EKEKIELI6 27
27
Ogotera gw’okoreera omochie o Turo
1Ring’ana ri’Omonene rigacha asende, rigantebia: 2“Aye mwanyabanto, tera ogotera gw’okoreera omochie o Turo. 3Otebie Turo oyio ore ase egesoero ki’enyancha, naende ogokora oboonchoreria nabanto abange bamenyete ase chinse chire ang’e nenyancha: Aya naro Omonene Nyasae agoteba:”
“Aye Turo, nigo ogokwana ng’a nigo ore omoseera omoikeranu.
4Chimbebe chiao nigo chiigete enyancha gati;
abaagachi bao nabwo bagokorete okaba omoseera omoikeranu.
5Chibao chiao chionsi
nigo chiaroisetigwe korwa ase emete ekorokwa emebunduki ya Seniri,#27:5 Seniri nakio Herimoni
abanto bakarenta emecharake korwa Lebanoni, bagakoroiseria omoenga.
6Bakaroisia emegango korwa ase emete enga emetontera ya Basani.
Bakaroisia risang’ina riao korwa ase chibao chi’emete emiya
barusetie ase engegu ya Kuporo,
chiachabeire amaino e chinchogu.
7Egetambaa ki’ebieni ao ao kwabegete ase omoenga,
nigo kiaroisetigwe korwa ase egatani engiya ya Misiri;
ekio nigo kiarenge ekemanyererio kiao.
Egietubo kiao ki’ogokenderera kere buru na ekemonyinga,
nigo kiarusetigwe korwa ase ebisinka bi’Elisha.
8Abanto ba Sidoni na ab’Ariwadi nabwo barenge bagosukia amaato ao nemegango.
Aye Turo, abanto abang’aini nigo bamenyete ime yao,
barabwo nigo barenge abagendia be chimeeri chiao.
9Abagaaka amo nabanto abang’aini ba Gebali nigo bamenyete ime yao;
abwo nabwo barenge goticha aase ao aatandogete.
Chimeeri chionsi chi’enyancha nigo chiarenge gocha asore,
na abanto barenge imeo bakaba bakoonchorerania ebinto naye.
10“Abarwani esegi b’Ayemi, na Ludi na Puti, nigo barenge abarwani bao b’esegi. Nigo basungete chinguba chiabo na ebigogwa biabo bi’ebioma ase chinyasi chiao. Barabwo nigo bakorenterete obonene. 11Abarwani esegi b’Ariwadi, amo nabarwani bao b’esegi, bakarenda chindwaki chiao ase chinsemo chionsi, na abanto ba Gamadi nabwo bateneine ase emerobiri yao y’ogotengerera. Barabwo bagasunga ching’aya chiabo ase chinyasi chiao chinsemo chionsi; boigo bagakora oboseera bwao bokaba oboikeranu.
12“Abatarisisi bagacha asore bagakora oboonchoreria naye, okanyora korwa asebare chifeta, na ebioma ao ao, na amabati; naye okabaooneria ebinto ao ao, ekiagera kwabwate obotenenku obonge. 13Naende ogakora oboonchoreria nense ya Giriki, na eya Tubali, na eya Meseki. Chinse echio chigakooneria abanto, ne ebinto bie chitahabu, na aye okabaooneria ebinto biao. 14Abanto ba Togarima bagakooneria chibarasi chi’emeremo na echi’esegi, ne chiyombo, naye okabaooneria ebinto biao. 15Abanto ba Dedani bagakora oboonchoreria naye; boigo abe chinse chinyinge chiarenge ang’e nenyancha bakaba bagokora oboonchoreria naye, bakagoakana amaino e chinchogu ne chibao chi’emete ekorokwa eboni. 16Abasiiria bagakora oboonchoreria naye, ekiagera kwabwate ebinto ebinge bi’obotenenku; bagakorentera amagena e rigori rinene akorokwa alimasi, na erangi emonyinga, na ebitambaa bi’ebieni ao ao, na egatani engiya, na amakorongote, na amagena akorokwa agati, bakagora ebinto biao. 17Abanto ba Yuda na ab’ense y’Abaisraeli bagakora oboonchoreria naye; bagakorentera engano ekorwa Miniti, na amazeituni, na obooke, na amaguta ’amazeituni, na amaguta akogwenia. 