ISAYA 29
29
Ogosirigwa kwa Yerusalemu
1Obobe nobwao aye Arieli, Arieli,#29:1 Arieli, engencho yaye: eriiko, gose egesasimero; (aiga Yerusalemu) omochie ase Daudi arenge gotoora. Omwaka ase omwaka imogenderere korenda Amatuko aino Amanene, na emeyega yaino. 2Inche Omonene nindete emechando asore Arieli, okorera na okweumia mbibe ime yao, na aye omochie nobe asende Arieli bori. 3Nintoore asore ngoetanane, ng’agache chiburi chi’okoboera na gokorwania. 4Erio abanto bamenyete ime yao mbaiyerigwe inse, babe bagokwana korwa riroba inse, na amang’ana abo naigweke korwa ase orotu ime ng’ora ng’ora, ee, amariogi abo narwe inse ye riroba buna eriogi ri’ekerecha, nigo barabe bakomonya korwa ase orotu ime.
5Korende ababisa bao bare omoganda omonene mbairurukigwe buna orotu; na omoganda bw’abare abatindi noirurukigwe buna omoiriro gochia aare. Amang’ana ayio nigo arabe mobosokano, ee, nigo arabe mobosokano mono. 6Omonene bw’Emeganda naake abanto bao ne chinkoba, na omotengecho bw’ense, na egeturi ekenene, na ekerambauti, na embura omoubera, na amasaria ’omorero ogosamba. 7Abanto abange b’ebisaku bionsi abwo bakorwania Arieli, ee, bonsi abakorwania omochie oyio, na gotagora chiburi chiaye, na koyorentera emechando, nigo barasirigwe, beebwe buna okorota gokwebwa, ee, buna okorora kwa botuko gokwebwa. 8Abanto b’ebisaku bionsi, abwo bakorwania Egetunwa gia Sayoni, nigo barabe buna omonto ore nenchara akorota ng’a nkoragera are, korende gakoboka bwenyora ore nenchara, gose buna oyore nerang’o akorota ng’a nkonywa are amache, korende gakoboka bwenyora ore nerang’o.
Ogokurerwa gwachayetwe
9Tenena mokumie, ee, mokumie! Ekore mobe emeuko, mogenderere goukora! Etindie, korende tari ase okonywa edivai; ong’anya, korende tari ase okonywa ekenyugwa kegotindia. 10Omonene obaitereire inwe omoika bw’okorara chitoro chindito; oukoirie amaiso ’ababani, abwo bare amaiso aino, na otubire emetwe y’abarori, abwo bare emetwe yaino. 11Amaroro ayio onsi ay’obobani ebei re asemore buna amang’ana ’ebuku emumekeirie na kobekwa ekemanyererio. Ekero abanto bakoira ebuku eyio ase omonto omanyete gosoma, bamotebia: “Soma amang’ana ’ebuku eye,” ere nigo agokana oteba: “Tinkonyara, ekiagera amang’ana aya nigo abeire buna ay’ebuku emumekeire ebekire ekemanyererio.” 12Naende bayea oyotamanyeti gosoma, bamotebia: “Soma amang’ana ’ebuku eye,” nere nigo agokana, oteba, “Timanyeti gosoma.”
13Omonene nigo agoteba iga: “Abanto aba nigo bakong’ika ang’e ase ogokwana nemenwa yabo na gonsika nebikoba biabo, korende chinkoro chiabo nigo chire aare korwa asende, na okonyiroka kwabo nigo kore amachiko mwanyabanto borokereretie. 14Ase ayio, rora, ningenderere gokora amang’ana ay’ogokumia ase abanto aba, ee, amang’ana ayio nigo arabe ay’ogokumigwa na goichanwa; obong’aini bw’abanto babo bare abang’aini mbosire, na okomanya kw’abamanyete mono nkobiswe.”
Ogosemeria kw’amatuko agochi‐gocha
15Obobe nobw’abanto abwo bagokora emeroberio yabo erio bayebisa aase aatambe ng’a Omonene tayerora. Abanto abwo nigo bagokora ogokora kwabo ase chinchera chi’omosunte, erio bateba, “Ning’o otoroche? Ning’o otomanyete?” 16Inwe nigo mokoonchorana amang’ana bobe. Inee! Omokori chinyongo nareng’anigwe nesike? Egento keroisirie ngetebie oyokeroisetie, “Tari aye kwandoisetie”; gose egento omonto abombete nkemotebie, “Tomanyeti kende”?
17Engaki netigarete enke, erio rinani ria Lebanoni riraonchorwe ribe omogondo okwama chindagera chinyinge; na omogondo oria orenge kwama chindagera chinyinge oonchorwe obe rinani.
18Ase engaki eyio emetino nebe ekoigwa amang’ana arikire ase ebuku, na emeuko yarenge ekorora buna rikongori na omosunte, nerore buya namaiso abo. 19Erio abanto abaitongo nabanyore omogoko omoyia kobare ime ase Omonene, na abataka bare ase mwanyabanto mbagokere Omonene ore Omochenu bw’Abaisraeli. 20Abakoirokia abande mbasirigwe, na abachecheria tibakobao; abwo bonsi bakorigia gokora amabe mbaitwe tibabao. 21Omonene nasirie abanto abwo bagosiria abande namang’ana abo, abwo bakobeka omoeto ase oyo okogamba ebina agwo ase egeita, bakwana oborimo na koonchorana oboronge bw’omonto ore omoronge.
22Ase ayio Omonene, oria obooretie Ibrahimu, okwanire amang’ana aya igoro y’ororeria rwa Yakobo, “Abanto ba Yakobo tibakogenderera koba nobosooku; amasio abo takoirura nonya ng’ake naende. 23Ekero abana babo bararore emeremo y’amaboko aane, eye nakorete ase egati yabo, mbachene erieta riane ime yabo, naende banche ng’a inche n’Omochenu o Yakobo inde, mbabe bateneine banyirogete inche Nyasae bw’Abaisraeli. 24Erio abwo basirire ase omoika mbaegwe okomanya, na abwo bakwemurungania mbanche amorokererio.”
Currently Selected:
ISAYA 29: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
