DANIELI 1
1
OMOGANO O DANIELI NA ABASANI BAYE ABAGISANGIO
(1:1—6:28)
Danieli na abamwabo bakoirwa Babeli kworokererigwa gokorera omoruoti
1Ase omwaka o gatato bw’okogamba kwa Yehoyakimu, omoruoti bw’Abayuda, Nebukadinesaro, omoruoti o Babeli, agacha Yerusalemu akayoboera. 2Omonene akabeka Yehoyakimu, omoruoti bw’Abayuda, ase okoboko kwa Nebukadinesaro. Boigo akaa Nebukadinesaro ribaga aire ebikorero binde bi’enyomba ya Nyasae, na ere akabiira ase ense ya Shinari,#1:2 Shinari nero Babeli ase enyomba y’enyasae yaye, akabibeka ase ekungo y’enyomba eria.
3Erio omoruoti agachika Asipenasi, omoteneneri bw’abasomba b’enyomba yaye, arente abamura korwa ase egati y’Abaisraeli, abare ab’enyomba y’omoruoti, na abande abarenge ab’amasikani. 4Abamura abwo goika babe abatari na kemocho ase emebere yabo, naende babe abanyabieni, bare abang’aini abaranyare kweorokereria chisemi, barabe abaango b’okomanya, baraisanere gokorera omoruoti ase enyomba yaye. Asipenasi aborokererie bamanye amariko ’Abakalidayo, naende bamanye gokwana Egekalidayo. 5Omoruoti agachika ng’a kera rituko babe bakoegwa endagera buna eria ere omonyene are koria, naende babe bakonywa edivai buna eria ere omonyene are konywa. Nigo barenge gochia kworokererigwa ase engaki y’emiaka etato; nyuma y’ayio barentwe ase obosio bw’omoruoti, babe bakomokorera. 6Ase egati y’abwo bachoretwe, korwa ase Abayuda nabwo aba: Danieli, na Hanania, na Mishaeli, na Asaria. 7Omoteneneri oria omonene akabaroka amarieta amayia, akaroka Danieli Beli‐Tesasari, na Hanania Sadaraka, na Mishaeli Meshaka, na Asaria Abedi‐Nego.
8Korende Danieli akanacha ase ebirengererio biaye ng’a tabaisa gwesoyia ase ogotacheneka ase okoria endagera buna eria omoruoti are koria, gose konywa edivai buna eria omoruoti are konywa. Ase ayio agasaba omoteneneri oria omonene amoe ribaga tabaisa gwesoyia ase ogotacheneka. 9Nyasae akaa Danieli ogwancherwa na obuya ase obosio bw’omoteneneri oria omonene. 10Omoteneneri oria agatebia Danieli, “Nairokire ng’a omonene one omoruoti, oyio obachikerete endagera yaino, na ebinyugwa biaino, ekero arabarore ng’a amasio aino anyirire kobua ay’abamura bande b’ekegori kiaino, nigo arambutore omotwe.”
11Erio Danieli agakwana nomorendi oria obegetwe nomoteneneri oria omonene bw’abasomba b’omoruoti ng’a arende Danieli, na Hanania, na Mishaeli, na Asaria, akamotebia, 12“Koranche ototeeme intwe abasomba bao ase engaki y’amatuko ikomi, obe kogotoa chindagera chikwama korwa ase riroba tokoria, na amache tokonywa. 13Nyuma y’ayio origererie amasio aito na ay’abamura abwo bakoria endagera ekorwa ase omoruoti, na korarore buna tokororekana, otokorere buna oranche.”
14Omorendi oria akaigwera amang’ana aria abo, akabateema ase engaki y’amatuko ikomi. 15Ekero amatuko aria ikomi aerete, amasio abo akarorekana are amaya, na emebere yabo ere emeterere kobua ey’abamura bande, baria barenge koria endagera eria yare korwa ase omoruoti. 16Ase ayio omorendi oria akabatiga tibaria endagera eria, na tibanywa edivai eria, bachikeretwe, akaba okobaa chindagera chikwama korwa ase riroba.
17Nyasae akaa abamura baria bane chisemi na obomanyi bw’okomanya amariko ao ao, na obong’aini bwonsi; naende akaa Danieli obong’aini bw’okomanya engencho y’amaroro ne chindoto.
18Ekero engaki eria yachigetwe nomoruoti Nebukadinesaro ng’a abamura baria bonsi barentwe asare yaigete, omoteneneri oria omonene akabaira ase omoruoti oria. 19Omoruoti agakwana nabarabwo, na ase abwo bonsi onde tanyorekanete omogogetie buna Danieli, na Hanania, na Mishaeli, na Asaria. Ase ayio abwo bane bakaba bakomokorera omoruoti. 20Ase amang’ana ande onsi omoruoti ababoretie igoro y’obong’aini na obomanyi, akabanyora ng’a nigo bamanyete ara ikomi goetania abaringoria na abaragori barenge ase oboruoti bwaye bwonsi. 21Danieli akagenderera kobeera ase enyomba y’omoruoti goika omwaka bwe ritang’ani bw’okogamba kw’omoruoti Koresi.
Currently Selected:
DANIELI 1: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