18Ekiagera aye nigo kwabwate obotenenku bwa kera egento, na ebinto ebinge kwaroisetie, abanto ba Damesiki bagakora oboonchoreria naye, bagakorentera edivai ya Heliboni, na amarionya amarabu e ching’ondi. 19Boigo abanto ba Wedani na aba Yavani bagakorentera ebioma bikomeka‐meka, na ebinsari bia kasia na ebia kalamusi. 20Abanto ba Dedani bagakora oboonchoreria naye, bagakorentera ebitambaa bi’ebiikaransero bikobekwa ase chibarasi. 21Abanto b’Arabia na abagambi bonsi ba Kedari, bagancha gokorentera chimanwa chie ching’ondi, ne chimingichi, ne chimbori, ase okoonchorerania naye. 22Abaonchoreria ba Seba na aba Raama bagakorentera ebinsari ao ao ebiya mono, na amagena e rigori rinene, ne chitahabu, naye okabaooneria ebinto biao ebiya kwabwate. 23Abanto ba Harani, na aba Kane, na aba Edeni, nabwo abaonchoreria ba Seba, na ab’Asuri, na aba Kilimadi, bagakora oboonchoreria naye. 24Abwo bagakorentera chianga chingiya mono, na ebitambaa bire buru na ebiroisirie ebieni ao ao, na emegeke y’ebieni ao ao, ne chingori chinkong’u. 25Chimeeri chia Tarisisi chikabogoria ebinto bi’oboonchoreria bwao.
“Bono ogaisaneka ogaichorwa nebinto ebinge
agwo ase kwarenge ase egati y’enyancha.
26Abanto barenge gosukia amaato ao nemegango,
bagakoira aase amache amange are.
Omwaga okorwa moocha okagusa ogakobunerao,
agwo ase egati y’enyancha.
27Obotenenku bwao, na ebinto biao bionsi na oboonchoreria bwao,
na abanto bao be chimeeri, na abagendia bao ba chirochio,
na abwo barenge aase ao atandogete,
na abarwani bao bonsi b’esegi abare ime yao,
na omoganda oo bwonsi ore ime yao,
bonsi nigo bararimere ime y’enyancha amo nebinto bionsi,
ase rituko ri’ogosirigwa kwao.
28Eriogi ri’okorera kw’abagendia chimeeri chiao,
nditengechie ense eyio egoetanaine.
29Abanto bonsi abagoata amache nemegango
mbatige chimeeri chiabo;
abagokora emeremo ase chimeeri amo nabagendia,
mbagende ase engegu, bateneneo.
30Abwo mbakoreere aye namariogi amanene,
bare nobororo obonge,
mbasiarere ebuse ase emetwe yabo,
begara‐garie ase ribu igoro.
31Mbakigite chitukia chiabo ase engencho yao,
na beboyie chigunia;
nigo barabe bagokoreera nobororo bwe chinkoro chiabo,
babokie amagombo bare nobororo.
32Ekero barabe bagokoreera, mbabokie amagombo ase engencho yao,
babe bagoteba:
Mochie ki onga buna Turo,
oyo okirigwe bono agwo ase egati y’enyancha?
33Ekero ebinto biao bi’oboonchoreria biaruete ase chinyancha,
nigo gwaisanegetie abanto abange;
obotenenku bwao obonge, na oboonchoreria bwao,
nigo bwatenengetie abaruoti b’ense.
34Bono kwabunirwe na gosirigwa
ime ase chindiba chi’enyancha;
ebinto biao bi’oboonchoreria na abakoreri bao bonsi
barimeire amo naye.
35“Abanto bonsi bamenyete ase ebisinka na ase chinse chire ang’e nenyancha baichanire ase engencho yao, na abaruoti bao bonsi baondokire mono, na obwoba nigo bwarorekanire ase amasio abo. 36Abaonchoreria bare ase egati y’abanto, nigo bagokumirie na kobugia emeroria. Aye gwaikeire ogosirigwa gw’okoondokia, tokobao naende nonya ng’ake.”
Currently Selected:
EKEKIELI6 27: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
