ISAYA 28
28
Oboruoti bwa sugusu bogokurerwa
1Obobe nobwao aye ore egutwa y’oboenenu bw’abanto ba Efraimu batindire. Nigo ore buna egesicha giasusanire, obwari bw’obonene bwao bwasirire. Nigo ore ase egetunwa igoro, igoro ye rikura ritobu ri’abwo babuirwe nedivai. 2Rora, Omonene nabwate oyomo ore nokobua ne chinguru; oyio nigo anga buna embura y’amagena, na buna omwaga omotindi ogosaria, na buna omoubera ore nembura enyinge oraiyerie ebinto bionsi inse ne chinguru. 3Egutwa y’oboenenu y’abanto b’Efraimu batindire netiringwe namagoro; 4na egesicha giasusanire kere obwari bw’obonene bwaye, ekio kere ase egetunwa igoro agwo ase rikura ritobu nkebe buna ogotongorwa kw’amako agotang’anera rigesa, ayio omonto akorora oyatwa, na ekero ayabekire koboko oyaria.
5Ase engaki eyio Omonene bw’Emeganda nabe egutwa y’obonene, na ekiore ki’obwari ase abanto baye abatigari, 6naende nabe omoika bw’ogokora ayare ay’ekeene ase abwo bakogamba ekina, naende nabe chinguru chiabo abwo bagoseria ababisa agwo ase egeita.
Isaya okobana igoro y’Abayuda
7Abanto aba nabarabwo batindire edivai; nigo bakoong’anya ase okonywa ebinyugwa bigotindia; abakuani na ababani batindire nebinyugwa bigotindia, na ekero bakorora amaroro nigo bakomocha, nigo bagotantana ekero bakonacha ebina. 8Chimesa chiabo chionsi chiaichoire namaroki, na aase ande tari atari nobonyinyeri.
9Nigo bagoteba: “Ning’o Isaya aganetie kworokereria obong’aini, na ning’o ere aranyare komanyia amang’ana aye amaya? Inee! Nabana abake abwo batachirwe, abwo batigigwe kogonka? 10Nigo agotoa ogochika igoro ase ogochika, ee, ogochika igoro ase ogochika; ring’ana igoro ase ring’ana, ee, ring’ana igoro ase ring’ana; aiga make, na aaria make.”
11Ekeene, Omonene nakwane nabanto aba goetera ase abanto b’ebisaku ebiao, abwo bagokwana omonwa omogeni. 12Omonene nigo atebetie abanto abwo: “Aiga naase agotimokerwa, tiga abwo barosire batimokere aiga, erinde banyore chinguru naende.” Korende abanto abwo tibaigwerete. 13Ase ayio ring’ana ri’Omonene asebare nigo rirabe iga: “Ogochika igoro ase ogochika, ee, ogochika igoro ase ogochika; ring’ana igoro ase ring’ana, ee, ring’ana igoro ase ring’ana; aiga make, na aaria make,” erinde kobagotaara babe bakogwa kenyuma‐nyuma, babutokane, babe bagotegwa na kobwatwa.
Rigena ri’ekoona ria Sayoni
14Ase ayio, inwe abachecheria aba mokogambera abanto ba Yerusalemu, igwa ring’ana ri’Omonene. 15Inwe nigo mogoteba, “Intwe twakorire okobwatana kw’ogotianania namakweri, na twabwatanire naase abakure; ekero emechando eyio emebe erache tegotoika ang’e, ekiagera twakorire oborimo bwabeire obotamero bwaito, na obong’ainereria bwabeire egekengero giaito.” 16Ase ayio Omonene Nyasae nigo agoteba iga: “Rora inche nkobeka nde rigena ri’oboroso ase Sayoni, rigena rikong’u riateemirwe, rigena ri’ekoona ri’engencho enene rire oboroso obokong’u; na onde bwensi orariegene, takorua aroro. 17Ninkore ekeene kebe ekerengo gi’okorenga, na oboronge bobe ekebiro gekorenga.
“Nindete embura y’amagena yabuse kegima oborimo bore obotamero bwaino, na emegoko ebonganie obwebiso bwaino.” 18Erio okobwatana kw’ogotianania koria mwakorete namakweri ngosarigwe, na okobwatana kwaino mwakorete naase abakure tigokogenderera kobao; ekero emechando eyio emebe erache, goika motiringerwe inse 19Buna koreng’ana emechando eyio erabe ekona‐gocha nebanyore inwe, nebe ekona‐gocha emambia ase emambia, ee, omobaso na obotuko. Nigo erabe emechando emebe y’okoondokia ase okoigwa amang’ana ayio atomirwe. 20Oborere nigo bore obweng’e omonto agosinywa kwerambora igoro ase borobwo, na ekiebisio nigo kere ekenyerere mono omonto atanyare kwebisia. 21Omonene naimoke akore buna akorete ase egetunwa gia Perasimu; nabe nendamwamu buna abete ase Rikura ria Gibeoni; nakore ogokora kwaye kore okogeni, nakore emeremo yaye ere ey’ogokumia.
22Ase ayio, bono timogenderera gochecheria, ebisibo biaino tibibaisa gokong’igwa, ekiagera naigure korwa ase Omonene, Nyasae bw’Emeganda, ogochika kw’ogosirigwa gw’ense engima, okwo gotanyare gotigwa.
Obong’aini bwa Nyasae
23Tegerera moigwe eriogi riane; igwera amang’ana aane ngokwana! 24Inee! Omonto okorema ng’a asimeke chimbusuro nigo akogenderera kona‐korema rioka? Inee! Omonto oyio nigo akogenderera kona‐koboosa rioka? 25Omonto oyio ekero akoorire koroisia riroba, Inee, tari kobusura obotu bw’ebinsari bikorokwa dili na komini; naende obusura engano ase chindwaro, na esairi aase aye, na engano ende ase chingito? 26Nyasae oye nigo akomworokereria enchera engiya y’ogokora emeremo eyio. 27Dili teri koorerwa nekeoorero gi’ekioma, gose komini teri koorwa namagoro e chigari, korende bionsi bibere nigo bigosusurerwa omote. 28Ekero omonto akoora engano, Inee, nkoyesunyunta are? Yaya, tari kogenderera koyeoora naende naende, nigo arabaise koyesenyenta namagoro ’egari ekong’uswa ne chibarasi chiaye. 29Amorokererio ayio nigo akorwa ase Omonene bw’Emeganda; ere nigo are omosemia bw’ogokumia, na obong’aini bwaye nobonene mono.
Currently Selected:
ISAYA 28: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
