ISAYA 21
21
Obobani bw’okogwa kwa Babeli
1Aya naro amang’ana igoro y’erooro ere ang’e nenyancha.
Koreng’ana buna ekembugu‐mbugu gekobongia ase ense ya irianyi naboigo na obobe bokorwa ase erooro, ense eyio ekoondokia mono. 2Inche norokigwe okorora kore ogokong’u mono; abaurereria nigo bagendererete kourereria, na abasaria bagendererete gosaria.
Inwe Abaelamu, genda morwane! Inwe Abamedia, genda moboere! Ninsirie obororo bwonsi bwarentirwe n’Abababeli.
3Ase ayio chibachwa chiane chianyegerigwe, obororo bwansoire, obororo buna obw’omokungu okobina aibore; naichanire mono, tindi koigwa; nabeire nobwoba obonene, tindi korora. 4Enkoro yane nigo egotiesana, omoondoko ombwatire; engaki ya mogoroba eyio naganyete yang’onchokeire na kondetera obwoba.
5Abanto nigo bakwarigania endagera bayebeka ase emesa, babeka abarendi bakorenda, naende baria na konywa. Bono inwe abagambi, imoka, moake chinguba chiaino ebitinya.
6Amang’ana aya naro Omonene antebetie, “Genda mobeke omorendi atengere, nere oyio nabararerie abatebie amang’ana ararore. 7Omonto oyio kararore abariini chibarasi bagocha babere babere, na abariini chitigere, na abe chingamia, tiga ategerere mono, ee, ategerere buya kegima.”
8Omonto oyio ontengerete akarangeria neriogi buna eri’endo, “Aye Omonene, nigo ngotenena igoro ase egetengero omobaso boira; nigo inde ase emeremo yane ase obotuko bwonsi.
9“Bono abariini chibarasi ngocha bare babere babere.” Na omotengeri oria agaaka eriogi riaye naende, agateba, “Babeli ogure! Ogure kegima! Emegwekano yaye yonsi y’ogosasimwa yasenyentirwe na gotiringerwa inse.” 10Inwe abanto baane, aba mwaoorirwe ase ekeooreri buna obori na koirurwa, amang’ana naigure korwa ase Omonene bw’Emeganda, Nyasae bw’Abaisraeli, naro nkobarareria.
Obobani igoro ya Edomu
11Aya naro amang’ana igoro ya Edomu.#21:11 Edomu; Ekeibirania nigo kegoteba Duma, noro Edomu (Duma, engencho yaye: obotoereru) Omonto nkondangeria are korwa Seiri, okoboria, “Omorendi, mang’ana ki igoro y’obotuko? Omorendi, mang’ana ki igoro y’obotuko?”
12Omorendi nigo akoiraneria: “Emambia yachire, nonya naboigo obotuko nao bore. Onye moganetie koboria erinde momanye, boria; moirane moche naende.”
Obobani igoro y’Arabia
13Aya naro amang’ana igoro y’Abaarabu. Inwe abagendi b’ense ya Dedani, mobe mokorara ase amanani ’ense y’Arabia. 14Inwe abanto momenyete ase ense ya Tema, abwo bare nerang’o, bae amache, na abwo bagotama, bae endagera. 15Abanto abwo nigo batamire korwa ase ogoitwa nemioro, na korwa ase emeyio yasomoirwe, na korwa ase amata atingirwe, na korwa ase emechando y’esegi.
16Ase ayio Omonene ontebirie iga: “Ekero omwaka oyomo otaraera omwaka onga buna oyo bw’omorikwa, obonene bwonsi bwa Kedari mbosirigwe boere. 17Abanto chituoni b’Abakedari, abamanyete koruta chinsara, nigo baratigare abake mono. Inche Omonene, Nyasae bw’Abaisraeli, natebire amang’ana ayio.”
Currently Selected:
ISAYA 21: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
