FILEMONI 1

Ogokwania

1Inche Paulo, omosibwa o Kristo Yeso, amo noyominto Timotheo, ngokorikera tore aye Filemoni, omwanchwa oito, omokori emeremo amo naintwe. 2Nkobarikera tore boigo Apia, mosubati ominto, na Arikipo, omorwani ore amo naintwe, na abanto b’ekanisa ere ase enyomba yao.

3Obuya bobe asemore na omorembe bikorwa ase Nyasae Tata oito, na ase Omonene Yeso Kristo.

Obwanchani bwa Filemoni na okwegena kwaye

4Botambe nigo ngoakera Nyasae one ng’a mbuya mono ekero ngokoinyora ase ogosaba kwane, 5ekiagera nkoigwa nde amang’ana igoro y’obwanchani bwao, na okwegena kwao obwate ase Omonene Yeso, na buna okobiorokia ase abachenu bonsi. 6Nasabire ng’a okobwatana gw’okwegena ore nakorokwo gokore emeremo, erinde omanye mono kobua kera egento ekiya kere asetore ime ase Kristo. 7Naki oyominto, nigo nabete nomogoko omonge na okoremigwa ase engencho y’obwanchani bwao, ekiagera chinkoro chi’abachenu chiatimogetigwe naye.

Paulo ogosabera Onesimo

8Ase ayio, ninde noboremu obonge ase Kristo kogochika eri ogwenerete okore. 9Korende ase engencho y’obwanchani nanchire kobua kogosorora, buna inche Paulo inde omogaaka bono, naende inde omosibwa o Kristo Yeso. 10Nagosoroire ase engencho y’omwana one, oyo naiborete ekero nare ase ebisibo biane, nere Onesimo. 11(Ere agwo kare tarenge kogokonya kende, korende bono nigo aranyare gotokonya mono, aye nainche.) 12Ere namotomire gocha asore, na nigo enga buna ninche omonyene netoma. 13Naki inche nigo ndigetie abeere aiga amo nainche, erinde anyare gonkorera ribaga riao, ekero nsibire ase engencho y’enchili. 14Korende tinarigetie gokora ing’ana rinde rionsi otatiga gwanchire aye, erinde obuya bwao tiboba obw’okobetererigwa, korende ase ogwancha kwao aye omonyene.

15Aande nakio kiagerete agaatananwa korwa asore ase ekero egeke, erinde obe nere kare na kare, 16korwa bono tari buna omosomba, korende goetania omosomba, buna oyominto omwanchwa, asende inche mono, na asore mono kobua, buna mwanyabanto, naende buna oyo bw’Omonene. 17Gaki, onye kondengereretie inche buna omobwatani oo, omoroisie koreng’ana buna kware kondoisia inche. 18Onye okomocheire kende, gose okoriete esira, oyeborie korwa asende. 19Inche Paulo narikire aya nokoboko kwane omonyene, ning’akane. Amaene, ninyare kogotebia, ng’a nore nesira asende, engencho yaye aye bweka omonyene. 20Ee, oyominto, ninganetie obokonyi bokorwa asore, ekiagera noyo bw’Omonene ore. Ontimokie enkoro yane ase Kristo.

21Igo nakorikeire aya, ekiagera inde nobomaene ng’a nomoigweri ore, naende imanyete ng’a nokore goetania ayio nagotebirie. 22Amo nayio, ondoiserie aase ngocha komenya, naki nsemeretie ng’a goetera ase ogosaba kwaino nimbe nainwe.

Amakwania ’ogokoorera

23Epafara, oyosibetwe amo nainche ase engencho ya Kristo Yeso, ogokwanirie. 24Mariko na Aristariko, na Dema, na Luka, abakori emeremo amo nainche, bagokwanirie boigo.

25Obuya bw’Omonene oito Yeso Kristo bobe amo nemioyo yaino.

Currently Selected:

FILEMONI 1: EKEGUSIIBBLE

Highlight

Copy

Compare