ABAIBIRANIA 10
10
1Naki ayare ime y’amachiko nekiriri gioka ki’amang’ana agochi‐gocha, gose tari ekieni ekenyene. Ase ayio, ebing’wanso biria biria biare koruegwa kera omwaka botambe tibiarenge konyara kobaikerania abwo baare kobirua. 2Onye mbianyarete, Inee, anga tibiatigetwe, tibikoruegwa? Naki onye abwo baare kobirua bakoorire gochenwa ara rimo, anga tibare kwerora ng’a mbare nebibe naende. 3Korende ebing’wanso ebio nigo bikobainyoria igoro y’ebibe kera omwaka. 4Naki amanyinga e chieeri na aye chimbori takonyara korusia ebibe.
5Ase ayio, Kristo kagosoa ase ense nigo agoteba,
“Ebing’wanso na ebiruegwa tikwabiganetie,
korende omobere kwandoiseirie.
6Ase ebing’wanso bi’ogosambwa, na ebing’wanso bi’ebibe,
tikwagogetigwe nabirobio.
7Erio ngakwana: Nachire gokora ogwancha kwao, Nyasae,
buna erikire igoro yane ase ebuku.”
8Agwo ritang’ani nigo agoteba, “Ebing’wanso, na ebirugwa, na ebing’wanso bi’ogosambwa, na ebing’wanso bi’ebibe tikwabiganetie, gose tikwagogetigwe nabirobio”, nonya birobio biare korentwa buna amachiko are goteba. 9Erio akabora, “Rora, nachire gokora ogwancha kwao.” Igo akarusia ebie ritang’ani, erinde abeke egia kabere. 10Ase ogwancha okwo twanyorire ogochenwa ase okoruegwa kw’omobere o Yeso Kristo ara rimo rioka.
11Kera omokuani nigo are gotenena rituko ase rituko ase obokoreri bwaye na korua ebing’wanso biria, na birobio tibiare konyara korusia ebibe nonya ng’ake. 12Korende ekero Kristo aruete ekeng’wanso ekemo gioka ase ebibe kerabe goika kare na kare, nigo aikaransete ensemo y’okoboko gw’okorio kwa Nyasae. 13Erio oganyete goika ababisa baye babekwe inse y’amagoro aye. 14Naki ase okoruegwa okomo obaikeranirie ase amatuko onsi abwo bachenirwe. 15Naki Omoika Omochenu noro otobereire kirori. Naki ritang’ani nigo agoteba iga:
16“Oko nakwo okobwatana ndache kobwatana nabarabwo
nyuma y’amatuko ayio, Omonene otebire:
Nimbeke amachiko aane ase chinkoro chiabo ime,
ninyarike ase ebirengererio biabo.”
17Naende nigo agoteba,
“Ebibe biabo, na ogosaria kwabo tinkobiinyora naende nonya ng’ake.”
18Gaki, okorusigwa kw’ebibe gokorabeo, rirorio ekerugwa ase engencho y’ebibe tigekobao naende.
Tiga toike ang’e na kobwata okoorokia gwaito
19Ase ayio, baminto, ntore noboremu bw’ogosoa Aase Aachenu goetera ase amanyinga a Yeso, 20ase enchera enyia ere moyo, eye atoigorerete, egoetera ase etoto, engencho yaye omobere oye. 21Naende ntore n’Omokuani Omonene igoro y’enyomba ya Nyasae. 22Ase ayio, toike ang’e ne chinkoro chire nekeene, tobe nobomaene oboikeranu ase okwegena, ne chinkoro chiaito chianyororokerigwe oborabu, tichigotogambia, twasibigwe ase emebere yaito namache amaya. 23Tiga tobwate mono okoorokia kw’ogosemeria gwaito, totari konyegerigwa; ekiagera ere oyoriete eira nomwegenwa. 24Naende twechanderane intwe ase intwe, na kobekana chinguru ase obwanchani, na ase ogokora okuya. 25Titotiga gosangererekana amo, buna engencho y’abande ere, korende toremanie intwe ase intwe, kobua mono ekiagera moroche ng’a Rituko riria riaikire ang’e.
26Naki onye togokora ebibe moeneno nyuma gotwaikire komanya ekeene, keng’wanso kende tikeri ase engencho y’ebibe. 27Korende eke totigaretie nobwoba bw’okoganya ekina, na omorero omotindi ogwoka, ogocha gosiria abwo bakoengereria. 28Omonto oyorenge gochaya amachiko a Musa nigo arenge goitwa okwa, atari konyora amabera, ase okoberwa kirori nabanto babere gose batato. 29Inee! Naki moroche? Omonto oria otachete Omwana o Nyasae, na kobara amanyinga ’okobwatana, achenetwe naro, koba egento kia bosa, oria okoreire Omoika bw’amabera obogechi, tiyamogwenerete ere anyore egesusuro ekenene kobua? 30Naki ntomanyete ere oyokwanete, “Egesiomba nekiane, inche ning’akane,” naende, “Omonene nere oragambie abanto baye.” 31Okogwa ase amaboko a Nyasae ore moyo, eri nering’ana ri’okondokia.
32Korende moinyore amatuko e ritang’ani, nyuma komwabarerigwe omobaso igo mwaremereretie okoamererania okonene kw’ogochandwa. 33Engaki ende mokarorerigwa ase okoramwa na ogochandwa maiso marore, na engaki ende mokabwatana nabwo bakoreretwe ayio. 34Naki mwabarorerete amabera baria barenge ase ebisibo, mogancha nomogoko kourwa chinibo chiaino, ekiagera mwamanyete ng’a inwe abanyene more nenibo eyere engiya kobua, erabeo kare na kare. 35Ase ayio, timotuguta oboremu bwaino, ekiagera mbore neng’eria enene. 36Naki igo ebagwenerete mobe noboremereria, erinde komwaikire gokora ogwancha kwa Nyasae monyore aya mwarieretwe eira.
37“Naki nkere ekero egeke mono,
ere oyore gocha nachiche, gose tagotebana gocha,
38korende omonyene oboronge one nabe moyo ase okwegena,
na, karasukwane, omoyo one tokogokigwa nere.”
39Korende intwe titori ase abwo bagosukwana na gosira, korende ase abwo bare nokwegena ase okoegera emioyo yaito.
Currently Selected:
ABAIBIRANIA 10: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
