EKEKIELI6 29
29
Obobani bore mamincha y’Abamisiri
1Ase rituko ria ikomi na kabere, omotienyi o ikomi, omwaka o ikomi, ring’ana ri’Omonene rigacha asende, rigantebia: 2“Aye mwanyabanto, rigereria gochia ase Farao, omoruoti o Misiri, obane mamincha yaye, na mamincha ya Misiri yonsi. 3Kwana nere, omotebie ng’a aya naro Omonene Nyasae agoteba: Aye Farao, omoruoti o Misiri, rora, inche nigo inde mamincha yao; aye ore enchoka enene eraire gati‐gati ye chindooche chiao, kogoteba: Orooche oro rwa Naili norwane, ninche omonyene narotongete. 4Nimbeke ebigobanio ase chinsea chiao, ntige chinswe chire ase chindooche chiao chibwaterere ase amagonko ao, erio nkong’use nkorusie ase chindooche chiao, amo ne chinswe chionsi chie chindooche chiao chibwatererete ase amagonko ao. 5Ningotugute ase erooro, aye amo ne chinswe chionsi chie chindooche chiao. Omobere oo nogwe ase egetii aarabu. Aye tokorusigwao oirwe; ninkorue obe endagera ye ching’iti chi’orosana na eye chinyoni. 6Erio abanto bonsi abamenyete Misiri mbamanye ng’a inche ninche Omonene.
“Abamisiri nigo barenge buna emoti Abaisraeli begenete. 7Ekero bakoboanetie namaboko abo, aye okabuneka, okabang’waroria amareko abo. Ekero bagwesiirerete okabuneka, ogatengechia ebibono biabo. 8Ase ayio, aya naro Omonene Nyasae agoteba: Rora, nindete omoro igoro yao, nsirie mwanyabanto ne ching’iti. 9Ense y’Abamisiri nesarigwe, ebe bosa; erio Abamisiri mbamanye ng’a inche ninche Omonene.
“Aye Misiri nigo gwatebete: Orooche oro rwa Naili norwane, ninche narotongete. 10Ase ayio, inche nigo inde mamincha yao, na mamincha ye chindooche chiao. Ninsarie ense ya Misiri kegima ebe bosa korwa Migidoli goika Siwene#29:10 Siwene noro Aswani ase orobebe rw’Etiopia. 11Monto onde tagotaara ase ense eyio, gose eng’iti tegotaara goeterao. Ense eyio nebe etamenyiri nabanto ase engaki y’emiaka emerongo ene. 12Ninsarie ense ya Misiri kegima ebe bosa ase egati ye chinse chinde chisaregete. Emechie yao negenderere koba esaregete ase engaki y’emiaka emerongo ene agwo ase egati y’emechie ende eng’anyire egatigwa ere bosa. Ninsiarere Abamisiri gochia ase egati y’abanto b’ebisaku, mbaserie gochia ase chinse ao ao.
13“Aya naro Omonene Nyasae agoteba: Ekero emiaka emerongo ene yaerire, ninsangererie Abamisiri, mbarusie korwa ase egati y’abanto abwo ase basiareretwe gochia. 14Ning’iranie Abamisiri, mbarente bamenye ase ense ya Patirosi, ensemo ya irianyi, ense eyio yarenge eyabo. Aroro agwo mbabe noboruoti botari ne chinguru. 15Oboruoti obwo mbobe oboke goetania amaruoti ande onsi. Tibokonyara kweimokereria igoro boetanie ebisaku binde. Nimbokeyie bobe oboke kegima, erinde tibobaisa kogambera ay’ebisaku binde. 16Tibokogenderera koba ogosemeria ase Abaisraeli. Onye Abaisraeli bagochia korigia ogokonywa korwa ase Abamisiri, rirorio mbabe bakoinyora ebibe biabo, na mbamanye ng’a inche ninche Omonene Nyasae.”
Omoruoti Nebukadinesaro nabue Abamisiri
17Ase rituko rie ritang’ani, omotienyi bwe ritang’ani, omwaka bw’emerongo ebere, na etano na ebere, ring’ana ri’Omonene rigacha asende, rigantebia: 18“Aye mwanyabanto, Nebukadinesaro, omoruoti o Babeli, agatiga abarwani baye b’esegi bagokora emeremo agwo ase omochie o Turo. Kera omotwe ogasunyoka etukia, na kera rireko rikaniaroka. Korende nonya naboigo, ere na abarwani baye b’esegi, tibaakaneretwe ng’eria ende yonsi ase ogokorera Turo emeremo. 19Ase ayio, aya naro Omonene Nyasae agoteba: Rora, nimbeke ense ya Misiri ase okoboko kwa Nebukadinesaro, omoruoti o Babeli; ere naire obotenenku bwa Misiri, nayesakore na koira ebinto bire aroro. Ebinto ebio mbibe eng’eria y’abarwani baye b’esegi. 20Namoeire ense ya Misiri ase okomoakanera emeremo akorete, ekiagera barabwo bankorerete inche emeremo. Nabo Omonene Nyasae atebire.
21“Ase rituko erio nintige orogunchara rw’Abaisraeli romere, nimaanore omonwa oo okwane ase egati yabo. Erio mbamanye ng’a inche ninche Omonene.”
Currently Selected:
EKEKIELI6 29: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
