EKEKIELI6 28
28
Obobani bore mamincha y’omoruoti o Turo
1Ring’ana ri’Omonene rigacha asende, rigantebia: 2“Aye mwanyabanto, tebia omoruoti o Turo ng’a aya naro Omonene Nyasae agoteba: Enkoro yao yeimokereirie igoro, aye nigo ogoteba: Inche nigo inde Nyasae, nigo ing’ikaransete ase ekerogo kia Nyasae ase egati y’enyancha. Korende aye nigo ore mwanyabanto rioka, tori Nyasae, nonya kwarengereirie ase enkoro yao ng’a nigo ore Nyasae. 3Ee, nigo ore omong’aini kobua Danieli, na obobisi tibori bobisekanete korwa asore. 4Obong’aini bwao, na okomanya kwao, biakonyoreire obotenenku obonge; aye gwasangereirie chitahabu ne chifeta ase chikungo chiao. 5Goetera ase obong’aini bwao bw’oboonchoreria, obotenenku bwao bwamentekanire; aye bono kwaenenire ase enkoro yao ase engencho y’obotenenku bwao obonge.
6“Ase ayio, aya naro Omonene Nyasae agoteba: Ekiagera aye kwarengereirie ng’a nigo ore omong’aini buna Nyasae, 7ninkorentere abanto b’egesaku ekegeni, egetindi kebuete ebisaku binde bionsi. Abwo mbakorwanie esegi, erinde basarie obwari obwo kwenyoreire ase obong’aini bwao, na bakore obonene bwao bokomeka‐meka bobe obotachenegeti. 8Mbagotugute gochia ase embeera ime, aye nokwe ogokwa buna okw’abwo baitetwe nemioro bakarutwa agwo ase enyancha ime. 9Ekero orabe ase amaboko abanto abwo, bakogoita, Inee, nogenderere gokwana ase amasio abo ng’a aye Nyasae ore? Aye nigo ore mwanyabanto, orabe ase amaboko ay’abwo bakogoita, tori Nyasae. 10Aye nokwere ase amaboko ’abanto b’egesaku ekegeni, buna abanto batarogeti bagokwa. Ninche Omonene Nyasae nakwanire ayio.”
Okogwa kw’omoruoti o Turo
11Naende ring’ana ri’Omonene rigacha asende, rigantebia: 12“Aye mwanyabanto, bokia amagombo igoro y’omoruoti o Turo, omotebie ng’a aya naro Omonene Nyasae agoteba: Aye nigo kwarenge omoikeranu goetania ebitongwa bionsi bi’obonene; nigo gwaichire nobong’aini, naende kwarenge omosiani omoikeranu. 13Nigo kwamenyete ime ya Edeni, omogondo o Nyasae. Nigo gwachaberetwe namagena ao ao e rigori rinene: Saridio, na topasio, na yasipi, na kurusolito, na berulo, na oiniki, na safiro, na sumaridi, na alimasi. Boigo nigo gwachaberetwe ne chitahabu. Ebinto biao bikobugigwa nigo biaroisetigwe ase rituko riria gwatongetwe. 14Aye nigo kwarenge omokerubi oagetwe amaguta, ogatuba oboagare obonene. Inche nigo nakobegete ase egetunwa egechenu kia Nyasae, agwo ase kwarenge kona‐gotaara ase egati y’amagena are nomorero. 15Chingencho chiao nigo chiarenge ching’ikeranu, korwa rituko erio gwatongetwe goika ekero obobe bwanyorekanete ime yao. 16Ekero gwakorete oboonchoreria obonge, ogaichorwa nobobe; ase igo ogakora ebibe. Ase ayio nkagoseria buna egento getachenegeti, okarua ase egetunwa kia Nyasae, ee, aye omokerubi ogatuba oboagare obonene, nagosiririe korwa ase amagena aria are nomorero. 17Enkoro yao nigo yeimokereretie igoro ase engencho y’obosiani bwao, aye ogasaria obong’aini bwao ase engencho y’obomeka‐meku bwao. Ase ayio ngakoiyeria inse, nkagotiga ase amaiso ’abaruoti bagosekerere. 18Ase engencho y’ebibe biao ebinge, na oboonchoreria bwao botari bw’oboronge, ogakora aase ao aachenegete akaba aatachenegeti. Ngasokia omorero korwa ase egati yao, na omorero oyio okagosiria, ngakoonchora okaba ribu igoro ase ense, agwo ase amaiso ’abanto bonsi bakoroche. 19Abanto bonsi abakomanyete nigo baragoichane. Aye gwaikire ase ogosirigwa gw’okoondokia, tokobao naende nonya ng’ake.”
Obobani bore mamincha ya Sidoni
20Naende ring’ana ri’Omonene rigacha asende, rigantebia: 21“Aye mwanyabanto, rigereria gochia Sidoni, obane mamincha yaye, 22otebe ng’a aya naro Omonene Nyasae agoteba: Aye Sidoni, rora, inche nigo inde mamincha yao, ning’orokie obonene bwane ase egati yao. Ekero ndakonachere ekina na nkworokie obochenu bwane, erio abanto mbamanye ng’a inche ninche Omonene. 23Nindete oborwaire bogoita ime yao, na amanyinga aiteke ase chinchera chiao. Norwanigwe esegi korwa ase chinsemo chionsi, na abanto baitwe bakwere ase egati yao. Erio abanto mbamanye ng’a inche ninche Omonene.
Abaisraeli mbasesenigwe
24“Korende ase Abaisraeli, chimbambo gose amagwa tibikobao bibabete ekero bagendererete komenya ase egati y’abanto abwo babaetanaine babachayete. Erio mbamanye ng’a inche ninche Omonene Nyasae.
25“Aya naro Omonene Nyasae agoteba: Ninsangererie Abaisraeli, mbarusie korwa ase abanto b’ebisaku agwo ase basiareretwe gochia, na ning’orokie obochenu bwane asebare ase amasio ’abanto b’ebisaku; erio mbarente bamenye ase ense yabo eria naete Yakobo, omosomba one. 26Mbamenye nobotoereru ase ense eyio; baagache chinyomba, naende basimeke emesabibu ase emegondo. Barabwo mbamenye nobotoereru, ekero ndanachere abanto bonsi babaetanaine ekina, abwo babachayete. Erio mbamanye ng’a inche ninche Omonene, Nyasae obo.”
Currently Selected:
EKEKIELI6 28: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
