ISAYA 37
37
Omoruoti okorigia ogosemigwa korwa ase Isaya
(2 Abar 19:1–7)
1Ekero omoruoti Hezekia aigwete amang’ana ayio, agatandora chianga chiaye, akeboyia chianga chie chigunia, erio agasoa ase enyomba y’Omonene. 2Agatoma Eliakimu, oria orenge omoteneneri bw’enyomba yaye, na Sebuna omoriki, na abakuani abagaaka, beboyetie chianga chie chigunia, bagende ase Isaya omobani, mosinto bw’Amosi. 3Abanto abwo bakamotebia, “Aya naro Hezekia agoteba: Rituko ria rero neri’obororo, na egesusuro, na ogochaywa, buna ekero abana babeire ang’e baiborwe, korende chinguru chi’okobasukia basoke chiaborire. 4Ande nabo erabe ng’a ekero omoruoti bw’Abaasuri atomete Rabi‐Sake korama Nyasae ore moyo, ere Omonene, Nyasae oino naigwete ayio. Ere nabae egesusuro ase amang’ana ayio. Ase ayio sabera abanto abwo batigarete bare moyo.”
5Ekero abasomba ba Hezekia omoruoti baigete ase Isaya, 6Isaya akabatebia, “Motebie omonene oino ng’a Omonene nigo agoteba iga: Tobaisa kwoboa ase engencho y’amang’ana ayio kwaigure abasomba b’omoruoti bw’Abaasuri batebire na kondama. 7Rora, nimbeke omoika gete ime yaye, erio ekero araigwe chinkuma nairoke, airane gochia ase ense yaye; nimorue aitwe nomoro, agwo ase ense yaye omonyene.”
Abaasuri bagotoma amang’ana ’ogotianera konde
(2 Abar 19:8–19)
8Rabi‐Sake akairana, ekiagera aigwete ng’a omoruoti bw’Abaasuri orure Lakisi, akamonyora okorwana na Libuna. 9Na ekero omoruoti bw’Abaasuri aigwete amang’ana ng’a Tirihaka, omoruoti bw’Abaetiopia, ochire korwana esegi nere, agatoma abanto ase Hezekia naende, akabatebia, 10“Aya naro moratebie Hezekia, omoruoti bw’Abayuda: Tobaisa gwancha Nyasae oyio oo osemeretie akong’aine, erinde orengererie ng’a Yerusalemu tokobekwa ase okoboko kw’omoruoti bw’Abaasuri. 11Rora, aye kwaigure aya abaruoti b’Abaasuri bakoreire chinse chionsi, bachisaririe kegima. Inee! Aye bono notooreke? 12Inee! Chinyasae chi’ebisaku chiatooririe ebisaku biria chisokoro chiane chiasiretie, ebisaku bia Gosani, na Harani, na Resefu, na abanto ba Edeni, baria barenge agwo Telasari? 13Ng’ai omoruoti o Hamati are, gose omoruoti bw’Aripadi, na oyo bw’omochie o Sefarawaimu, na oyo o Hena, na oyo o Iwa?”
14Hezekia akaegwa rirube korwa ase abanto baria batometwe, akarisoma, erio akagenda ase enyomba y’Omonene, akarirambora ase obosio bw’Omonene. 15Hezekia agasaba Omonene, agateba, 16“Aye Omonene bw’Emeganda, Nyasae bw’Abaisraeli, aye omenyete nobonene bwao igoro y’Abakerubi, aye naye Nyasae, aye bweka, igoro y’amarouti onsi ay’ense; naye gwatongete igoro na ense 17Aye Omonene, tegerera oigwe! Aye Omonene, rigereria orore! Oigwe amang’ana onsi a Senakeribu, aya atomire ase ogokorama aye Nyasae ore moyo. 18Aye Omonene, ekeene, abaruoti b’Abaasuri basiririe abanto b’ebisaku ne chinse chiabo, 19batugutire chinyasae chi’abanto abwo ase omorero, ekiagera chirochio tichiri Nyasae, korende nemeremo y’amaboko ’abanto, chiroisirie korwa ase emete na amagena, na ase ayio chigasarigwa. 20Bono Omonene, Nyasae oito, totoorie korwa ase okoboko kwaye, erinde amaruoti onsi are ase ense anyare komanya ng’a aye naye bweka ore Omonene.”
