ISAYA 26

Nyasae nae abanto baye obobui

1Ase rituko erio ogotera oko ngoterwe ase ense y’Abayuda;

“Intwe nigo tomenyete ase omochie omokong’u.

Omonene otoeire ogotooreka kobe chindwaki ne chiburi chiaito.

2Igora ebiita bi’omochie oyio,

erinde egesaku kere noboronge na obwegenwa kenyare gosoa imeo.

3Omonto ore nebirengererio ebironge asore,

aye Omonene nigo okomoa omorembe omoikeranu,

ekiagera agosemeretie.

4Mosemerie Omonene botambe, ekiagera Omonene Nyasae nere egetare gia kare na kare.

5Ere okeeirie abanto abwo beimokereretie igoro,

otagoire omochie oria ochongororogete gochia igoro,

oyoiyeirie inse kegima,

ee, oyoiyeirie inse ase riroba.

6Amagoro ’abanto abataka nayotiringere inse,

na ay’abaremerwa nayotache.”

7Enchera y’abanyene oboronge nenteremu;

naye okoyekora yaba enteremu.

8Aye Omonene, intwe nigo tokoganyete kogocha konacha ebina biao;

okona‐koinyora erieta riao nakwo kore okogania kw’emioyo yaito.

9Omoyo one nigo ogokogania ase obotuko,

omoika ore ime yane nigo ogokorigia kobogokiamoka.

Ekero orarente ebina biao igoro ase ense,

abanto bamenyeteo nigo bakweorokereria oboronge.

10Omokori amabe naisa gwanchererigwa,

takweorokereria oboronge;

ekero are ase ense egokora oboronge nigo arakore ay’obokorekanu,

takorora obonene bw’Omonene.

11Aye Omonene kwaramboire okoboko kwao,

korende barabwo tibagokorora.

Tiga barore risemi obwate ase abanto bao, erinde basooke;

omorero osambete ababisa bao, tiga obasambe nabarabwo.

12Aye Omonene, notorentere omorembe,

ekiagera emeremo twabeire togokora, naye kwabeire gokoyetokorera.

13Aye Omonene, Nyasae oito, abanene bande babeire bagotogambera,

korende erieta riao rioka nario tomanyete.

14Barabwo bakure, tibakoba moyo naende,

babeire amarengari, tibakoboka;

ase ayio kwabaeire egesusuro na kobasiria,

kwabasiririe, tibakoinyorwa nonya ng’ake.

15Aye Omonene, gwakorire egesaku eke kementekane;

ee, gwakementekanirie;

ase ayio aye gwatogigwe,

kwagareeirie ense y’egesaku eke.

16Aye Omonene, ekero barenge nemechando nigo bakorigetie,

ekero kwabaete egesusuro,

nigo bagosabete mono.

17Aye Omonene,

nigo twabete asore buna omokungu ore morito,

okobina aibore,

ekero engaki yaye yaikire, nigo akoromwa nobororo.

18Intwe twabeire tore barito,

twabeire tokobina na kweganchorana,

korende ekero twaiborete tokaibora embeo bosa.

Titorenteti ogotooreka konde ase ense,

gose abanto tibaiboretwe ase ense.

19Abanto baino bakwete mbabe moyo naende;

emebere y’abakwete neboke.

Inwe abwo moraire ase amaroba ime,

boka, motere nomogoko!

Riime riao nigo rire eri’oborabu;

riroba ndibairanie abakwete.

Ekina na ogokorwa oboyia

20Inwe abanto baane, inchuo mosoe ase chiero chiaino mwesiekere aroro; mwebise aroro ase engaki enke, goika endamwamu eyio ebe yaetire. 21Rora, Omonene ngosoka are korwa aase aye, ae abanto bamenyete ase ense egesusuro ase engencho y’ebibe biabo. Okomocha kw’ogoiterwa kw’amanyinga ase ense nkobe maiso marore, na ense tekogenderera kobisa abanto abwo baitetwe.

Currently Selected:

ISAYA 26: EKEGUSIIBBLE

Highlight

Compare

Copy