EKEKIELI6 48
48
Ense egwaterwa ebisaku bi’Abaisraeli
1“Oyo noro omoroberio buna ebisaku bi’Abaisraeli biramenye: Egesaku kia Dani keegwe orogongo rwa sugusu. Ribebe riabo ribwatie enchera ya Heteloni agwo ase egesoero kia Hamati, rigenderere gochia Hasari‐Enoni, omochie ore ase ribebe ria sugusu ria Damesiki. Orogongo orwo rwa Dani nigo rorabe korwa ensinyo ya moocha y’ense eyio goika ensinyo ya bosongo. 2Egesaku gi’Aseri keegwe orogongo rwaye robebekane norwa Dani korwa ensinyo ya moocha goika eya bosongo. 3Egesaku kia Nafutali keegwe orogongo rwaye robebekane norw’Aseri korwa ensinyo ya moocha goika eya bosongo. 4Egesaku kia Manase keegwe orogongo rwaye robebekane norwa Nafutali korwa ensinyo ya moocha goika eya bosongo. 5Egesaku gia Efraimu keegwe orogongo rwaye robebekane norwa Manase korwa ensinyo ya moocha goika eya bosongo. 6Egesaku kia Reuben keegwe orogongo rwaye robebekane norwa Efraimu korwa ensinyo ya moocha goika eya bosongo. 7Egesaku kia Yuda keegwe orogongo rwaye robebekane norwa Reuben korwa ensinyo ya moocha goika eya bosongo.
Orogongo orwatananetwe ase emeremo gete
8“Orogongo robebekaine norwa Yuda korwa moocha goika bosongo, nigo roratigwe robe aase mokoruera okoruegwa ogochenu. Obogare bwaye nigo borabe obwe chimoti chilifu emerongo ebere na isano (25,000), na obotambe bwaye nigo borabe buna obwa kera egesaku korwa moocha goika bosongo. Gati‐gati y’orogongo orwo aase aachenu nao arabe.
9“Orogongo orwo morotige robe orw’Omonene; obotambe bwaye nigo borabe chimoti chilifu emerongo ebere na isano (25,000), na obogare chimoti chilifu ikomi (10,000). 10Abakuani mbanyore orogongo rwabo korwa ase orwo orochenu. Orogongo rwabo nigo rorabe nobotambe bwe chimoti chilifu emerongo ebere na isano (25,000) korwa moocha goika bosongo, na korwa sugusu goika irianyi robe chimoti chilifu ikomi (10,000). Aase aachenu ay’Omonene nigo arabe gati‐gati y’oboremo obwo. 11Orogongo orwo nigo rorabe orw’abakuani abwo bachenekire, abwo b’ororeria rwa Zadoki. Abwo nigo babete abegenwa asende, tibantigete buna Abalawi bande bakorete ekero Abaisraeli basaretie bagantiga. 12Orogongo orwo nigo rorabe aase mokoruera okoruegwa ogochenu aatananire korwa ase ensemo eria ere enchenu. Nigo rorabe orochenu mono robebekane norw’Abalawi. 13Abalawi baegwe orogongo robebekane norw’abakuani; nigo rorabe nobotambe bwe chimoti chilifu emerongo ebere na isano (25,000), na obogare chimoti chilifu ikomi (10,000). Obotambe bwe chingongo chionsi nigo borabe chimoti chilifu, emerongo ebere na isano (25,000) na obogare chimoti chilifu ikomi (10,000). 14Orogongo orwo tirobaisa koonigwa gose koonchorerigwa; orogongo orwo rore oruya goetania echinde chionsi tiroegwa onde, ekiagera nigo rore orochenu ase Omonene.
15“Orogongo roratigare rore nobogare bwe chimoti chilifu isano (5,000), na obotambe chimoti chilifu emerongo ebere na isano (25,000), nigo rorabe orw’abanto bande bonsi, baraagache emechie yabo aroro, naende robe orw’oborisia. Agwo nao omochie omonene oraagachwe gati‐gati. 16Ekerengo ki’omochie oyio nigo kerabe iga: Ensemo ya sugusu chimoti chilifu inye, na amagana atano (4,500), na ensemo ya irianyi chilifu inye, na amagana atano (4,500), na ensemo ya moocha chilifu inye, na amagana atano (4,500), na ensemo ya bosongo chilifu inye, na amagana atano (4,500). 17Omochie oyio nigo orabe namarisio buna iga: Oborisia bwa sugusu nigo borabe obw’ekerengo gie chimoti amagana abere, na emerongo etano (250), na obwa irianyi amagana abere, na emerongo etano (250), na obwa moocha amagana abere, na emerongo etano (250), na obwa bosongo amagana abere, na emerongo etano (250). 18Orogongo orwo roratigare robebekaine na roria orochenu, nigo rorabe orw’ekerengo gie chimoti chilifu ikomi (10,000) gochia moocha, na chilifu ikomi (10,000) gochia bosongo. Endagera erame aroro nigo erabe ey’abwo barabe bagokora emeremo ase omochie oyio ime. 19Abakori emeremo b’omochie oyio ab’ebisaku bi’Abaisraeli mbabe bakorema orogongo orwo.
