ISAYA 13
13
Nyasae nae Babeli egesusuro
1Aya naro amang’ana Isaya, mosinto bw’Amosi, aroche igoro ya Babeli:
2Tenenia ebendera igoro ase egetunwa getari na mete; aka eriogi rinene ase abarwani esegi, basime namaboko basoe ase ebiita bi’abanto abasike. 3Inche omonyene nachikire aba neatananeire koba abachenu, narangeirie abanto baane bare chituoni baikeranie aya nachikire ase endamwamu yane. Abanto abwo bagokerete obobui bwane.
4Tegerera moigwe amariogi ’emeganda y’abanto bakwoga igoro ase ebitunwa! Tegerera moigwe amariogi ay’okomumura kw’amaruoti ’ebisaku asangererekanire amo. Omonene bw’Emeganda nkoroberia are emeganda y’esegi. 5Omonene ngocha are amo nebirwanero bi’endamwamu yaye korwa ense y’aare, ase chinsinyo chia igoro, erinde asirie ense yonsi.
6Inwe rera nobororo, ekiagera rituko ri’Omonene riabereire ang’e; nigo rirachiche buna ogosiria gokorwa ase Omonene Omobui. 7Ase ayio, amaboko ’abanto bonsi nigo araborwe chinguru, ne chinkoro chiabo chirianyeke ase obwoba. 8Abanto mbabe nobwoba obonene; inababe nomoichano na obororo. Ee, mbabe nobororo buna obw’omokungu okobina agonkie, mbarigereranie bare nogokumia na omoichano na amaiso abo amwame ti. 9Rora, rituko ri’Omonene ngocha rire; nigo rire ritindi ri’ekeririanda na endamwamu egwoka, ndisarie ense ebe bosa na gosiria kegima abanyabibe bamenyeteo. 10Ching’enang’eni chire igoro, na ebiombe biamwabo, tichikorua oborabu bwabo; erioba naribe omosunte ekero rigosoka mambia, na omotienyi tokobara.
11Inche Omonene ning’ee ense egesusuro ase engencho y’obobe bwaye, na abanyabibe ase engencho y’ogosaria kwabo. Ninsirie obomwenu bw’abwo bare abatindi, ninkeyie oboenenu bw’abaichire nobochege. 12Ninkore omobaro o mwanyabanto obe omoke kobua oyo bw’etahabu echenire, ee, omobaro obo nobe omoke kobua oyo bw’etahabu ekorwa Ofiri. 13Ase rituko ri’ekeririanda kiane inche Omonene bw’Emeganda nintengechie igoro chionsi na inyegerie ense erue aase aye goetera ase endamwamu yane egwoka.
14Kera omonto nabe buna engabi egoserigwa, na buna ching’ondi chitari nomorisia; kera oyomo nairane ase abanto baye, na kera oyomo natame gochia ase ense yaye. 15Onde bwensi oranyorwe, nabetwe ritimo, na onde bwensi orabwatwe, naitwe nomoro. 16Abana babo ebing’werere mbasenyentwe ase amasio ’abaibori babo, chinyomba chiabo nchisakorwe, na abakungu babo mbakorerwe ay’obosooku.
17Rora, inche Omonene ninseegete Abamedi abwo batabare chifeta ne chitahabu koba nengencho enene. 18Barabwo mbaite abamura b’abwo ase okobabeta chinsara, tibakororera abana bare inda, gose abana bande, amabera. 19Babeli oyio ore obonene bw’amaruoti, na obwari na obonene bw’Abakalidayo, nobe buna Sodomu na Gomora, ekero Nyasae konya ayosaririe. 20Babeli tokomenywa nonya ng’ake nebiaare binde bionsi, nonya n’Omoarabu tagotenenia eema yaye agwo, gose abarisia tibakorenta ching’ondi ne chimbori chitimokereo. 21Ching’iti chi’orosana nchimenyeo, ne chinyakweumia nchiichore ase chinyomba chireo, chisagero nchibe chimenyeteo, na amarengari nabe akona‐gotenga aroro. 22Chinyang’au nchibe chikwamuma ase emerobiri yabo, ne chisese chi’orosana nchibe chikorera ase chinyomba chiabo chi’obonene. Engaki yaye yaikire ang’e; amatuko aye tagotambeeigwa.
Currently Selected:
ISAYA 13: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
