ISAYA 30
30
Ogokonywa kwa Misiri kore bosa
1Omonene nigo agoteba iga: “Obobe nobwaino inwe abana baane abamore abasaria, aba mogokora emeroberio etari eyane, nigo mogokora okobwatana okwo gotari okw’omoika one, na mwamenta ebibe igoro ase ebibe binde. 2Inwe nigo mokogenda ase Misiri korigia ogokonywa korwa ase Farao, korende timori korigia ogosemigwa korwa asende. Nigo mokorigia obotamero ase ekiriri kia Misiri. 3Ase ayio chinguru chia Farao nchionchoke chibe obosooku bwaino; na obotamero bwaino ase ekiriri kia Misiri mbobarentere ogochaywa. 4Nonya abagambi baino bare ase omochie o Soani, na abatomirwe baikire ase omochie o Hanesi, 5kera oyomo nasooke, ekiagera mosemeretie abanto b’egesaku batanyare kobaa ebitoki binde, korende nobosooku na ogochaywa.”
6Aya naro amang’ana igoro ye ching’iti chia Irianyi. Abanto abwo nigo bagoeta ase ense ere nemechando na omoichano, ase chindo chiaberi ne chindo chinde chimenyete amo namarubi, ne chinchoka chikoiruruka. Nigo bakobeerekia chitigere chinibo chiabo, ne chikungo chiabo bachibeka ase chisukubi chie chingamia, bagenda ase abanto batabae bitoki binde. 7Ogokonywa kwa Misiri nigo kore bosa; ase ayio narokire ense eyio “Rahabu etari gokora gento.”
Abanto abatari abaigweri
8Bono genda, orike amang’ana ayio ase ebao agwo ase amasio abo, na oyarike ime ase ebuku, erinde abe kirori ase amatuko agochi‐gocha goika kare na kare. 9Abanto aba nigo bare abasaria, abana abanyaborimo, abana batari koigwera amachiko ’Omonene. 10Nigo bagotebia abarori b’amaroro: “Timobaisa korora amang’ana,” na batebia ababani: “Timobaisa gotobanera amang’ana amaronge; totebie amang’ana amororo aya agotwansera, motobanere ay’obong’ainereria. 11Karue inchera, gobera korwa ase oboeto, morusie asetore Oyio ore Omochenu bw’Abaisraeli.”
12Ase ayio, Oyore Omochenu bw’Abaisraeli otebire iga: “Inwe mwachayire ring’ana eri, mwanchire amang’ana ’obobe na obong’ainereria, naro mosemeretie. 13Ase ayio, okomocha oko kw’ebibe nkobe asemore buna obotandoku bore ase orwaki orotambe rwekumbire, rore ang’e kogwa, na okogwa kwaye nigo korache bwango mobosokano. 14Okogwa okwo nkobe buna ogwatwa kw’enyongo y’omokori chinyongo egotinerwa inse, nonya norogio oromo rw’enyongo eyio tirori gotoka omonto araancharere omorero, gose arabuchere amache korwa ase ensoko.”
15Aya naro Omonene Nyasae, Omochenu bw’Abaisraeli agoteba: “Komorang’iranere mobe abatoereru imotooreke; ase oboremereria na ogosemeria monyore chinguru.” Korende inwe mwangire gokora bo. 16Nigo mogoteba ng’a moriine chibarasi chikominyoka mono, motame. Ee, goika motame. Inwe moganetie gotama ne chibarasi chinyango, korende ababisa baino abwo bakobabwatia nigo bare abaminyoki kobabua. 17Abanto baino elifu eyemo mbaserigwe ase okogoswa nomonto oyomo, gose nabanto batano, goika abatigari baino babe buna omoenga oyomo ore ase egetunwa igoro, na buna ekemanyererio keimokereirie ase ekerogo igoro. 18Ase ayio Omonene nigo aganyete ng’a anyare kobakorera amaya; na ase ayio, neimokererie igoro mono goika abe okobarorera amabera, ekiagera Omonene nigo are Nyasae bw’oboronge. Mbasesenirie abanto bonsi abamoganyete.
