ABAIBIRANIA 2

Ogotooreka okonene

1Ase ayio, netogwenerete gotegerera mono kobua na kobwata ayatwaigure, titocha gosira. 2Naki onye ring’ana riria riakwanetwe nabamalaika nigo riarenge riteneine bokong’u, na kera okomocha na ogotaigwera mbianyorete ogoakanwa kwa boronge, 3Inee, naki intwe toranyare gwetooria onye twangire ogotooreka okonene buna oko? Ritang’ani Omonene nararetie ogotooreka oko, naende baria bamoigwete batobereire kirori. 4Naende Nyasae akamenta oborori bwaye nebimanyererio, na amakumia, na ebikone bie chinguru ao ao amo na kogabera abanto ebiegwa bi’Omoika Omochenu koreng’ana nogwancha kwaye.

Omochaki bw’ogotooreka

5Naki tari inse y’abamalaika Nyasae abegete ense eria egochi‐gocha, eyio togokwana. 6Korende aase gete omonto oyomo naorogetie oborori, agateba,

“Omonto inki aisaine aye ogendererete komorengereria?

Mwanyabanto inki aisaine aye okomorenda?

7Kwamokorire omoke kobua abamalaika ase ekero egeke,

kwamobekeire egutwa y’obonene na amasikani.

[Kwamobekire igoro ase emeremo y’amaboko ao.]

8Kwabekire ebinto bionsi inse y’amagoro aye.”

Naki ase okobeka ebinto bionsi inse yaye tatigete gento kende atabegete inse yaye. Korende goika bono titorarora ebinto bionsi bibekire inse yaye. 9Korende twarorire ere, oyokorirwe koba omoke kobua abamalaika ase ekero egeke, nere Yeso, obekeirwe egutwa y’obonene na amasikani ase engencho y’ogochandwa kwaye kw’amakweri, erio ase obuya bwa Nyasae aigwe amakweri ribaga ria kera omonto.

10Naki ase engencho ya Nyasae, na ase okobua kwaye, ebinto bionsi mbireo. Ase ayio yamogwenerete ere goikerania Omochaki bw’ogotooreka gwaito goetera ase emechando, erio aire abana abange ase obonene. 11Naki ere oyogochena amo nabwo bagochenwa nigo bakorwa ase oyomo. Ase ayio, takorora obosooku kobaroka abamwabo, 12akabora,

“Nindarie erieta riao ase abaminto,

ase egati y’omosangererekano ningotogie ase ogotera.”

13Naende nigo agoteba,

“Nimosemerie.”

Naende,

“Rora, inche nao inde aiga amo nabana baria naetwe na Nyasae.”

14Ase ayio, ekiagera abana babwataine ase amanyinga ne chinyama, Yeso naboigo abwataine nayio ayio, erio ase enchera y’amakweri asirie ere oyore nokobua igoro y’amakweri, engencho yaye Saitani, 15naende asibore abwo bonsi barenge abasomba ase obogima bwabo bwonsi, ekiagera bairogete amakweri. 16Naki ayio namaene, ere tagwechandera abamalaika, korende nigo agwechandera oroiboro rwa Ibrahimu. 17Ase ayio, yamogwenerete agwekanigwe nabamwabo ase amang’ana onsi, erinde anyare koba Omokuani omonene, Omonyene amabera, na omwegenwa ase ogokorera Nyasae, na koba ekeng’wanso gi’okobwatania ase ebibe bia mwanyabanto. 18Ekiagera ere omonyene achandetwe na goteemwa, nanyare gokonya abwo bagoteemwa.

Currently Selected:

ABAIBIRANIA 2: EKEGUSIIBBLE

Highlight

Copy

Compare