ISAYA 19
19
Nyasae nae Abamisiri egesusuro
1Aya naro amang’ana igoro ya Misiri:
Rora, Omonene nigo ariinete riire rikominyoka bwango ogocha Misiri. Erio agwo emegwekano egosasimwa y’Abamisiri nenyegerigwe ase obosio bwaye, ne chinkoro chi’Abamisiri nigo chirairianyeke. 2“Inche Omonene ninseegete Abamisiri baitane boka abanyene; kera omonto nigo ararwane noyomwabo, na kera omoamate arwane nomoamate omwabo. Ninseegete abanto b’omochie oyomo barwane nab’omochie onde, na oboruoti borwane noboruoti bonde. 3Nindusie omoika bw’Abamisiri orue asebare, ninsarie emeroberio yabo; barabwo mbabe bakogenda korigia ogosemigwa korwa ase emegwekano egosasimwa, na korwa ase abaragori, na korwa ase abwo bakorangeria emeika y’abakure, na korwa ase abarogi. 4Nimbeke Abamisiri ase amaboko ’omonene ore omotindi; omoruoti bw’okobaondokia nabagambere.” Nabo Omonene, oyore Omonene bw’Emeganda, atebire.
5Amache ’orooche rwa Naili nakame pi, na orooche orwo ndokame kegima. 6Chindooche chigochiao nigo chiragunde chitioke, na amache ’emetaro agwo Misiri nakee aere; ebitonto na amauncho mbiome. 7Amaranya amo nemegondo ere mbarabare y’orooche rwa Naili mbiome bisareke kegima. 8Abanto bakoruba ne chindobio ase orooche rwa Naili mbarere na kobokia amagombo, na abwo bakoruta ebionga aroro mbaumate. 9Abwo bakoroisia chiusi chi’egatani, na abakoroisia ebitambaa bi’ebamba, mberusie moyo. 10Abwo bare chisiiro chi’abanto b’ense mbasenyentwe, na bonsi abarikire gokora emeremo mbaichane.
11Abagambi ba Soani nigo bare abariri kegima; na abasemia abang’aini ba Farao nigo bagosemia ay’oboriri. Naki moranyare gotebia Farao: “Intwe nabana b’abanto abang’aini, abana b’abaruoti abakoro?” 12Ng’ai abanto bao abang’aini bare? Onye bareo, tiga bagotebie na gokomanyia aya Omonene bw’Emeganda arobeirie igoro ya Misiri. 13Abagambi ba Soani babeire abariri, na aba Memifisi bang’ainirwe. Abwo bare buna amagena e chikoona ase ebisaku biabo batantanirie ense ya Misiri. 14Omonene obekire omoika bw’obotantanu ase egati y’abanto b’aroro, nabarabwo bakorire ense ya Misiri yatindire ase ogokora kwaye gwonsi, nigo ekogaragara, buna omonto otindire okwegaragaria ase amaroki aye. 15Ense ya Misiri tegosesenigwa ase ogokora konde gwonsi, kobe ogokora kw’omotwe gose ogw’ekemincha, okw’orosagia rw’omokendo gose orw’egetonto.
Abamisiri mbasasime Omonene
16Ase engaki eyio Abamisiri mbabe buna abakungu, baiguswe bare nobwoba ase obosio bw’Omonene bw’Emeganda, ekero ararambore okoboko kwaye agosungusie igoro yabo. 17Abamisiri mbabe bakoiroka abanto b’ense y’Abayuda; ekero Omomisiri araigwe ense y’Abayuda egwatorwa nabe nobwoba obonene, ekiagera Omonene bw’Emeganda okorire omoroberio ore mamincha y’Abamisiri.
18Ase engaki eyio abanto b’emechie etano y’ense ya Misiri mbabe bagokwana omonwa bw’Abakanani, naende babe bakobwatana n’Omonene bw’Emeganda na gotiana ase erieta riaye. Oyomo bw’emechie eyio nigo orarokwe Omochie bw’Erioba.#19:18 Omochie bw’Erioba noro Heliopolis
19Ase engaki eyio egesasimero nkeagacherwe Omonene agwo ase egatigati ya Misiri, boigo rigena rire buna esiiro nditenenerigwe Omonene agwo ase ribebe ri’ense eyio. 20Ebinto ebio mbibe ekemanyererio na kirori ase Omonene bw’Emeganda, agwo ase ense ya Misiri. Ekero abanto ba Misiri barabe bakorera ase Omonene kobagokorerwa bobe, ere nabatomere omotooria abarwanerere abatoorie. 21Omonene nemanyekanie ase Abamisiri; na Abamisiri mbabe bakomomanya Omonene ase amatuko ayio. Mbabe bakomosasima na komoruera ebing’wanso bi’ogosambwa, na okoruegwa kw’endagera, naende mbabe bakoriera Omonene chiira na gochiikerania. 22Omonene naake ense ya Misiri, nayeake na koyegwenia, na abanto b’aroro mbamoiranere Omonene, ere naigwe ogosaba kwabo abagwenie.
23Ase engaki eyio enchera enene nebeo ekorwa Misiri goika Asuri. Abaasuri mbabe bakogenda Misiri, na Abamisiri babe bakogenda Asuri; Abamisiri na Abaasuri mbabe bagosasimera amo.
24Ase engaki eyio Abaisraeli mbabwatane n’Abamisiri na Abaasuri, na ebisaku ebio bitato mbibe ogosesenigwa ase ense engima, 25ekiagera Omonene bw’Emeganda nabasesenie, atebe: “Imosesenirie inwe Abamisiri, abamore abanto baane, nainwe Abaasuri, abamore emeremo y’amaboko aane, nainwe Abaisraeli, abamore omwando one.”
Currently Selected:
ISAYA 19: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