Nyasae nasesenie abanto baye
19Inwe abanto momenyete Sayoni agwo Yerusalemu, timokogenderera korera naende. Ekeene, Omonene nabakorere amaya ekero mokorera asare; ekero araigwe eriogi ri’okorera kwaino nabairanerie. 20Nonya Omonene ogochia kobaa inwe omogati ekero more nemechando, na amache ekero more nobororo, aborokia baino tibakogenderera kwebisa, korende mobe mokobarora namaiso aino. 21Komorabe mwagobeire korwa ase enchera gochia ensemo y’okorio, gose ey’okobee, inwe namoigwe korwa nyuma yaino amang’ana aya: “Enchera neye, yebwatie.” 22Ase engaki eyio moimokie emegwekano yaino mogosasima, eyio ebachire na koomwa ne chifeta, na eyende ebombire na koomwa netahabu, moyetugute buna ebinto bitachenegeti, moyetebie: “Karue aa asetore!” 23Erio ekero morabe mogosimeka chimbusuro chiaino, Omonene nachitwerie embura, erinde chindagera chiaino chiame, nainwe monyore chindagera chinyinge chingiya. Ekero ekio chitugo chiaino nchinyore amarisio amagare. 24Chiombe ne chitigere chiaino, echio mokoremia ase emegondo yaino, nchinyore chindagera chingiya chisongire noroteru na goswagwa, chiochoganirie nomonyo, chirie. 25Ase rituko erio ekero ogoitwa okonene korabe, ne chindwaki chinkong’u chiraiyerigwe, chindooche nchituboke korwa ase ebitunwa ebitambe bionsi na ebigoro biimokererete igoro. 26Oborabu bw’omotienyi mborabe se buna omobaso bw’erioba, na omobaso bw’erioba nobare ara gatano na kabere, buna okobara kw’amatuko atano na abere. Amang’ana ayio nigo arakorekane ekero Omonene araboe chingoma na agwenie amaakwa aagete abanto baye.
Nyasae nae Abaasuri egesusuro
27Rora, erieta ri’Omonene ngocha rire korwa aare. Nigo agocha ore nendamwamu egwoka, ne rikundesi rinene ri’erioki; amang’ana ’ebikoba biaye nigo aichire nekeririanda, na oromeme rwaye nigo rore buna omorero ogosiria. 28Omoika bw’Omonene oye nigo onga orooche roichire goika ebigoti. Nasonge abanto b’ebisaku negesongero ki’ogosiria; ase emenwa yabo nigo arabeke ebinto ase emenwa yabo bi’okobatantania. 29Inwe motere ogotera buna nokw’omoyega omochenu bw’obotuko; chinkoro chiaino nchibe nomogoko buna ekero abanto bakobugia ebiroria kobagotiira gochia ase egetunwa ki’Omonene, ere oyore Egetare ki’Abaisraeli.
30Omonene naake eriogi riaye ri’obonene na abanto bariigwe, na ogoaka kw’endamwamu gokorwa ase okoboko kwaye kororekane. Nigo araake goetera ase omorero ogosamba na gosiria, na omwaga bwe chinguru, na embura y’omoubera, na amagena ’embura. 31Ase eriogi ri’Omonene, na ase ogoaka nenyimbo yaye, Abaasuri mbaondoke mono. 32Omonene naimokie enyimbo yaye abae egesusuro, na ekero arabe ogoaka abanto abwo, abanto baye mbabe bakobugia chinchigiri na amakano. Omonene omonyene nere orabarwanie esegi aande onsi. 33Aase ogosambera ebing’wanso bi’okogechia nigo aroisetigwe kare; ee aase agwo nigo aroiseretigwe omoruoti. Aase agwo nigo are aatambe na aagare, aichorigwe chinko na omorero. Omoika bw’omonwa bw’Omonene, onga buna omorero bw’amagena akoyia, noro orayouterere.
Currently Selected:
ISAYA 30: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
