ISAYA 24
24
Omonene nae ense egesusuro
1Naama! Omonene nasarie ense, ayetige ere bosa; nayeonchorane ayeumamie, na abanto bamenyeteo abasiarere gochia aaria na aaria. 2Amang’ana nayamo arabanyorere abanto bonsi; buna arabe ase abanto, naboigo arabe ase abakuani; buna arabe ase omosomba, naboigo arabe ase omonene oye; buna arabe ase omosomba omokungu, naboigo arabe ase omokungu ore omonene oye; buna arabe ase oyokogora, naboigo arabe ase oyokoonia; buna arabe ase oyokorua singo, naboigo arabe ase oyokoegwa singo; buna arabe ase oyogotura esira, naboigo arabe ase oyogoturwa esira. 3Ense nesarigwe kegima ebe bosa, ekiagera n’Omonene otebire ring’ana erio.
4Ense nigo ekweumia na kogenderera gosira; oboiko bwonsi bwagoyire, ngochia gosira bore, na abare abanene b’ense baereirwe chinguru. 5Ense yasarigwe nabanto bamenyeteo; barabwo basaririe amachiko, bangire koigwera emeroberio echikire, naende basaririe okobwatana kw’ogotianania gwa kare na kare. 6Ase ayio okoragererigwa nkogendererete gosiria ense; abanto bamenyeteo nigo bachandegete ase engencho y’okomocha kwabo kw’ebibe, basambirwe, na abanto abake boka batigaireo. 7Edivai enyia nigo ekobokia amagombo, na emesabibu yasusanire, na abanto bonsi barenge nomogoko bw’enkoro nigo baichanete. 8Omogoko bw’eriogi rie chinchigiri oerire, na eriogi ri’abwo bagochenga riaerire, na omogoko bw’eriogi ri’amakano oerire. 9Bono abanto tibagenderereti gotera ekero bakonywa edivai; ebinyugwa bigotindia biabeire ebiroro ase abwo bakobinywa. 10Omochie oyio obwate eburu‐buru otagoirwe; kera enyomba ereo yasiekirwe, monto onde tari ogosoa aroro. 11Okorera okonene kwaigwekanire ase chinchera, ekiagera edivai teiyo; omogoko bwonsi oerire, na omochengo bw’ense osirire. 12Omochie osarigwe kegima; ebiita biatagoirwe na konacha‐nachanwa. 13Amang’ana ayio naro arabinyore ebisaku bire ase ense; ense nebe buna ekero emezeituni ekonyegerigwa ase okoarora amatunda, na buna ogochorwa kw’amazeituni amatigari.
14Erio abanto mbaake amariogi batere nomogoko, mbaake amariogi korwa ase enyancha, batogie obonene bw’Omonene. 15Ase ayio inwe abamore moocha, motogie Omonene; abamore ase ebisinka na ase chinse chire ang’e nenyancha, togia erieta ri’Omonene, Nyasae bw’Abaisraeli. 16Korwa chinsinyo chi’ense twaigure amatera ay’ogotogia obonene bw’Oyore Omonyene Oboronge.
Korende nigo ngoteba, “Naki nachandekire! Naki nachandekire! Obobe nobwane! Abakorekanu nigo bagendererete gokorekania, ee, nigo bagendererete gokorekania mono.” 17Inwe abamomenyete ase ense, obwoba, na eirima, na omoeto, nigo bibaganyete. 18Nebe ng’a oyogotama kaigure eriogi ri’okogosa nagwe ase eirima, na oyo orasoke korwa ase eirima eyio nabwatwe nomoeto, ekiagera chitirisa chia igoro chiaigoirwe, oboroso bw’ense bwanyegerigwe. 19Ense yabwerekire, ee, yabwerekire kegima, yatandoirwe ebing’ese; ense yatengechigwe ne chinguru chintindi. 20Ense yatindire buna oyotindire amarwa; nigo ekorunda‐rundigwa buna oborunda‐rundia bw’omote. Ogosaria kwaye kwayeritoereire, negwe, tekonyara koboka naende.
21Ase engaki eyio Omonene narue egesusuro ase emeganda ere igoro, aaria igoro, narue egesusuro ase abaruoti b’ense, aiga ase ense. 22Barabwo mbasangererigwe amo buna abasibwa, babekwe ase engoro eyemo; mbasiekerwe buna abasibwa, na ekero amatuko amange aerire mbaegwe egesusuro. 23Erio omotienyi tokorua oborabu bwaye, na erioba tirikobara, ekiagera Omonene bw’Emeganda nabe okogamba ase egetunwa gia Sayoni, na ase Yerusalemu, na ase abagaaka b’aroro naorokie obonene bwaye.
Currently Selected:
ISAYA 24: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
