ABAIBIRANIA 1
1
Nyasae okwanire goetera ase Omwana oye
1Ase ebiro ebinge ne chinchera chinyinge Nyasae agwo kare nigo arenge gokwana ne chisokoro chiaito goetera ase ababani, 2korende ase amatuko aya ay’omoerio okwanire naintwe goetera ase Omwana oye. Ere oyo Nyasae aragete koba omonyamwando bw’ebinto bionsi, na goetera asare agatonga ense. 3Ere nigo agotobareria obonene bwa Nyasae, na buna Nyasae are, nere naboigo are, naende nigo akobogoria ebinto bionsi ne ring’ana riaye ri’okobua. Gaikire gokora ogosibigwa kw’ebibe, agaikaransa ensemo y’okoboko gw’okorio kw’Obonene igoro.
Omwana nomonene kobua abamalaika
4Agakoreka koba omonene kobua abamalaika, buna erieta eri anyorete ri’omwando rire rinene kobua ayabo. 5Inee! Momalaika ki otebetigwe na Nyasae kero kende gionsi,
“Aye, naye Omwana one,
rero nakoiboire”?
Gose naende,
“Inche nimbe asare ise,
nere asende nabe omwana one”?
6Naende ekero arentete omoiborwa oye bwe ritang’ani ase ense nigo atebete,
“Abamalaika bonsi ba Nyasae bamosasime.”
7Igoro y’abamalaika nigo agoteba,
“Ere ogokora abamalaika baye koba chimbeo,
na abasomba baye koba ebibemberi b’omorero.”
8Korende igoro y’Omwana nigo agoteba,
“Nyasae, ekerogo kiao ki’obogambi nkegenderere kobao kare na kare,
na enyimbo y’okobua y’oboruoti bwao nigo ere ey’oboronge.
9Nigo bwanchete oboronge, na kogechete ogosaria;
ase ayio, Nyasae, oyore Nyasae oo, ogoakire amaguta,
korenteire omogoko kobua oyo bw’abande bamino.”
10Naende,
“Naye Omonene, kwabegete oboroso bw’ense korwa omochakano,
na igoro chionsi nemeremo y’amaboko ao.
11Ebio inabisire, korende aye nigo oragenderere kobao,
birobio inabigote buna eanga,
12nobiringe buna egetambaa gi’okwambara, na birobio nabionchoke buna eanga.
Korende aye naye oria oria ore buna kwarenge,
na emiaka yao tekoba nomoerio.”
13Inee! Momalaika ki otebetigwe nere kero kende gionsi,
“Ikaransa ensemo y’okoboko kwane gw’okorio,
goika mbabeke ababisa bao babe inse y’amagoro ao”?
14Inee! Abamalaika bonsi tibari emeika y’ogokorera, batomire gokorera baria barache konyora omwando bw’ogotooreka?
Currently Selected:
ABAIBIRANIA 1: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
