ISAYA 25
25
Ogotera kw’ogotogia Nyasae
1Aye Omonene, naye Nyasae one;
ninkoimokererie igoro, nintogie erieta riao;
aye gwakorire amang’ana ’ogokumia
emeroberio yao korwa kare nigo ere ey’obwegenwa na ekeene.
2Aye gwatagoire omochie, kwayokorire obeire etui y’amagena,
omochie oyio konya ogiteire chindwaki obeire ritongo.
Gwasaririe chinyomba chinene chi’omochie bw’abamenyi,
omochie oyio tokoagachwa naende.
3Ase ayio, abanto bare ne chinguru mbagotogie,
emechie y’ebisaku ebitindi nekoiroke.
4Aye kwabeire egekengero egekong’u ase abataka,
ee, kwabeire egekengero ase abaremeire ekero bare nemechando;
kwabeire obotamero ase engaki y’embura omoubera,
na ekiriri ekero ki’omobaso omororo.
Okogosa kw’abanto abatindi nigo konga embura omoubera egotwoma enyasi,
5na buna omobaso bw’eguru‐gura.
Aye gwakiririe amariogi ’ababisa;
buna omobaso omororo ogokendigwa ne riire,
naboigo namatera ’abanto abwo abatindi arakendigwe.
Omonene okwarigania omoyega
6Aiga ase egetunwa eke Omonene bw’Emeganda naroiserie abanto b’ebisaku bionsi omoyega bw’ebinto ebinoru, omoyega bw’edivai engiya mono, ee, oyo bw’ebinto ebinoru biichire emeseto, na edivai engiya ekenonoire. 7Aiga ase egetunwa eke Omonene nasarie na korusia egietubo getubete abanto bonsi, ee, egietubo ekio keramboire igoro y’ebisaku bionsi. 8Omonene Nyasae nasirie amakweri goika kare na kare, natinyie amariga korwa ase amaiso ’abanto bonsi, nasirie ogochaywa kw’abanto baye korwa ase ense yonsi. Nabo Omonene atebire.
9Ase rituko erio mbatebe iga: “Rora, oyo nere Nyasae oito; oyo nere twakaganyire, erinde anyare gototooria. Oyo nere Omonene, twakaganyire; tiga togoke na gochenga, ekiagera otorenteire ogotooreka.”
Omonene nae Abamoabu egesusuro
10Okoboko kw’Omonene nkobeere igoro y’egetunwa eke, korende Abamoabu mbatiringerwe inse aase abo buna obonyansi obwomo bogotiringeranigwa ase engoro y’esike. 11Barabwo mbarambore amaboko abo buna omonto akorambora amaboko aye ase ogoaka entimbu, korende Omonene nasirie oboenenu bwabo amo nobong’ainereria bw’emeremo y’amaboko abo. 12Natagore emerobiri emetambe y’ogwekengera ere ase chindwaki chiabo, nayeiyerie inse kegima, ee, negwe inse ase riroba.
Currently Selected:
ISAYA 25: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