Isaya ogotoma amang’ana gochia ase omoruoti
(2 Abar 19:20–37)
21Erio Isaya, mosinto bw’Amosi, agatoma amang’ana ase Hezekia, akomotebia, “Aya naro Omonene, Nyasae bw’Abaisraeli, agoteba: Aye gwansabire igoro ya Senakeribu, omoruoti bw’Abaasuri. 22Ase ayio, eri nario ring’ana Omonene akwanire: Aye Senakeribu, Sayoni, omochie ore buna omoiseke omwekungi, nigo agochayete na kogosekerera; omochie o Yerusalemu nigo okogosingiseria omotwe magega yao. 23Aye ning’o gwasekereire na korama? Ning’o gwaakeire eriogi riao ase ’oboenenu na kweimokereria igoro namaiso ’oboenenu? Aye kwabeire mamincha y’Omonene bw’Abaisraeli. 24Goetera ase abasomba bao gwachecheirie Omonene ekero gwatebire iga: Nase chigari chiane chinyinge nariinire goika ebichuria bi’ebitunwa, goika igoro kegima ya Lebanoni. Ngatema emecharake yaye yare emetambe goetania eyende, na emetarakwa yaye emiya mono. Ngasoa ase ebinunchi biaye ime, na ime ase rinani rinoru. 25Ngakunya, nkanyora amache nkonywa, ngakamia chindooche chionsi chia Misiri ne chimbaratero chi’amagoro aane.
26“Inee! Aye tikwana koigwa ng’a nigo nachigete ayio kare, ngakora emeroberio eyio ase amatuko a kare? Bono ngoikerania inde amang’ana ayio ng’a aye osarie emechie egiteire chindwaki ebe amaturi are chitui chi’amagena. 27Abanto be chinse echio nigo barenge abareu batari na nguru, bakaondoka na gosookigwa, bakaba buna ebimeri bire mogondo, na buna obonyansi oborere bomerete kerama igoro bogosusana botarakina.
28“Nimanyete ekero oikaransete na ekero ogosoka isiko, na ekero okoirana. Boigo nimanyete buna ore nekeririanda asende. 29Ekiagera kwabeire na kerokio asende, na oboenenu bwao bwaikire ase amato aane, nimbeke ekegobanio ase chimioro chiao ime, na egento kiane ki’ogokoraa ase omonwa oo, ninkoiranie ogendere enchera eria gwacherete.
30“Eke nakio ekemanyererio asore Hezekia: Omwaka oyo inamorie endagera ekwemeria yoka enyene, na omwaka o kabere boigo. Erio omwaka o gatato imobusure na kogesa, imosimeke emesabibu ase emegondo na morie okwama kwabo. 31Na abatigari b’enyomba ya Yuda abaratooreke mbaame babe buna ebimeri biirete emeri inse mono na gokina gochia igoro, bikwama amatunda, 32ekiagera abatigari mbache korwa Yerusalemu, na korwa ase egetunwa gia Sayoni, ekeombe ki’abanto baratooreke. Risemi ri’Omonene bw’Emeganda ndiikeranie amang’ana ayio.
33“Ase igo, aya naro Omonene agoteba igoro y’omoruoti bw’Abaasuri: Ere tagocha ase omochie oyo, gose takoruta omogwe aroro; tagocha ase omochie oyo ne chinguba, gose takoagacha eburi bosio bwaye. 34Naende nigo agoteba ng’a enchera eria acherete, eyio nero arairanere, gose takonyara gosoa ase omochie oyo. 35Inche ning’egere omochie oyo na koyotooria ase engencho yane inche omonyene, na ase engencho ya Daudi, omosomba one.”
36Erio omomalaika bw’Omonene akagenda ase egetwori ki’Abaasuri agaita abanto chilifu rigana erimo na emerongo etano na etato na isano (185,000). Ekero abanto babogete mambia, bakarora emebere y’abanto bakwete ere aande onsi. 37Senakeribu, omoruoti bw’Abaasuri, akarua agwo, akagenda nka bwoye, akamenya Nineva. 38Ekero arenge gosasima ime ase enyomba ya Nisiroki, enyasae yaye, Adarameleki na Sareseri, abamura baye, bakamoita nemioro, erio bagatama gochia ase ense y’Ararati. Ezara‐Hadoni, omomura oye, akaba omoruoti ribaga riaye.
Currently Selected:
ISAYA 37: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
