyasae chingeni echire ase egati yaino, moonchore chinkoro chiaino ase Omonene, Nyasae bw’Abaisraeli.”
24Abanto bakairaneria Yoshua, “Omonene, Nyasae oito, nere torakorere, na amang’ana aye naro toraigwere.”
25Ase rituko riria Yoshua agakora okobwatana kw’ogotianania nabanto abwo, na agwo Sekemu akabaa amachiko na emeroberio barabwatie.
26Yoshua akarika amang’ana aria ase Ebuku y’amachiko a Nyasae. Erio agatenenia rigena rinene agwo inse y’omote onga buna omotontera, oteneine ang’e n’Obomenyo Obochenu bw’Omonene. 27Agatebia abanto bonsi, “Rigena eri nigo rirabe kirori asetore, riaigure amang’ana onsi aya Omonene akwana naintwe. Ase igo riabeire kirori igoro yaino, erinde mobe abegenwa ase Nyasae oino.” 28Erio Yoshua akaa abanto ribaga bakagenda kera oyomo ase omwando oye.
Yoshua na Eleazari bagokwa
29Nyuma y’ayio Yoshua, mosinto o Nuni, omosomba bw’Omonene, agakwa gakoorire emiaka rigana, na ikomi. 30Bakamotindeka ase omochie bw’omwando oye, agwo Timunati‐Sera, ase ense y’ebitunwa y’Efraimu, sugusu y’egetunwa kia Gaasi.
31Ase amatuko a Yoshua Abaisraeli bakaba bagokorera Omonene, naende bagakora boigo ase amatuko ’abagaaka baria batigarete nyuma y’ogokwa kwa Yoshua, abwo bamanyete amang’ana aya Omonene akorete ase Abaisraeli.
32Amauga a Yusufu, aya Abaisraeli barentete korwa Misiri, agatindekwa agwo Sekemu, ase oboremo bw’ense eria Yakobo agorete korwa ase basinto ba Hamori, ise Sekemu, ase rigori rie chifeta rigana erimo. Oboremo obo bokaba omwando bw’ororeria rwa Yusufu.
33Na Eleazari, mosinto o Haroni, agakwa, agatindekwa Gibea, omochie oyio Finehasi, omwana oye, aetwe ase ense y’ebitunwa y’Efraimu.
Currently Selected:
YOSHUA 24: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
