ABAIBIRANIA 12

Okogambera kw’Omonene

1Ase ayio, ekiagera intwe tore nabarori abange buna igo, batoetanaine buna riire, totugute are kera egurube, na ebibe biria bitobwatete. Tominyoke noboremereria ase okoamererania koria kobekire bosio bwaito, 2na korigereria Yeso, omochaki na omoikerania bw’okwegena gwaito. Ribaga ri’omogoko oyobegetwe bosio bwaye, akaremereria omosalaba na gochaya obosooku, ere nigo aikaransete ensemo ya borio y’ekerogo ki’obonene kia Nyasae.

3Gaki, morengererie mono ere oyoremereretie oboengereria buna obwo bokorwa ase abanyene ebibe igoro yaye ere omonyene, timocha kwebutokania na gokwa emioyo yaino. 4Timorarwana esegi goika mwaiteire amanyinga aino ase okoamererania nebibe, 5naende mwebire ogosorora koria kogokwana nainwe buna abana,

“Omwana one, tochaya ogoakwa kw’Omonene kw’ogokorongeyia,

gose tokwa omoyo karakoe egesusuro.

6Naki ere oyo Omonene anchete nigo akomorongeyia,

na kong’wania bororo omwana oyo obeire oyoye.”

7Ekero mokorongeigwa moremererie Nyasae nigo akobakorera buna abana baye. Naki, mwana ki otari korongeigwa na ise? 8Korende onye mokoba motari nokorongeigwa oko bonsi babwataine nakorokwo, rirorio nigo more abana ebimeru gose tari abana ba boronge. 9Amo nayio ntwarenge nabatata baito b’ense eye, baare gotorongeyia, na barabwo ntwabasigete. Inee! Tari buya mono kobua kwebeka inse ya Tata bw’emeika yaito, na koba moyo? 10Naki ekeene, abatata baito b’ense nigo batorongeetie ase amatuko amake buna baroche buya, korende ere nigo agotorongeyia ase ogotokonya, erinde tobe ababwatani b’obochenu bwaye. 11Kera okorongeigwa ase engaki yaye gokororekana ng’a tikori egento ki’omogoko, korende neki’omoichano. Korende nyuma yaye abakonarire banyore okwama kw’omorembe na okw’oboronge.

12Ase ayio, mobeke chinguru amaboko ayio ororobire, na amaru ayagataire. 13Mokorere amagoro aino chinchera chindonge, erinde ekere ekerema tikeotoranwa, korende kobua mono kegwenigwe.

Ogokurera kw’ogotaanga obuya bwa Nyasae

14Kora omokia koba nomorembe nabanto bonsi, na rigia obochenu, ekiagera onde tari orarore Omonene, atari naborobwo. 15Morigererie mono ng’a onde taremerwa obuya bwa Nyasae, “omori bw’obororo” tocha gokumbaria na kobachanda, na abanto abange batambokerigwe ogotacheneka ase oyio. 16Morigererie ng’a onde taba omotomani, gose oyotamosigeti Nyasae, buna Esau, oyoonetie omwando oye bw’okoiborwa kw’obotangi ase endagera eyemo. 17Naki mwamanyire buya ng’a ekero achiete korigia omwando bw’ogosesenigwa korwa nyuma, agakanigwa, naki tanyora ribaga ri’okoonchoka nonya oririgetie mono namariga.

18Naki timoraika ase egetunwa keranyare gokunwa, kegwoka omorero, gose omosunte, ne riire rimwamu, na ekembobe, 19na egeturi ki’egetureri, na eriogi ri’amang’ana. Abwo bayaigwete bagasorora tibatebigwa ing’ana rinde naende. 20Naki tibanyarete koremereria ring’ana riria riachigetwe, “Nonya neng’iti eise gokuna egetunwa nabo eraakwe amagena.” 21Aya arorekanete igo arenge ay’okwoboyia, goika Musa agateba, “Nabwatirwe nomoondoko na okoiguswa.” 22Korende inwe mwaikire egetunwa gekorokwa Sayoni, na omochie o Nyasae ore moyo, Yerusalemu ya igoro, na abamalaika abange batari kobareka, 23na omosangererekano bw’omoyega, na omosangererekano bw’abaiborwa be ritang’ani, abwo amarieta abo arikire igoro, na Nyasae oyore omogambi bw’abanto bonsi, na emeika y’abanto abanyene oboronge abaikeranigwe, 24na Yeso oyore omobwatania bw’okobwatana okoyia, na amanyinga akonyororokerigwa ayagokwana buya kobua aria ay’Abeli.

25Rigereria, timomwanga ere oyogokwana. Naki onye baria tibetooretie baria bamwangete ere oyobakurerete ase ense, kobua mono intwe titogwetooria onye tokomwanga ere oyogotokurera korwa igoro. 26Na eriogi riaye ndiatengechetie ense ekero keria, korende bono orire eira, ogoteba, “Ara rimo naende nintengechie ense, gose tari ense yoka, korende na igoro boigo.” 27Korende ring’ana eri, “Ara rimo naende”, nigo rikoorokia, ng’a ebinto biria bigotengechigwa nigo birang’anyigwe ekiagera biatongetwe, erinde ebitanyare gotengechigwa bibeo. 28Gaki, ekiagera twanyorire oboruoti obotanyare gotengechigwa, tiga toiranerie ng’a mbuya mono na komokorera Nyasae ase okomogokia amo namasikani na okoiroka. 29Naki Nyasae oito nomorero okoria na gosiria.

Currently Selected:

ABAIBIRANIA 12: EKEGUSIIBBLE

Highlight

Copy

Compare