EKEKIELI6 24
24
Oboboosu bw’enyongo
1Ase rituko ria ikomi, omotienyi o ikomi, omwaka o kianda, ring’ana ri’Omonene rigacha asende, rigantebia: 2“Aye mwanyabanto, rika erieta rie rituko ria rero, ekiagera rituko eri nario omoruoti o Babeli achire korwania Yerusalemu. 3Kwana nabanto aba batari koigwera, obatebie omoreng’anio. Otebe ng’a aya naro Omonene Nyasae agoteba:”
“Tereka enyongo riko, ee, oyetereke,
oumore amache ime yaye.
4Obeke ebitari bie chinyama imeo,
bionsi ebire ebiya, ekenama ne rireko,
oyeichorie amauga, ochore ayare amaya.
5Ebitari ebio obirusie korwa ase eng’ondi enchore ere ase riicho riao;
otumbe chinko chinyinge inse y’enyongo,
oute omorero obiyeke buya,
oiyekeranie amauga amo.
6“Ase ayio, aya naro Omonene Nyasae agoteba: Obobe nobw’omochie oyo oiterete amanyinga ’abanto, oyio onga buna enyongo eroisirie korwa ase etaai yaboosire, na oboboosu bwaye tibokorwao. Orusie korwa imeo egetari ase egetari otari gochora ng’a nkereki okorusia. 7Amanyinga ’abanto b’omochie oyio oiterete nigo agendererete kobeera imeo. Tayaumorete ase riroba riyatube na koyabisa, korende nigo ayaumorete igoro ase egetare. 8Nigo natigete amanyinga ayio aiteretwe agenderere kobeera igoro ase egetare atatubiri, erio nario aragere imbe nendamwamu na ndusie egesiomba.
9“Ase ayio, aya naro Omonene Nyasae agoteba: Obobe nobw’omochie oyo oiterete amanyinga ’abanto! Nainche boigo nintumbe chinko chibe chinyinge, ase omorero. 10Beka chinko chinyinge, na omorero ogenderere gwoka mono, erinde oiyeke chinyama chiyie kegima, na omosori oyie oere, na amauga ayie arigise. 11Erio otige enyongo eyio ere bosa igoro ase omorero bw’amakara, eyie esambwe, erinde etaai y’enyongo eyio eyie ebariire burure; riko rire imeo rigokomoke, na oboboosu bw’enyongo eyio boyie bonyititoke boere. 12Inche nabeire nkwerosia ngokora emeremo bosa. Oboboosu bw’enyongo eyio tibokoruao neisa gosambwa nomorero. 13Kwabeire oyotachenegeti ase engencho y’obonyaka bwao. Nateemire kogochena, korende tochenegeti. Tokonyara gocheneka korwa ase ogotacheneka kwao goika inche ndete endamwamu yane igoro asore. 14Ninche Omonene nakwanire ayio. Goika aikerane. Ninkore ring’ana erio, tingotiga. Tinkoba namabera, gose tingweitia. Goika onacherwe ekina koreng’ana ne chinchera chiao, na ogokora kwao. Nabo Omonene Nyasae atebire.”
Ogokwa kw’omokungu bw’omobani
15Naende ring’ana ri’Omonene rigacha asende, rigantebia: 16“Aye mwanyabanto, rora, goetera ase ogokwa kwa mobosokano nindusie korwa asore oyore omogoko bw’amaiso ao; nonya naboigo tomoreera gose kobokia amagombo, gose amariga taiteka korwa ase amaiso ao. 17Oichane, korende oremererie torera; tobaisa koreera oria okure. Bwetube egetambaa ase omotwe oo, obeke ebikoroto ase amagoro ao. Tobaisa gotuba obosio bwao, gose tobaisa koria endagera y’ebirero.”
18Mambia rituko ria kabere ngakwana nabanto, na mogoroba yaye omokungu one agakwa. Rituko riare koribwatia ngakora buna konya nachikirwe. 19Erio abanto bakamboria, “Nonyare gototebia engencho y’amang’ana aya, na eyagera gwakora iga?”
20Erio nkabairaneria, nkabatebia ng’a ring’ana ri’Omonene ndiacha asende, rigantebia: 21“Kwana n’Abaisraeli, obatebie ng’a aya naro Omonene Nyasae agoteba: Rora, ninkore Aase aane Aachenu abe aatachenegeti, aase ayio are obonene bwe chinguru chiaino, na omogoko bw’amaiso aino, na okogania kw’emioyo yaino. Abana baino, abamura na abaiseke, abwo mwatigete nyuma, mbaitwe nemioro. 22Nainwe nabo morakore buna inche nakorire. Timobaisa gotuba chinderu na emenwa, gose timoria endagera y’ebirero. 23Erio motige ebitambaa bibe ase emetwe yaino, na ebikoroto ase amagoro aino. Timobaisa kobokia amagombo gose korera, korende imoree ase engencho y’ebibe biaino, na mobe mokorererana. 24Ase enchera eyio Ezekieli nabe ekiorokererio asemore. Inwe mokore kera egento agokora. Ekero amang’ana ayio araikeranigwe, erio momanye ng’a ninche Omonene Nyasae.”
25Erio Omonene agantebia, “Aye mwanyabanto, nomanye ng’a ase rituko erio ndarusie korwa asebare ekio kere chinguru chiabo, na omogoko obo, na obonene bwabo, na omogoko bw’amaiso abo, na okogania gwe chinkoro chiabo, naende abana babo, abamura na abaiseke, 26ase rituko erio omonto oratooreke natame gochia asore, akorentere amang’ana. 27Erio omonwa oo nokunorwe ochake gokwana nomotami oria, tokogenderera koba rimama; ase igo aye nobe ekiorokererio ase abanto abwo, nabarabwo mbamanye ng’a inche ninche Omonene.”
Currently Selected:
EKEKIELI6 24: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
