ABAIBIRANIA 11

Okwegena

1Gaki, okwegena nakwo okoba nobomaene ase amang’ana ayio asemeirie, nonya nekeene ki’ayio atari kororekana. 2Naki ase okwo abagaaka abakoro mbaberetwe kirori. 3Ase okwegena twamanyire ng’a ense nigo yatongetwe ase chinguru chie ring’ana ria Nyasae, na igo ebinto bikororekana tibiakoretwe nebinto bire maiso marore.

4Ase okwegena Abeli akaa Nyasae ekeng’wanso ekere ekiya kobua egia Kaini. Ase okwo akaberwa kirori ng’a ere nomonyene oboronge. Nyasae akamobera kirori ase ogwancha ebiegwa biaye. Abeli okure, korende ase okwegena ngokwana are nonya ngoika bono. 5Ase okwegena Enoku akang’anyigwa, tacha korora amakweri. Tarorekanete, ekiagera Nyasae namong’anyetie. Naki ritang’ani atarang’anyigwa konya obereirwe kirori ng’a namogwenerete Nyasae. 6Korende omonto atari nokwegena takonyara komogwenera Nyasae. Naki oyogocha asare nagwenerete gwancha ng’a nareo, naende nigo akobaa eng’eria baria bakomorigia. 7Ase okwegena Nuhu, gaikire gokurerwa na Nyasae ase amang’ana atararorekana, ase okoba namasikani amaya asare akaroisia obwato, erinde atoorie abanto b’enyomba yaye. Ase ayio, akagambia ense ekina, na akaba omonyamwando bw’oboronge bokonyorekana ase okwegena.

8Ase okwegena Ibrahimu akaigwera Nyasae ekero arangeretigwe kogenda goika aase aria achiete konyora abe omwando oye, akaimoka akagenda, tamanya aase agochia. 9Ase okwegena akamenya ase ense eria engeni arieretwe eira, akamenya buna omomenyi ase chiema amo na Isaka na Yakobo, abarenge abanyamwando amo nere ase eira eria eria. 10Naki igo aganyete omochie ore namaroso, oyo Nyasae arosete na koagacha. 11Ase okwegena Sara omonyene akanyora chinguru koba morito, nonya konya oeteire emiaka yaye, ekiagera amoroche ere oyomorierete eira, ng’a nomwegenwa are. 12Ase ayio, korwa ase omonto oria oyomo, nonya konya obeire buna oyokure, abanto bakaiborwa abange buna ching’enang’eni chia igoro, na buna omokenye ore ase engegu y’enyancha, otanyare kobareka.

13Aba bonsi bagakwa bare nokwegena, bataranyora ayabarieretwe eira, korende bakayarora korwa are, na koyakwania, bakaorokia ng’a nigo bare abamenyi na abaeti ase ense. 14Naki abagokwana amang’ana buna ayio nkoorokia bare maiso marore, ng’a nkorigia bare ense yabo abanyene. 15Onye barabwo mbainyorete ense eria ase baruete, anga mbanyorete ribaga koirana aroro. 16Korende bono mbaganetie ense ere engiya kobua, engencho yaye ense ya igoro. Ase ayio Nyasae takorora obosooku korokwa Nyasae obo, ekiagera obaroiseirie omochie.

17Ase okwegena Ibrahimu, gachia goteemwa, akarua Isaka abe ekeng’wanso. Nere oyorieretwe chiira akarua omwana oye omomoima. 18Ere natebetigwe, “Ase Isaka oroiboro rwao narwatorwe.” 19Akarengereria ng’a Nyasae nanyare komobokia korwa ase abakure. Ase ayio akamonyora agwo agwo, buna omogwekano. 20Ase okwegena Isaka agasesenia Yakobo na Esau ase amang’ana agochi‐gocha. 21Ase okwegena Yakobo, ekero arenge ang’e nogokwa, agasesenia kera oyomo bw’abana ba Yusufu, agasasima bwesiirerete enyimbo yaye. 22Ase okwegena Yusufu, ekero abeire ang’e nomoerio bw’obogima bwaye, agakwana igoro y’okong’anyigwa kw’Abaisraeli, akabachikera amang’ana igoro y’amauga aye.

23Ase okwegena Musa, ekero aiboretwe, akabiswa ase engaki y’emetienyi etato nabaibori baye, ekiagera baroche ng’a nomwana omuya, gose tibairogete ogochika kw’omoruoti. 24Ase okwegena Musa, kabeire omonto omonene, akaanga tarokwa omwana bw’omoiseke o Farao, 25agachora ng’a mbuya konyora emechando amo nabanto ba Nyasae kobua kwegokia ase ebibe ase ekero egeke. 26Ere nigo abarete ogochaywa ase engencho ya Kristo ng’a nobonda kobua chinibo chia Misiri, ekiagera arigereretie eng’eria ere bosio. 27Ase okwegena akarua Misiri, tairoka endamwamu y’omoruoti, ekiagera aremereretie buna oyororire ere oyotari kororekana. 28Ase okwegena akaroisia Epasaka na kogindia amanyinga, erinde oyorache goita abana abatangi tabakuna, ne ching’iti chintangi boigo.

29Ase okwegena Abaisraeli bagaeta egati y’Enyancha Embariri buna ase ense enyomo. Korende Abamisiri barabwo bagachia goteema gokora bo, bakamerwa nenyancha. 30Ase okwegena chindwaki chia Yeriko chikagwa gachiaetananirwe ase engaki y’amatuko atano na abere. 31Ase okwegena Rahabu, oria omotayayi, taitetwe amo nabwo bataigwerete, ekiagera aroisetie abanto baria chirooti nomorembe. 32Naende inki ndakwane? Naki engaki tekong’isana gokwana igoro ya Gidioni, na Baraki, na Samson, na Yefita, na Daudi, na Samweli, na ababani. 33Abwo ase okwegena bakabua amaruoti, bagakora oboronge, bakanyora ayabarieretwe chiira, bagasieka emenwa ye chindo. 34Naende barabwo bakarimia chinguru chi’omorero, bagetooria korwa ase obwoge bw’omoro, bakabekwa chinguru nyuma y’oboreu bwabo, bakaba abakong’u ase esegi, bagaseria emeganda y’abarwani y’ababisa. 35Abakungu bakanyora naende abakwete babo ase okobokigwa. Abande bagaitwa bobe goika bagakwa, tibancha gosiborwa, erinde banyore okobokigwa okore okuya kobua. 36Abande bagachandeka ase ogochecherigwa na goakwa chinkini, naende bagasibwa nebinyuri na kobekwa chichela ime. 37Bagaakwa amagena, bagateemwa, bakanachwa ne chinseke, bagaitwa nemeyio ya birende. Naende bagaetanana beboetie chingobo chie ching’ondi na echie chimbori, bakaba abaremerwa, bagachandwa na gokorwa bobe, 38abanto ense etagwenere koba nabarabwo. Barabwo nigo barenge goetanana ase chirooro na ase ebitunwa, ase amabwago na amakuruma.

39Abanto aba bonsi babereirwe kirori goetera ase okwegena kwabo, korende tibanyora ayabarieretwe eira, 40ekiagera Nyasae natang’anete gotogachera intwe egento kere ekiya kobua, naki barabwo tibaikeranetigwe intwe totaiyo.

Currently Selected:

ABAIBIRANIA 11: EKEGUSIIBBLE

Highlight

Copy

Compare