ISAYA 23
23
Obobani igoro ya Turo na Sidoni
1Aya naro amang’ana igoro ya Turo.
Inwe abe chimeeri chia Tarisisi, rera, ekiagera Turo osarigwe, chinyomba tichiyo, gose ekiambokero. Abanto b’ense ya Kuporo babamanyirie amang’ana ayio. 2Inwe abamomenyete ase egesinka, tegerera mokire‐kiri! Abaonchoreria ba Sidoni, abwo bagotaara ne chimeeri, kare nigo baichorete ase ense yaino. 3Nigo bataarete ase chinyancha chinene, na ebitoki biaino nigo biarenge chimbusuro chia Sihori, na okwama kwe riranya ri’Orooche rwa Naili. Ninwe mwarenge abaonchoreria b’ebisaku bionsi.
4Aye Sidoni, rora obosooku; enyancha ere neburi enkong’u y’enyancha yatebire iga: “Inche tinana kobina, gose koibora, tinana korera abana abamura, gose gokinia abaiseke abekungi.”
5Ekero Abamisiri baraigwe amang’ana ayio igoro ya Turo, nigo baraichane mono.
6Inwe abamomenyete ase egesinka, amboka, mogende Tarisisi, morere! 7Inee! Oyo nomochie oria oino oichire nomogoko, omochie oyio oagachetwe ase chingaki chia kare, oyio amagoro ’abanto baye abogoretie gochia komenya ase chinse chi’aare? 8Ning’o oroberetie amang’ana aya onsi mamincha ya Turo? Omochie oyio orenge kobekera abaruoti chigutwa, na abaonchoreria baye nigo barenge abagambi, na abaoonia baye nigo basikire ase ense. 9Omonene bw’Emeganda nere oroberetie ayio ase okoiyeria inse oboenenu bw’obonene na gochaya abanene bonsi b’ense.
10Inwe abanto ba Tarisisi, menteka, moichore ase ense yaino, mobe buna amache ’orooche rwa Naili; kende tikeri kerabatange. 11Omonene oramboire okoboko kwaye igoro y’enyancha, onyegeirie amaruoti; orure ogochika igoro ya Kanani ng’a chiburi chiaye chitagorwe. 12Ere agateba, “Aye omochie o Sidoni orenge buna omoiseke omwekungi, korende bono gwakoreirwe bobe, tokonyara koba nomogoko naende. Imoka ogende Kuporo, nonya naroro tokonyara gotimoka.”
13Rigereria ense y’Abakalidayo! Abanto aba tibarenge egesaku. Abaasuri nabwo barentete ching’iti chi’orosana komenya aroro. Abwo bakaagacha chindwaki chi’okoboera, bakaonchorana chinyomba chi’obogambi chi’omochie oyio, bakayotagora okaba etui.
14Inwe abe chimeeri chia Tarisisi rera, ekiagera chiburi chiaino chiatagoirwe.
15Ase amatuko ayio omochie o Turo mbwebwe ase engaki y’emiaka emerongo etano na ebere, emiaka ereng’aine ey’obogima bw’omoruoti oyomo. Emiaka eyio emerongo etano na ebere ekoera, nebe ase Turo buna arikire ase ogotera kw’omotayayi;
16“Aye omokungu omotayayi konya kwebirwe,
imokia obokano, oetanane ase omochie bwonsi,
otere neriogi rigiya, otere amatera amange,
erio nario orainyorwe.”
17Emiaka eyio emerongo etano na ebere koyaerire, Omonene nachiche korora omochie o Turo; omochie oyio noiranere chingencho chiaye chinkoro, ochake gokora obonyaka amo namaruoti onsi are ase ense. 18Ebikonyorekana korwa ase oboonchoreria bwaye, na ebitoki bi’ogokora kwaye kw’obonyaka mbiatananwe ase Omonene, tibigosangererigwa na kogachwa. Ebio banyorire ase oboonchoreria nigo biranyorere abanto abwo bamenyete ase obosio bw’Omonene endagera eisaine, ne chianga chingiya chikobekwa.
Currently Selected:
ISAYA 23: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
