ISAYA 10
10
1Obobe nobwabo abwo bakobeka amachiko atari aya boronge, na abariki abakona‐korika amang’ana ay’ogokorera abande bobe. 2Barabwo nigo bakoonchorana ebina bi’abaremeire na koura abataka b’abanto baane oboronge bwabo, erinde ababoraka babe ebisakorwa biabo, ne chintakana chiaurererigwa. 3Ngento ki morakore ase rituko riria egesusuro kegocha? Ninki morakore ekero ekembugu‐mbugu kerache korwa aare? Ning’o moratamere abakonye? Ning’o moratigere obotenenku bwaino? 4Kende tikegotigara otatiga moragwe inse, mweringanie ase egati y’abasibwa, gose mogwe ase egati y’ebitondo. Nonya ayio are bo, Omonene taratiga endamwamu yaye; nigo agendererete korambora okoboko kwaye kobaa egesusuro.
Omoruoti bw’Abaasuri ore egekorero kia Nyasae
5“Obobe nobw’Abaasuri, abwo bare enyimbo y’endamwamu yane; okogechigwa kwane nigo kore enungu ase amaboko abo. 6Nimbatome gochia korwania egesaku ekio giasaririe ase Nyasae, ee, nimbachike bagende korwania abanto abwo nabeire nendamwamu asebare, mbasakore ebinto bi’abanto abwo bibe ebiabo, naende mbabatiringere inse buna esike ere ase chinchera.
7“Korende omoruoti bw’Abaasuri takagerete ayio, gose tayarengereretie. Ere nigo aganetie goita na gosiria ebisaku ebinge. 8Ere nigo agoteba iga: Inee! Abachiki baane bonsi tibari abaruoti? 9Inee! Omochie o Kalino tobuetwe buna Kari‐Kemisi, na Hamati buna Aripadi, na Samaria buna Damesiki? 10Onye okoboko kwane kwaigete ase amaruoti arenge gosasima emegwekano, emegwekano eyio yabombire yarenge emenene kobua eya Yerusalemu na Samaria. 11Inee, tingokora ase Yerusalemu, na ase emegwekano yaye egosasimwa, buna nakorete ase Samaria na ase emegwekano yaye?”
12Ekero Omonene arabe okoorire gokora emeremo yaye yonsi ase Egetunwa gia Sayoni, na ase Yerusalemu, nae omoruoti bw’Abaasuri egesusuro ase engencho y’ogwetogia kwaye, na oboenenu bw’okweimokereria igoro.
13Omoruoti oyio nigo agoteba: “Ase chinguru chi’amaboko aane nakorire ayio, boigo nase obong’aini bwane, ekiagera nimbwate okomanya. Nasukirie chimbebe chi’abanto na kobaura chinibo chiabo, na ase chinguru chiane chire buna echi’eeri nabeire nkoiyeria abagambi korwa ase ebirogo biabo. 14Okoboko kwane nigo kwairete chinibo chi’abanto buna ebiswa bie chinyoni bikoirwa. Nigo nkobongania ense yonsi buna amagena e chinyoni atigirwe akobonganigwa; onde tanyegeretie orobaba rwaye, gose komaanora omonwa oye, gose kwemunyia.”
15Inee! Egesire nkenyare gwetogia igoro y’oyio okogekorera emeremo? Gose omosumeno mbwekore koba nengencho enene kobua oyio okonacha noro? Aise koba bo, nanga nigo are gotebwa ng’a enyimbo nebogorie oyio oyebogoretie, gose egete nkebogorie oyio otari omote.
16Ase ayio Omonene, oyore Omonene bw’Emeganda, natome oborwaire bw’okoreeyia abanto abanoru, na obonene bw’omoruoti oyio botongigwe boyie buna omorero. 17Oborabu bw’Abaisraeli mboonchoke bobe omorero, na oyore Omochenu obo nabe ekebemberi ki’omorero. Omorero oyio nosambe na gosiria amagwa na amageri ase rituko erimo. 18Buna koreng’ana oborwaire bokoria omobere bw’omonto bwayokoora, naboigo obonene bwe rinani ri’Abaisraeli amo nemegondo yabo ekwama birasirigwe kegima. Omonene nigo arasirie omoyo amo nomobere. 19Emete ye rinani riaye eratigare, nigo erabe emeke mono, eyio nonya nomwana aranyare kobara na koyerika.
Abanto bande bake mbairane
20Nebe ase amatuko ayio abatigari b’Abaisraeli na abwo b’ororeria rwa Yakobo baratooreke, tibakogenderera kweegeka ase egesaku ekio kiabaagete, korende ase obwegenwa nigo bareegeke ase Omonene, oyore Omochenu bw’Abaisraeli. 21Abatigari, abwo bare b’ororeria rwa Yakobo, mbamoiranere Nyasae Omobui. 22Nonya Abaisraeli bare abange buna omokenye ore nyancha, abatigari boka nabwo barairane. Ogosirigwa gwachikirwe ogokong’u nigo korache buna eooro kore noboronge. 23Omonene oyore Omonene bw’Emeganda, narente ogosirigwa ase ense yonsi, buna achikire.
Omonene nae Abaasuri egesusuro
24Ase ayio, aya naro Omonene, oyore Omonene bw’Emeganda, agoteba: “Inwe abanto baane momenyete Sayoni, timoiroka Abaasuri nonya bakobaaka nenyimbo na koyeimokereria igoro, buna Abamisiri bakorete. 25Engaki enke yatigaire, endamwamu yane asemore eere, erio eonchoke gosiria Abaasuri. 26Inche Omonene bw’Emeganda ninyimokererie omocharichi one igoro, ng’wanie barabwo, buna nang’wanetie Abamidiani agwo ase egetare ki’Orebu. Ninyimokererie enyimbo yaane igoro y’enyancha, buna nakorete igoro y’Abamisiri. 27Ase engaki eyio chigurube Abaasuri babegete ase amareko aino nchirusigweo, na amakorogoto babegete ase amagoti aino nabunwe ase obonetu bwaino.”
Ababisa bagocha korwana
28Ababisa bachire Ayati, baetire ase egati ya Migironi; babekire ebinto biabo Mikimasi. 29Baeteire ase ekiambokero, batoorire agwo Geba babeere aroro ase obotuko obwo; abanto ba Rama babeire nobwoba, na aba Gibea, omochie o Saulo, batamire. 30Inwe abanto ba Galimu, rera neriogi rinene! Inwe aba Laisa, tegerera moigwe! Obee! Inwe ab’Anatoti abaremerwa! 31Abanto ba Madimena nigo bagendererete gotama, na abamenyete Gebimu ngotama bare ase ogwetooria. 32Rituko erio ababisa mbabeere agwo Nobu, barambore amaboko abo na koyasungusia igoro y’egetunwa ki’abanto ba Sayoni, ekio kere egetunwa kia Yerusalemu.
33Rora, Omonene, oyore Omonene bw’Emeganda, nabutore chinsagia ne chinguru chi’okwoboyia; emete ere emetambe mono negechwe egwe inse, na eyechongororogete gochia igoro nekumbwe gochia inse. 34Naimokie egesire agechere emete ye rinani rire rinoru, na Lebanoni amo nemete ereo neiyerigwe inse ne chinguru chi’Oyore Omobui.
Currently Selected:
ISAYA 10: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