20“Orogongo roria rwonsi orochenu nigo rorabe orw’ekerengo gie chimoti chilifu emerongo ebere na isano (25,000), chinsemo chionsi nigo chirabe chireng’aine. Oro narwo orogongo orochenu amo norw’omochie oyio.
21“Orogongo roratigare robebekaine na roria orochenu amo norw’omochie ase kera ensemo nigo rorabe orw’omogambi. Chingongo echio nigo chirachakere iga: Oromo korwa ase orogongo roria orochenu rw’ekerengo gie chimoti chilifu emerongo ebere, na isano (25,000), rogenderere gochia moocha koreng’ana ne chingongo chiria chi’ebisaku, na oronde gochia bosongo koreng’ana ne chingongo chiria chi’ebisaku. Chingongo echio nigo chirabe echi’omogambi. Orogongo orwo orochenu ase Hekalu erabe nigo rorabe gati‐gati. 22Chingongo chi’omogambi nigo chirabebekane norw’Abalawi na orw’omochie, naende chibe ase egati y’orw’Abayuda na orw’Ababenjamin.
Ense yaterwe ebisaku binde
23“Ebisaku binde biratigare biegwe chingongo chiabo buna iga: Egesaku kia Benjamin keegwe orogongo rwaye korwa ensinyo ya moocha goika eya bosongo. 24Egesaku gia Simeoni keegwe orogongo rwaye robebekane norwa Benjamin, korwa ensinyo ya moocha goika eya bosongo. 25Egesaku gia Isakaru keegwe orogongo rwaye robebekane norwa Simeoni korwa ensinyo ya moocha goika eya bosongo. 26Egesaku gia Sabuloni keegwe orogongo rwaye robebekane norwa Isakaru, korwa ensinyo ya moocha goika eya bosongo. 27Egesaku kia Gadi keegwe orogongo rwaye robebekane norwa Sabuloni korwa ensinyo ya moocha goika eya bosongo.
28“Ribebe ria irianyi nigo rirabebekane norongogo rwa Gadi. Nigo riragenderere korwa Tamari gochia ase amache a Kadeshi‐Meriba, na korwa aroro ribwatie akarooche ka Misiri ritwomere Enyancha Enene.
29“Eye nero ense moraatanane ase ogoaka obomera, ebe emiando y’ebisaku bi’Abaisraeli. Ebio nabio birabe ebitari biabo. Nabo inche Omonene Nyasae natebire.
Ebiita bia Yerusalemu
30“Ebi nabio birabe ebiita bi’omochie oyio orabe nekerengo gie chimoti chilifu inye, na amagana atano (4,500): 31Ebiita bitato nigo birabe ensemo ya sugusu. Ebiita ebio nigo birarokwe iga: Egeita kia Reuben, na ekia Yuda, na ekia Lawi. Ebiita bionsi nigo birarokwe kobwatekana namarieta ’ebisaku bi’Abaisraeli. 32Ensemo ya moocha eyerabe nekerengo gie chimoti chilifu inye, na amagana atano (4,500), ebiita bitato mbibeo: Egeita kia Yusufu, na ekia Benjamin, na ekia Dani. 33Ensemo ya irianyi eyerabe nekerengo gie chimoti chilifu inye, na amagana atano (4,500), ebiita bitato mbibeo: Egeita gia Simeoni, na egia Isakaru, na egia Sabuloni. 34Ensemo ya bosongo eyerabe nekerengo gie chimoti chilifu inye, na amagana atano (4,500), ebiita bitato mbibeo: Egeita kia Gadi, na egia Aseri, na ekia Nafutali. 35Goetanana omochie bwonsi nigo orabe ekerengo gie chimoti chilifu ikomi na isano na isato (18,000). Korwa rituko erio omochie oyio nigo orarokwe Omonene Nao Are Aa.”
Currently Selected:
EKEKIELI6 48: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
