ISAYA 9
9
Eira y’omoruoti bw’omorembe oyio ogochia koiborwa
1Omosunte tokogenderera koba ase ogochandeka kore bono. Amatuko a kare Omonene nigo atigete ense ya Sabuloni, na eya Nafutali, na chirochio chigachaywa, korende ase amatuko agochi‐gocha narente obonene bw’ogosikwa ase ense ere ang’e nenchera ekogenda ase enyancha, ng’umbu ya Yorodan, nero Galili, ense y’abanto b’ebisaku.
2Abanto abwo barenge gotaara ase omosunte,
bono barorire omobaso omonene;
abwo bamenyete ase ense y’ekiriri ki’amakweri
omobaso obabareire.
3Aye Omonene gwasesenirie egesaku, na kerokio kiabuchire,
kwarure omogoko, na oro obeire omonge;
abanto abwo nigo bare nomochengo ase obosio bwao,
buna abanto bakoba nomochengo ase engaki ye rigesa,
na buna bakogoka ekero bagwatanana ebisakorwa.
4Aye kwabunire rikorogoto riarenge ririto asebare,
kwabunire enyimbo eria yarenge goaka amareko abo,
enyimbo eyio yarenge ey’abachandi babo,
buna gwakorete ase engaki y’Abamidiani.
5Ebikoroto bi’abarwani esegi bagotitiria ase esegi,
ne chianga chionsi chiaakirwe amanyinga,
ebio bionsi mbisambwe nomorero.
6Omwana oiboirwe ase engencho yaito,
intwe twaeirwe omwana omomura;
obogambi mbobe ase amareko aye,
ere nigo ararokwe:
“Omosemia bw’Ogokumia, Nyasae bw’Okobua,
Tata o Kare na Kare, Omogambi bw’Omorembe.”
7Obogambi bwaye nigo borabe obonene,
na omorembe oye tokoba nomoerio
igoro ase ekerogo ki’obonene gia Daudi na ase oboruoti bwaye.
Obwo nigo borakong’igwe ase ekeene na oboronge,
korwa bono na goika kare na kare.
Risemi ri’Omonene bw’Emeganda ndikore amang’ana ayio.
Omonene nae Abaisraeli egesusuro
8Omonene otomire ring’ana kogambia ororeria rwa Yakobo, narirorio ndibaikere Abaisraeli. 9Abanto bonsi mbarimanye, nonya nabamenyete ase ense y’Abaefraimu, na ey’Abasamaria, abwo bagokwana noboenenu na obomwenu bwe chinkoro, bateba, 10“Amaagacho ’amatabori agure inse, korende nigo torayaagache namagena abaachire. Emeko yagechirwe, korende ntosimeke emecharake ribaga ri’eyio.”
11Omonene oseegetire na korenta ababisa ba Resini bache kobarwania. 12Abasiiria bamenyete moocha, na Abafilisti bamenyete bosongo, baasamirie emenwa yabo bamere Abaisraeli. Nonya ayio are bo, Omonene taratiga endamwamu yaye; nigo agendererete korambora okoboko kwaye kobaa egesusuro.
13Abanto tibamoiranerete oria obaete egesusuro, gose tibamorigetie Omonene bw’Emeganda. 14Ase ayio ase rituko erimo rioka Omonene nanache omotwe bw’Abaisraeli na ekemincha, boigo nanache orosagia rw’omokendo na esaka. 15Omogaaka bw’amasikani nere omotwe, na omobani okworokereria oborimo nere ekemincha. 16Abwo bakoraa abanto aba mbabasirie, na abwo bakoraagwa nabanto abwo mbasirigwe. 17Ase ayio Omonene tari nomogoko ase abasae babo, na tari namabera ase chintakana na ababoraka babo, ekiagera kera omonto nomosaria ase Nyasae, na omokori amabe, na kera oyomo nigo agokwana ay’oboriri. Ase engencho y’ayio onsi Omonene taratiga endamwamu yaye; nigo agendererete korambora okoboko kwaye kobaa egesusuro.
18Obobe nigo bogosamba buna omorero; noro nigo ogosamba amageri na amagwa, nigo ogosamba rinani rinoru, riaerera ase erioki richongororogete gochia igoro. 19Endamwamu y’Omonene bw’Emeganda yasambire ense; abanto nigo banga buna chinko chigwokia omorero, na monto onde takororera oyomwabo amabera. 20Abanto abwo nigo bakona‐gotaboria ebinto ase ensemo ya borio, korende nigo bagendererete koba nenchara; nigo bakwenyorera ebinto korwa ase ensemo ya bomosi, korende tibari koigota. Kera oyomo nigo akoria chinyama chi’omobere bw’oyomwabo.#9:20 Omobere bw’oyomwabo; Ekeibirania nigo kegoteba “okoboko kwaye” 21Abanto ba Manase mbarie aba Efraimu, na aba Efraimu mbarie aba Manase, na abwo amo mbaonchokere Abayuda. Ase engencho y’ayio Omonene taratiga endamwamu yaye; nigo agendererete korambora okoboko kwaye kobaa egesusuro.
Currently Selected:
ISAYA 9: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
