EKEKIELI6 3
3
Ezekieli okoria ebuku eringire
1Omonene agantebia, “Aye mwanyabanto, karie egento ekio kwaeirwe; karie ebuku eye, erio ogende gokwana n’Abaisraeli.”
2Ase ayio ngaasamia omonwa one, na ere akang’a ebuku eria inyerie. 3Naende agantebia, “Aye mwanyabanto, karie ebuku eye ngokoa eichore ase enda yao.” Erio nkayeria, egansa ase omonwa one buna obooke.
Ezekieli ogotomwa korenda Abaisraeli
4Erio Omonene agantebia, “Aye mwanyabanto, imoka ogende ase Abaisraeli, okwane nabarabwo amang’ana aane. 5Tindi kogotoma ase abanto bagokwana omonwa omoao otamanyeti, korende ase Abaisraeli. 6Gose tindi kogotoma ase abanto b’ebisaku ebinge bagokwana emenwa emekong’u, abwo ogokwana kwabo otanyare komanya. Ekeene, onye narenge kogotoma gochia ase abanto buna abwo, nigo barenge gokoigwera. 7Abaisraeli tibagokoigwera aye, ekiagera tibari konyigwera inche; Abaisraeli bonsi bakong’irie amasio abo igoro, ne chinkoro chiabo boigo. 8Rora, nakorire obosio bwao bobe obokong’u buna ayabo, na obosio bwao igoro bobe obokong’u buna ayabo. 9Ee, nakorire obosio bwao igoro bobe obokong’u buna rigena rikorokwa elimasi, rire rikong’u kobua amagena ande. Tobairoka gose koboboa ekero orarore amasio abo, ekiagera abwo nigo bare egesaku getari koigwera.”
10Omonene akagenderera gokwana nainche, agantebia, “Aye mwanyabanto, amang’ana onsi nkogotebia oyagache ase enkoro yao ime, oyaigwe namato ao. 11Oimoke ogende ase abanto bamino abwo boosetwe, obatebie ng’a aya naro Omonene Nyasae agoteba, kobaragotegerere gose baange kogotegerera.”
12Erio Omoika okanyimokereria igoro, nkaigwa korwa nyuma yane eriogi buna eri’ogoaka gw’enkoba, rigoteba: “Obonene bw’Omonene botogigwe korwa agwo ase bore!” 13Nkaigwa na eriogi rie chimbaba chi’ebitongwa biria bire moyo chigokunana, na eriogi ri’amagoro aria arenge mbarabare yabo riarenge buna eri’ogoaka gw’enkoba. 14Omoika okanyimokereria igoro, okang’ira aase aao, na inche nkagenda inde nobororo bogwoka ase omoika one, korende okoboko kw’Omonene gokambeka chinguru. 15Ngaika Telabibu ase abanto baria boosetwe bamenyete, ang’e norooche rwa Kebari; nkagenderera kobeera amo nabarabwo aase agwo ase engaki y’amatuko atano na abere inde nomoichano omonene.
Omonene ogochora Ezekieli akurere Abaisraeli
(Ezek 33:1–9)
16Ekero amatuko atano na abere aerete, ring’ana ri’Omonene rigacha asende, rigantebia: 17“Aye mwanyabanto, nakobekire obe omorendi bw’Abaisraeli. Ekero kende gionsi oraigwe ring’ana rikorwa ase omonwa one, aye obatebie ring’ana erio riane ri’okobakurera. 18Kondatebe omokori amabe: Ekeene aye goika okwe, na aye koratige tomokurera, gose tokwana nomokori amabe oyio ase okomokurera, erinde atige chinchera chiaye chi’obobe atoorie obogima bwaye, rirorio omokori amabe oyio nakwe ore ase ebibe biaye, korende amanyinga aye ninyaganie korwa ase okoboko kwao. 19Korende aye korakurere omokori amabe oyio, na ere aange koonchoka korwa ase ebibe biaye, ne chinchera chiaye chi’obobe, oyio goika akwe ore ase ebibe biaye, korende aye omonyene nobe gwatooririe obogima bwao.
20“Naende omonyaboronge karaonchoke atige oboronge bwaye na akore ebibe, inche nimobekere ekegocha ase enchera yaye goika akwe. Onye tikwamokurerete, ere nakwe ase engencho y’ebibe biaye, na ogokora kwaye kw’oboronge akorete ritang’ani tigokoinyorwa, korende amanyinga aye ninyaganie korwa ase okoboko kwao. 21Korende korakurere omonyaboronge ng’a takora ebibe, na ere abe takora ebibe, ekeene, ere nabe moyo, ekiagera aigwerete ogokurerwa, na aye nobe gwatooririe obogima bwao.”
Ezekieli ogosinywa gokwana
22Aroro agwo okoboko kw’Omonene gokambeka chinguru, ere agantebia, “Imoka, ogende ase ense omweya, na aroro aaria inche ninkwane naye.”
23Erio nkaimoka, nkagenda aaria ase ense omweya, na obonene bw’Omonene bogatenena aroro buna boria konya narorire ang’e norooche rwa Kebari; ekero naboroche, ngatung’ama inse, nkaumama. 24Erio Omoika ogasoa ime yane, ogantenenia, na Omonene agakwana nainche, agantebia, “Genda bwesiekere nyomba mwao. 25Korende aye mwanyabanto, rora nosibwe ne chingori, erinde tonyara kogenda ase egati y’abanto bao. 26Inche nimbwatanie oromeme rwao namang’ang’ura, na aye obe rimama osinywe kobakurera; barabwo nigo bare egesaku getari koigwera. 27Korende ekero ndakwane naye, nimaanore omonwa oo, na aye obatebie iga: Aya naro Omonene Nyasae agoteba. Omonto oganetie koigwera, tiga aigwere, na oyo otaganeti koigwera, tiga aange, ekiagera barabwo negesaku getari koigwera.
Currently Selected:
EKEKIELI6 3: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
