EKEKIELI6 5
5
Ezekieli ogokigita etukia yaye
1“Aye mwanyabanto, imokia omoyio o birende omwoge, bwekigite etukia y’omotwe oo, ne chinderu chiao; erio orente ekerengero orengere etukia eyio na oyiatanane. 2Ensemo eyemo ya isato y’etukia eyio oyesambere gati‐gati y’omochie, ekero amatuko ay’okoyoboera kaerire; na ensemo ende ya isato oyeake nomoyio oria goetanana ase omochie oria; na ensemo ende ya isato oyesiarere eirurukigwe nomwaga, na inche ninyebwatie nomoro one. 3Oimokie etukia inke igo, oyesiberanie ase omokoba bw’eganchwa yao. 4Naende oimokie inke igo korwa ase eyio, oyerute ase omorero oyesambe, na korwa ase eyio omorero norueo bwesiarere gochia ase Abaisraeli bonsi.”
5Aya naro Omonene Nyasae agoteba: “Oyo noro Yerusalemu; nayobekire ase egati‐gati y’abanto b’ebisaku, ne chinse chinde chiyoetanaine. 6Korende Yerusalemu okorire ebibe kobua abanto b’ebisaku na bwangire koigwera amachiko aane, naende okorire ebibe kobua chinse echio chiyoetanaine, ekiagera bwangire koigwera aya nachigete, gose kobwatia emeroberio yane echikire.” 7Ase ayio, aya naro Omonene agoteba: “Inwe mwabeire abebura‐buria kobua ebisaku ebio bibaetanaine, gose timobwateti emeroberio yane echikire, gose timorendeti amachiko aane, na timobwateti nonya namachiko ’ebisaku ebio bibaetanaine.” 8Ase ayio, aya naro Omonene Nyasae agoteba: “Rora, inche ninche inde mamincha yaino, nimbachere, mbanachere ekina agwo ase egati yaino, ase amasio ’abanto b’ebisaku. 9Ase engencho y’ogosaria kwaino gwonsi gw’okogechia nimbae egesusuro ntana korua kero kende gionsi, gose tinkonyara gokerua nonya ng’ake naende. 10Ekero ekio abaibori mbarie abana babo, na abana mbarie abaibori babo, agwo ase egati yaino. Nimbanachere ekina, na abatigari baino nimbasiarere gochia ase chinsemo chionsi chi’ense.”
11Ase ayio Omonene Nyasae nigo agoteba iga: “Ekeene, buna inde moyo ekiagera inwe mwakorire Obomenyo, bwane Obochenu bwabeire obotachenegeti ase engencho y’ogokora kwaino kw’obokayayu, na okogechia kwaino gwonsi, nimbaserie kegima; eriso riane tirikobarigereria namabeebe, gose inche tinkobarorera amabera. 12Ensemo eyemo ya isato y’abanto baino mbaitwe namarwaire agoita, na bakwe nenchara, agwo ase omochie ime, na ensemo ende ya isato mbaitwe nemioro agwo ase chinsemo chionsi isiko y’omochie; na ensemo ende ya isato nimbasiarere gochia ase chinsemo chionsi, mbabwatie inde nomoro.
13“Ase enchera eyio ning’umore endamwamu yane, na obotindi bwane, igoro asebare, erinde ing’isaneke. Ekero ndabe naumoire endamwamu yane asebare, mbamanye ng’a ninche Omonene nakwanire ayio inde ne risemi. 14Aye omochie, ningosirie obe amaturi na oyo ogochaywa nabanto b’ebisaku bigoetanaine, na ase amasio ’abanto bonsi abagoeta asore.
15“Ekero ndabe nendamwamu na obotindi na gokonachera ekina na gokoa egesusuro ki’ogokorongeyia, aye nobe kogochaywa na gosekererwa, na ekero abanto b’ebisaku biria bigoetanaine barakorore, nigo barorokererigwe na goichanigwa. Ninche Omonene nakwanire ayio. 16Ekero ekio nindase abanto bao chinsara chiane chi’enchara, chibaite na kobasiria kegima. Ekero ndakore ayio ninkeyie endagera yabo bakoria ebe enke na enchara egenderere komenteka. 17Nintome enchara ne ching’iti chi’orosana asore, ebio mbiite abana bao; boigo ningotomere amarwaire agoita na ogoiterwa kw’amanyinga amo nomoro. Ninche Omonene nakwanire ayio.”
Currently Selected:
EKEKIELI6 5: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
