EKEKIELI6 31
31
Ense y’Abaasuri na ey’Abamisiri chikoreng’anigwa nomocharake o Lebanoni
1Ase rituko rie ritang’ani, omotienyi o gatato, omwaka o ikomi nomo, ring’ana ri’Omonene rigacha asende, rigantebia: 2“Aye mwanyabanto, kwana na Farao, omoruoti o Misiri, amo nomoganda oye, oborie:”
“Ning’o orareng’anigwe naye ase obonene bwao?
3Naama! Ense y’Abaasuri nigo yarenge buna omocharake o Lebanoni,
obwate chinsagia chingiya chire nekiriri ekiya.
Nigo okinete gochia igoro, ogaetania chinsagia chi’emete ende.
4Omote oyio okaba okonyora amache na gokina;
chinsoko chia inse chikayotambeyia.
Chindooche nigo chiaetanaine ase osimekire,
nyuma yaye chindooche echio chikaba chikonyosia emete yonsi ye rinani amache.
5“Ase ayio omocharake oria ogakina,
Ogatambea ogaetania emete yonsi ye rinani,
chinsagia chiaye chikamentekana,
na ebisagia biaye bigatambea,
ase engencho y’amache amange arengeo akayokinia.
6Chinyoni chionsi chikaagacha ebiswa biabo ase chinsagia chiaye,
ne ching’iti chikabiarera inse ye chinsagia chiaye;
inse y’ekiriri kiaye abanto b’ebisaku bionsi ebinene bikamenyao.
7Omote oria okaba omuya mono ase obonene bwaye
na ase chinsagia chiaye chintambe,
ekiagera emeri yaye yaigete inse ase amache amange arenge.
8Emecharake ende ey’omogondo o Nyasae tiyayoetaneti,
gose emebunduki tiyarenge ne chinsagia buna echiaye;
na emeuru tiyarenge nebisagia buna ebiaye.
Ee, omote onde bw’omogondo o Nyasae
torenge omosiani buna oro.
9Nigo nayokorete okaba omosiani
ase engencho y’obonge bwe chinsagia chiaye,
goika emete yonsi ya Edeni, omogondo o Nyasae,
ekayobwaterwa ribero.
10“Ase ayio, aya naro Omonene Nyasae agoteba: Ekiagera kweimokereretie igoro na ogakina ogaetania emete ende, na enkoro yao ekaenenera obotambe bwaye, 11ninkobeke ase amaboko ay’oyore nokobua ase egati y’ebisaku. Oyio ekeene nigo arayokorere buna anchete, ekiagera inche nayotugutire ase engencho y’ogokora kwaye okobe. 12Abanto b’ebisaku ebigeni, abare abatindi mono goetania ab’ebisaku binde, mbayogeche bayotige inse. Chinsagia chiaye nchigwe, chibeere igoro ase ebitunwa na inse ase amagoko onsi. Ebisagia biaye mbibuneke bibeere ase chindooche chionsi chi’ense eria. Abanto bonsi bare ase ense eria mbatame, barue ase ekiriri kiaye bayotige. 13Ase ritina riaye, erio rirabe rigwete inse chinyoni chionsi nchiche chibeereo, na ase chinsagia chiaye ching’iti chionsi chi’orosana nchibeereo. 14Ayio nigo arakoreke, erinde mote onde bwensi ore ase amache tobaisa kweenenia ase obotambe bwaye, gose gwetambeyia gochia igoro ase amare; gose emete ende yonsi ekonyora amache tekina gochia igoro yeenenie, ekiagera yonsi yachikeirwe ogokwa esoe inse ye riroba ase mwanyabanto bakure basoete.
15“Aya naro Omonene Nyasae agoteba: Ase rituko erio omote oria ogendete aase abakure ngachika ebirero birerwe; nigo natubete chindiba ase engencho yaye, ngatanga chindooche chiaye, nkaochania amache amanene. Nigo nachigete egetunwa kia Lebanoni keyobokerie amagombo, na emete yonsi y’orosana egasusana ase engencho yaye. 16Nigo natengechetie ebisaku ase okogwa kwaye, ekero nayogechete nkayotuguta gochia aase abakure, ase abwo bagendete ase chimbeera. Erio emete yonsi ya Edeni, na eyechorire ere emiya mono ya Lebanoni, yonsi eye ekonywa amache, ekaba ekweremia emenyene agwo inse ye riroba. 17Emete eyio egasoa amo noro gochia aase abakure ase abwo baitetwe nemioro basoete, ee, emete eyio nigo yaikaransete ase ekiriri kiaye ase egati y’ebisaku ase okoyokonya.
18“Norori ase emete yonsi ya Edeni oreng’anigwe naye ase ogosikwa na obonene? Aye noirwe amo nemete ende yonsi ya Edeni, otugutwe inse ye riroba amo nero; nobe amo nabwo batarogeti, abaitetwe nemioro.
“Ayio naro arakoreke ase Farao amo nomoganda oye bwonsi. Omonene Nyasae otebire ayio.”
Currently Selected:
EKEKIELI6 31: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020