ABAIBIRANIA 13

Obokoreri obokomogwenera Nyasae

1Mogenderere nobwanchani inwe ase inwe. 2Timweba koroisia abageni, naki ase enchera eye abande mbaroisetie abamalaika, batamanyete. 3Inyora abwo basibire ase echela, buna nainwe mosibire amo nabarabwo, naende barabwo mbakoreretwe bobe, ekiagera naboigo nainwe more nomobere. 4Okonyuomana gosikwe nabanto bonsi, na ebirarero bibe bitari nobosooku, naki abanyaka na abatomani Nyasae nabagambie ekina. 5Timoba abanchi chibesa, moisaneke nebi more nabio, ekiagera ere omonyene otebire, “Tinkogotiga nonya ng’ake, gose tingokoremera.” 6Ase ayio, ntonyare goteba noboremu,

“Omonene nere omokonyi one, tinkwoboa.

Mwanyabanto, inki arankorere?”

7Inyora abwo baare kobatang’ana, ababatebetie ring’ana ria Nyasae. Naende morengererie mono omoerio bw’obogima bwabo, mobe abegi b’okwegena kwabo. 8Yeso Kristo buna arenge igoro, na buna are rero, nabo arabe goika kare na kare. 9Timoirwa bogeka namorokererio ao ao, ayare ay’ekegeni, ekiagera mbuya chinkoro chibekwe chinguru ase obuya, gose tari ase emeroberio y’okoria endagera ase eyio barabwo bagendererete neyio tibanyora gokonywa konde. 10Ntore negesasimero aase baria bagokorera Eema batari ne ribaga koria ebinto bikoruegwa aroro. 11Naki emebere ye ching’iti chiria amanyinga abo are korentwa ime Aase Aachenu nomokuani omonene ase engencho y’ebibe, nigo yare gosamberwa isiko y’omochie. 12Ase ayio, Yeso nere agachanderwa isiko y’egeita, erinde achene abanto namanyinga aye ere omonyene. 13Ase ayio, togende asare isiko y’omochie, tobwatane nere ase okoramwa kwaye, 14ekiagera aiga titori nomochie oragenderere, korende nigo tokorigia oria orache gocha. 15Gaki, goetera asare togenderere koa Nyasae ekeng’wanso gi’okomotogia, engencho yaye okwama kw’emenwa yaito eyekoorokia erieta riaye. 16Timweba gokora amaya, na gosanga nabande, naki ebing’wanso binga buna ebi nabio bikomogwenera Nyasae.

17Moigwere abwo bakobatang’ana, na mobasike, ekiagera barabwo nigo barendete emioyo yaino buna abanto barache korua omobaro, erinde banyare gokora ayio ase omogoko. Onye bagocha koyakora ase okweumia anga taba na gokonywa konde asemore.

18Tosabere, naki ntore nobomaene ng’a chinkoro chiaito tichigotogambia, ntorigetie koba norogendo oruya ase amang’ana onsi. 19Na inche nabasoroire mono kobua gokora ayio, erinde ng’iranigwe asemore bwango.

Ogosesenigwa na ogokwania kw’ogokoorera

20Bono Nyasae bw’omorembe oyomorentete naende korwa ase amakweri Omonene oito Yeso, oyore omorisia omonene bwe ching’ondi goetera ase amanyinga ’okobwatana gwa kare na kare, 21ere abakore mobe abaikeranu ase kera ogokora okuya, monyare gokora obwanchani bwaye, naende akore ime yaino ayagwenerete ase obosio bwaye goetera ase Yeso Kristo. Asare ere obonene bwa kare na kare. Amina.

22Abaminto, nababoririe, moremererie ring’ana eri ri’ogosorora, ekiagera nabarikeire ase amang’ana amake. 23Manya ng’a oyominto Timotheo oikire gosiborwa. Amo nere ntoche kobarora karache bwango. 24Nkwanerie abwo bonsi bakobatang’ana, na abachenu bonsi. Abwo baruete Italia babakwanirie. 25Obuya bobe amo nainwe mwensi. Amina.

Currently Selected:

ABAIBIRANIA 13: EKEGUSIIBBLE

Highlight

Copy

Compare