ISAYA 22
22
Obobani igoro ya Yerusalemu
1Aya naro amang’ana igoro ye Rikura ri’Amaroro. Mang’ana ki abeire inwe mwensi mwariinire gochia birama igoro? 2Aye omochie oichire neburu‐buru na okwogana, aye ore nomochengo bw’obobe, abanto bao abaitirwe tibaitiri nemioro, gose tibakweti ase esegi. 3Abagambi bao bonsi batamire bare amo, nigo babwatirwe batararaswa chinsara. Abanto bao bonsi banyoretwe nigo babwatetwe, nonya konya batamire gochia aare. 4Ase ayio inche ngateba, “Tobaisa kondigereria, ntige ndere nobororo ing’iyerie amariga; tobaisa gwechanda kondemia ase engencho y’ogosarigwa kw’omochie bw’abanto baane.” 5Omonene, Nyasae bw’Emeganda, ochorire engaki ere nobotantanu, na ogotiringerwa inse, na omoichano, na engaki eyio nigo erache igoro ye Rikura ri’Amaroro. Ase engaki eyio chindwaki nchitagorwe chigwe inse, na ebirero mbiigweke gochia ase ebitunwa.
6Abaelamu nigo babogoretie chinsara, bagacha amo nabariini chigari na abe chibarasi; na abanto ba Kiri bagasokia chinguba chiabo. 7Amakura aino are amaya mono aichoirwe ne chigari, na abariini chibarasi mbateneine ase ebiita. 8Egekengero ki’Abayuda nigo kiarusetigweo kegima.
Ase engaki eyio mokarigia ebirwanero biarenge kogachwa ase Enyomba ye Rinani. 9Erio mokanyora ng’a obotandoku bwe chindwaki chi’omochie o Daudi bwabeire obonge; inwe mogatanga amache tarua ase Ritibo ria Maate. 10Mokabara chinyomba chia Yerusalemu, na mogachitagora ase okoroisia orwaki robe orokong’u. 11Mokaagacha etangi y’amache agwo ase egati ye chindwaki chiria ibere, erinde monyore amache akorwa ase ritibo rikoro, korende timwamorigeretie Oyio okorete ayio, gose timwamorengereretie Oyio okorete omoroberio oyio agwo kare.
12Ase engaki eyio Omonene, Nyasae bw’Emeganda, nigo abatebetie ng’a morere na kobokia amagombo, na mokigite chitukia chi’emetwe yaino, na kweboyia chigunia. 13Ribaga ri’ogokora igo mokagoka na gochenga; mokanyenya chiombe ne ching’ondi, mokaba mokoria chinyama na konywa edivai, mogateba, “Tiga torie na konywa, ekiagera ankio natokwe.”
14Omonene bw’Emeganda nere onyorokirie amang’ana ayio na gontebia, “Ekeene, timokwaberwa ebibe ebio nonya ng’ake.” Omonene bw’Emeganda otebire ayio.
Sebuna ogokurerwa
15Aya naro Omonene, Nyasae bw’Emeganda, agoteba: “Inchuo ogende ase Sebuna, oyio ore omogachi na omoteneneri bw’enyomba y’obogambi, omotebie: 16Aye ninki ogokora aiga, na monto ki obwate aa? Nase ki ogwekunyera oboina aase are igoro mono? Inee! Nigo okwebaachera oboina aiga ase egetare bobe obomenyo bwao? 17Aye nonya kore omonto bwe chinguru, Naama, Omonene nakobwate bokong’u, akorute gochia aare mono. 18Nigo arakoborongose buna omopira, akorute gochia ase ense ere engare; agwo nao orakwere. Naende nao chigari chiao chi’obonene chirabe, ekiagera aye kwabeire omonto bw’obosooku ase enyomba y’omonene oo. 19Inche Omonene ninkorusie orue ase emeremo yao, naende nkoiyerie korwa aase ao.
Obobani igoro y’Eliakimu
20“Ase engaki eyio nindangerie omosomba one Eliakimu, mosinto o Hilikia, 21imobekere eganchwa yao y’obogambi, naende imoboerie orokini rwao. Nimbeke obogambi bwao ase okoboko kwaye, ere nabe ise bw’abanto ba Yerusalemu na Abayuda. 22Nimbeke ekeigorero ki’enyomba ya Daudi ase amareko aye; ere nabe okoigora, na onde tari oranyare gosieka; nabe ogosieka na onde tari oranyare koigora. 23Nimokong’ontere akong’e buna omosumari okong’onteire ase enyasi enkong’u, na ere nabe ekerogo ki’amasikani ase enyomba ya ise.
24“Abanto bonsi b’enyomba ya ise, na abana baye, ne chinderia chiabo, mbabe bakomosemeria abakonye. Ebikorero bionsi, ebisinini na ebinene, mbimosung’unane. 25Korende ase engaki eyio omosumari oria okong’onteretwe ase enyasi enkong’u nosimorwe korwao ogwe inse, ne chigurube chiasungireo nchigwe, chisamunyokane.” Nabo Omonene bw’Emeganda atebire.
Currently Selected:
ISAYA 22: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
