YAKOBO 1

Ogokwania

1Inche Yakobo, omosomba o Nyasae na obw’Omonene Yeso Kristo, nabakwanirie inwe ab’ebisaku ikomi na bibere, abamwatananekire gochia chinse chire ao ao.

Okwegena na obong’aini

2Abaminto, bara ng’a nomogoko bwoka komorasoe ase amateemwa are ao ao, 3ekiagera momanyete ng’a ekero okwegena kwaino kogoteemwa nigo mokweorokereria oboremereria. 4Tiga oboremereria obwo bobe nemeremo emeikeranu, erinde monyare koba abaikeranu, na abagima, motaremeiri na ing’ana rinde rionsi.

5Korende onye monto onde oino oremeire obong’aini, tiga asabe Nyasae, ere nabomoe, ekiagera nigo akoa abanto bonsi ase obonge, gose tari gotogonyera onde. 6Korende oyogosaba, tiga asabe ase okwegena, taba na tang’u‐tang’u, ekiagera oyore ne chitang’u‐tang’u nigo are buna emerindo y’enyancha ekona‐koirwa nomwaga gochia aaria na aaria. 7Naki omonto oria takaga ng’a nanyore egento korwa ase Omonene; 8ere nigo are nemioyo ebere, na gotiting’ara ase chinchera chiaye chionsi.

Obotaka na obonda

9Korende oyomino otari nobonene agoke, ekiagera aimokererigwe igoro, 10na oyore omonda, nere agoke kairanigwe inse, ekiagera nigo arasire buna egesicha ki’obonyansi. 11Naki erioba korikooroka nomobaso omororo, nigo rigosamba na kwomia obonyansi. Egesicha ki’obonyansi kiaroroka, na obuya bw’ekieni kiaye bwasira. Naboigo nomonda nere arasire kagendererete kwerigeria.

Amateemwa

12Nasesenirie omonto oria oremereretie ogoteemwa, ekiagera ekero aikire gwancherwa nanyore obogima buna egutwa y’obobui, obogima obwo Nyasae abarierete eira abwo bamwanchete. 13Omonto karateemwe, tateba, “Nateemirwe na Nyasae,” ekiagera Nyasae tagoteemwa namabe, gose tagoteema omonto. 14Korende kera omonto nigo agoteemwa ekero akong’uswa na kong’ainwa nokogania kwaye omonyene. 15Na okogania koria okobe gokwabogoirie oborito kwaibora ebibe, na ebibe biria kobiakinire, biarenta amakweri.

16Abaminto abanchani, timong’aineka. 17Kera ekerugwa ekiya, na kera ekeegwa geikeranete nigo gekorwa ase Ise bw’emebaso. Asare koonchoka tikoiyo, gose ekiriri kende gekooncha‐onchoka. 18Ase ogwancha kwaye ere omonyene agatoibora ase ring’ana riaye ri’ekeene, erinde tobe buna ogotongorwa konde kw’ebitongwa biaye.

Okoigwa ring’ana na korikora

19Abaminto abanchani, momanye ring’ana eri: Kera omonto abe omwango ase okoigwa, korende abe bwe ng’ora ase ogokwana, na bwe ng’ora ase okoba nendamwamu, 20ekiagera endamwamu ya mwanyabanto teri gokora ayare boronge ase obosio bwa Nyasae. 21Ase ayio, beka aare ogotacheneka gwonsi, na obonge bw’amabe, na ase obwororo mwanche ring’ana erio riasimekirwe ime yaino, eriranyare gotooria emioyo yaino.

22Mobe abakori be ring’ana; timoba abakoigwa rioka, na kweng’aina inwe abanyene. 23Naki omonto karabe omoigwa bwe ring’ana, gose tari omorikori, oyio nigo anga buna omonto oyokwerigereria obosio bwaye omonyene ase ekerore. 24Igo akwerigereria, naende ogenda ase agochia, erio kegima bweba buna erora arenge. 25Korende oyorigereretie amachiko amaikeranu ay’obosibore, na goikaransa aroro, na taba oyokoigwa na kweba, korende abe omokori okoyakora, oyio nabe oyosesenirie ase ogokora kwaye.

26Omonto karekage ng’a nkomokorera are Nyasae, na ere tagambereti oromeme rwaye, korende nenkoro yaye akong’aina, igo okomokorera Nyasae kwaye nigo kore okwa bosa. 27Okomokorera Nyasae okore ogochenu, gotari na komocha ase obosio bwa Nyasae Tata noko: Gochia korora chintakana na ababoraka ase obokong’u bwabo, na kwerenda ere omonyene, na igo taba na kemoa gi’ense.

Currently Selected:

YAKOBO 1: EKEGUSIIBBLE

Highlight

Copy

Compare