ISAYA 36
36
Abaasuri bagotianera Yerusalemu
(2 Abar 18:13–27; 2 Am ’Eb 32:1–19)
1Ase omwaka o ikomi na kane bw’okogamba kw’omoruoti Hezekia, Senakeribu, omoruoti bw’Abaasuri, akagenda, akarwania emechie yonsi y’Abayuda yagiteire chindwaki, akayebua. 2Erio omoruoti oyio bw’Abaasuri agatoma Rabi‐Sake korwa Lakisi amo nabarwani esegi abange agende ase Hezekia agwo Yerusalemu. Rabi‐Sake agatenena ase omotaro bwe ritibo ria rogoro ase enchera ekogenda ase egetii ki’omosibia bw’ebitambaa bikoroisigwa chianga. 3Erio Eliakimu, mosinto o Hilikia, omoteneneri bw’enyomba y’omoruoti, na Sebuna omoriki, na Yoa mosinto bw’Asafu, oyorenge omoriki bw’amang’ana are gokoreka, bagacha aroro. 4Rabi‐Sake akabatebia ng’a batebie Hezekia iga: “Aya naro omoruoti omonene, oria bw’Abaasuri, agokwana: Nigoro yang’o obegete ogosemeria kwao? 5Nigo okorengereria ng’a ogokwana kw’amang’ana gwoka nakwo koganeirie ase okomanya korwana esegi na koyebua? Ning’o osemeretie oragokonye goika kwangire konyingwera inche? 6Rora bono, aye nigo osemeretie ense y’Abamisiri, eyio enga buna egetonto kebunegete. Omonto onde bwensi okogiesiirera, ekio nigo keramokebe okoboko. Naboigo Farao omoruoti o Misiri are ase abanto bonsi abwo bamosemeretie.
7“Inee! Inwe nigo mogontebia ng’a nigo mosemeretie Omonene, Nyasae oino? Tari ere oria aase aye aimokererete igoro agosasimerwa amo nebisasimero biaye Hezekia atagoire, agatebia Abayuda na abanto ba Yerusalemu: Mobe mogosasima bosio bw’egesasimero eke! 8Inchuo moigwane mobeke rigori nomonene one, omoruoti bw’Abaasuri. Nimbae chibarasi chilifu ibere komoranyare konyora abariini be chibarasi echio. 9Naki moranyare kobua omoteneneri oyomo ore omoke ase egati y’abasomba b’omonene one, ekero mosemeretie ense ya Misiri ase okonyora chigari na abariini chibarasi? 10Inee! Nigo mokagete ng’a inche nigo nachire korwania ense eye na koyesaria Omonene atancheti? Taibo; Omonene nere ontebia: Genda orwanie ense eria oyesarie!”
11Erio Eliakimu, na Sebuna, na Yoa, bagatebia Rabi‐Sake, “Koranche okwane naintwe, abasomba bao, ase omonwa bw’Ekearamaiki, ekiagera ntoyomanyete; tobaisa gokwana naintwe ase omonwa bw’Ekeyuda ekero abanto bare ase orwaki igoro bategererete.”
12Rabi‐Sake agateba, “Inee! Omonene one nigo antoma nkwane amang’ana aya ase omonene oino na asemore mweka? Yaya, tantomete ase inwe mweka, korende nase abanto baikaransete ase orwaki igoro, abwo banacheirwe ekina amo nainwe bagochia koria obonyira bwabo na konywa amasinyoro abo bagoitera.”
13Erio Rabi‐Sake agatenena, agaaka eriogi rinene ase omonwa bw’Ekeyuda, agateba, “Igwa ring’ana ri’omoruoti omonene, ore omoruoti bw’Abaasuri. 14Aya naro omoruoti agokwana: Timobaisa gwancha Hezekia abang’aine, ekiagera ere takonyara kobatooria. 15Timobaisa gwancha Hezekia abasirie ng’a mosemerie Omonene ekero agoteba: Ekeene, Omonene natotoorie, na omochie oyo tokobekwa ase okoboko kw’omoruoti bw’Abaasuri. 16Timobaisa gotegerera amang’ana a Hezekia. Aya naro omoruoti bw’Abaasuri agoteba: Kora omorembe nainche, moche asende. Erio kera omonto asemore narie okwama kw’emesabibu na okw’emeko yaye omonyene, na kera oyomo oino nanywe amache ’ensoko yaye omonyene, 17goika inchiche imbarusie agwo mbaire ase ense egwekaine buna ense eyio yaino, ense ere ne chindagera, na edivai, ense ere nemegati na emegondo y’emesabibu. 18Morende mono, ekero Hezekia akobang’aina, ogoteba: Omonene natotoorie. Inee! Enyasae ende yonsi y’ebisaku yatooririe ense yaye korwa ase okoboko kwane inche omoruoti bw’Abaasuri? 19Ng’ai chinyasae chia Hamati na Aripadi chire? Inee! Chinyasae chia Sefariwaimu, ng’ai chire? Chiatooririe ense ya Samaria korwa ase okoboko kwane? 20Nereri ase egati ye chinyasae chionsi chie chinse echio yatooririe ense yaye korwa ase okoboko kwane? Nainwe nigo mokorengereria ng’a Omonene natoorie Yerusalemu korwa ase okoboko kwane?”
21Korende abanto bagakira‐kiri, tibamoiraneria nonya ne ring’ana erimo, ekiagera omoruoti konya ochikire iga: “Timobaisa komoiraneria.” 22Erio Eliakimu, mosinto o Hilikia, oria orenge omoteneneri bw’enyomba y’omoruoti, na Sebuna omoriki, na Yoa mosinto bw’Asafu, omoriki bw’amang’ana are gokoreka, bagacha ase Hezekia bare ne chianga chitandogete, bakamotebia amang’ana ayio Rabi‐Sake akwanete.
Currently Selected:
ISAYA 36: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
