ISAYA 14
14
Abaisraeli bakoirana korwa ase obosomba
1Omonene narorere ororeria rwa Yakobo amabera, nachore Abaisraeli abwo naende, abarente bamenye ase ense yabo. Abanto abaao mbabwatane nab’ororeria rwa Yakobo, bamenye amo nabarabwo. 2Ebisaku binde mbikonye Abaisraeli koirana ase ense yabo, na Abaisraeli mbabakore babe abasomba babo, abasacha na abakungu, mbabe bakobakorera agwo ase ense y’Omonene. Abaisraeli mboose abwo baboosete kare, na bagambere abwo barenge kobakorera bobe.
Omoruoti o Babeli ore aase abakure
3Nebe ekero Omonene abaeire ogotimoka korwa ase emechando yaino, na obokong’u, na emeremo emekong’u mwarenge gokorigwa, 4erio mokwane amang’ana aya y’ogochecheria omoruoti o Babeli, motebe: “Naki omochandi oria akirigwe! Obotindi bw’ogochandwa gwaito bwaerire! 5Omonene obunire enyimbo y’abakori amabe, enyimbo eyio y’abagambi, 6abwo baagete abanto nendamwamu, na bakaba bakobaaka batari gotiga. Nigo bagamberete ebisaku nendamwamu, bakaba bakobichanda batari namabera. 7Bono ense engima nigo etimogete na gotoerera. Abanto bagokire na gotera. 8Nonya nemetarakwa nigo egokerete okobugwa kwao, na emecharake ya Lebanoni nigo egoteba: Gese gwakaiyeretigwe inse, omotemi emete onde tana gotochera.
9“Aase abakure abeire nomoegaego gocha gokorotota ekero okogenda aroro; emerengari y’abakure yaturirwe ase engencho yao, ee, abwo bonsi barenge abatang’ani b’ense. Abwo bonsi barenge abaruoti b’ebisaku batenenigwe barue ase ebirogo biabo. 10Abwo bonsi mbakwane, bagotebie: Bono naye kwaurirwe chinguru buna intwe, gwatogwekanire. 11Obonene bwao amo namariogi ’amakano ao biarentirwe aiga aase abakure; ebinyegera nabio ekerarero kiao na amakonde naro ekiebisio kiao.
12“Aye eng’enang’eni ya mambia, omwana bw’ogokiamoka, naki kwagure korwa igoro! Aye oria kwaiyeretie ebisaku, naki gwatugutetwe gocha inse? 13Nigo gwatebete ase enkoro yao ime: Inche nintiire gochia igoro aaria, ngende ng’etanie ching’enang’eni chia Nyasae, nimbeke ekerogo kiane ki’obonene aaria igoro. Ning’ikaranse ase egetunwa ki’omosangererekano aaria sugusu aare. 14Nintiire ngende ng’etanie amare are igoro mono, ninyekore imbe buna Oyore Igoro Mono. 15Korende bono aye kwairirwe gochia aase abakure ase engoro entambe.
16“Abanto abwo barakorore mbakorigererie baasamie emenwa yabo bakumie, mbabe bakorengereria igoro yao, batebe: Inee! Omonto oyo nere oria otengechetie ense, oria onyegeretie amaruoti? 17Nere oyio osaretie ense ekaba erooro, naende akaonchorana emechie y’ense, oria otarenge gosibora abasibwa baye bagende ase chinka chiabo?
18“Abaruoti bonsi b’ebisaku nigo baraire nobonene bwabo, kera oyomo ase embeera yaye, 19korende aye totindekiri; nigo otugutire buna orosagia rotanchiri. Nigo oraire ase egati y’abanto baitetwe nemioro, bagatugutwa ase chingoro chi’amagena buna ebitondo bigotachwa namagoro. 20Aye togotindekwa buna abaruoti bande, ekiagera gwasaririe ense yao, naende gwaitire abanto bao. Ororeria rw’abakori amabe tirogwatorwa nonya ng’ake. 21Beka abanto ang’e, baite abamura b’omoruoti oyio; abana abwo nigo baraitwe ase engencho y’okomocha gwa chisokoro chiabo, tibabaisa koimokerera igoro baire ense na koyeichoria nemechie.”
Nyasae nasarie Babeli
22Omonene bw’Emeganda nigo agoteba iga: “Nimbaimokere, nsarie Babeli kegima, ninsirie erieta riaye na abatigari bare aroro. Tingotiga abana aroro gose abachokoro. Inche Omonene bw’Emeganda natebire ayio. 23Ninkore Babeli obe obomenyo bw’ebirongo, naende obe ne chitente chi’amache. Ninyoabusere ekiabuso ki’ogosiria. Inche Omonene bw’Emeganda natebire ayio.”
Nyasae nasirie Abaasuri
24Omonene bw’Emeganda otianire, ogoteba, “Ekeene, buna narobeirie, nabo arabe, na buna nachikire, goika aikerane. 25Ninsenyente Abaasuri aiga ase ense yane, nimbatiringere inse agwo ase ebitunwa biane. Ase enchera eyio amakorogoto abo narusigwe ase amagoti ’Abaisraeli, ne chigurube chiabo chirusigwe ase amareko abo.” 26Aya naro achikirwe igoro y’ense yonsi, na oko nakwo okoboko koramboire igoro ase abanto b’ebisaku bionsi. 27Omonene bw’Emeganda ochikire gokora amang’ana ayio, ning’o oranyare koyatanga taba? Oramboire okoboko kwaye, ning’o oranyare gokoringa?
Nyasae nasirie Abafilisti
28Ase omwaka oria Ahasi omoruoti akwete, amang’ana aya naro araretigwe:
29Inwe Abafilisti mwensi, timobaisa kogoka ng’a enyimbo eria yabaagete yabunirwe; korwa ase ritina ri’eng’iti eria ende ere nobosongo obotindi nesoke, na korwa ase eyio enchoka ekoiruruka netuboke. 30Abare abataka mono mbaragerigwe, na abaremeire bamenye nobotoereru. Korende abare ritina riaino mbaite nenchara, na abatigari baino nimbaite.
31Aye egeita, eumie! Aye omochie, rera! Inwe Abafilisti mwensi, ichana ase obwoba! Erioki nkorwa rire sugusu, na ase egati yabo onde tari oranyorwe.
32Mang’ana ki omonto arabairanerie abatomwa b’egesaku keria? Obairanerie ng’a Omonene obekire oboroso bwa Sayoni, na abanto baye abachandire mbanyore obotamero aroro.
Currently Selected:
ISAYA 14: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
