EKEKIELI6 23
23
Ebibe bia Samaria na Yerusalemu
1Ring’ana ri’Omonene rigacha asende, rigantebia: 2“Aye mwanyabanto, mbarenge abaiseke babere ba ng’ina omo. 3Ekero barenge abaiseke bagakora obonyaka agwo Misiri. Aroro agwo bakaba bakobwatwa‐bwatwa chimbeere chiabo, bagasiria obwekungi bwabo. 4Oria omonene nigo arenge korokwa Ohola, na oria omoke Oholiba. Abwo bakaba abaane, bakaibora abana, abamura na abaiseke. Engencho y’amarieta abo nero ere: Ohola nere Samaria, na Oholiba nere Yerusalemu. 5Ohola, ekero arenge oyone, nigo arenge gokora obonyaka, akaba nokogania okobe ase abanchi baye Abaasuri. 6Barabwo nigo barenge abarwani esegi, barenge kobeka chianga chimonyinga, barenge abagambi na abachiki bonsi nigo barenge abamura abaya bagosanerwa, barenge abariini chibarasi. 7Ase ayio agakora obonyaka nabasacha bonsi b’Abaasuri, abarenge nebieni ebiya, na ase enchera eyio agesoyia ase ogotacheneka ase ogosasima emegwekano y’abwo barenge nokogania okobe asare. 8Ohola tatigete obonyaka bwaye, boria anarete gokora korwa ekero arenge Misiri, ekiagera ase oboiseke bwaye abasacha nigo barenge gokora obonyaka nere, bagasiria obwekungi bwaye, bakaumora okogania kwabo okobe igoro asare. 9Ase ayio nkamorua na komobeka ase amaboko abanchi baye Abaasuri, abwo arenge nokogania okobe asebare. 10Ekero barabwo bamokorerete obosooku obwo, bakaira abana baye, abamura na abaiseke, ere akaba okorabaarwa nabakungu bande ekero anacheretwe ekina.
11“Nonya Oholiba, mosubati omwaabo, oroche ayio, ere nigo abete omosareku goetania ase okoba nokogania okobe, na gokora obonyaka; obobe bwaye nigo bwabete obonge goetania obwa Ohola, mosubati omwabo. 12Akaba nokogania okobe ase abamura b’Abaasuri, abwo barenge abagambi, na abachiki, na abarwani esegi beboeranetie ebirwanero, na abariini be chibarasi. Bonsi nigo barenge abamura abaya b’ogosanerwa. 13Nkamorora bwesoirie ase ogotacheneka; bonsi babere, ogokora kwabo nigo kwarenge okomo.
14“Korende Oholiba akagenderera koba omonyaka goetania. Akarora emegwekano y’abasacha emeng’eire ase enyasi, eyarenge emegwekano y’Abakalidayo, yaakire erangi embariri ye rigori rinene. 15Nigo yasibeire chinkini ase ebinema biabo na emetwe yabo nigo yanareire ebitambaa ebiya mono. Abasacha baria bonsi nigo baare kororekana ng’a nabarwani abanene. Ekero aroche emegwekano eyio y’abanto ba Babeli, ababiare b’ense ya Kalidayo, 16akaba nokogania okobe asebare, agatoma abanto ase ense ya Kalidayo ase abanene abwo konya arorire emegwekano yabo. 17Abanene ba Babeli bagacha, bagakora obonyaka nere, na ase okogania koria okobe bakamosoyia ase ogotacheneka, na nyuma gasoigwe ase ogotacheneka, akabatiga, akabagecha. 18Korende akagenderera gokora obonyaka bwaye maiso marore, akaorokia nobogetirianda bwaye, goika inche nkagechigwa nere buna nagechetigwe na Ohola, mosubati omwabo. 19Nonya naboigo akagenderera gokora obonyaka bwaye maiso marore; akaba okoinyora amatuko ’oboiseke bwaye, ekero arenge gokora obonyaka ase ense ya Misiri. 20Ere akaba nokogania okobe ase abatomani baria baare nokogania kw’omobere buna chitigere chire, naende bagasokia oroiboro buna chibarasi chigosokia orwabo. 21Bono aye kwaganirie obonyaka bw’oboiseke bwao, buna ekero Abamisiri barenge kobwata‐bwata chimbeere chiao chiarenge echi’oboiseke bwao.
Egesusuro kia Nyasae ase Oholiba
22“Ase ayio, aye Oholiba, aya naro Omonene Nyasae agoteba: Naama! Ninseegete abanchi bao abwo kwagechetigwe nabarabwo, nimbarente bakorwanie korwa ase chinsemo chionsi. 23Ee, nindete abanto ba Babeli, na Abakalidayo bonsi, na abanto ba Pekodi, na aba Soa, na aba Koa, na Abaasuri bonsi mbache amo nabwo; bonsi nigo barenge abamura abaya b’ogosanerwa, na abagambi, na abarwani abanene, bonsi nabariini chibarasi barenge. 24Mbagochere babwate ebirwanero, ne chigari ao ao, na omoganda omonene bw’abanto babwate chinguba, ne ching’aya, babegete ebigogwa bi’ebioma, bakoumokere korwa chinsemo chionsi. Inche nimbachike bakonachere ekina kobwatekana namachiko abo. 25Nimbe nekeririanda asore, ng’ee barabwo ribaga babe abatindi mono asore. Mbakobutore chimioro na amato, na abatigari babo mbaitwe nemioro. Abanto abwo mbaire abana bao, abamura na abaiseke, na abatigari bao mbasambwe nomorero. 26Boigo mbakorusie chianga, na baire ebinto biao ebiya bwechaberete. 27Ase enchera eyio ninsirie obosooku na obonyaka bwao kwarentanete korwa ase ense ya Misiri, erinde tobaisa korigereria Abamisiri, gose koinyora ense eria naende.
28“Aya naro Omonene Nyasae agoteba: Naama! Ninkobeke ase amaboko ’abanto abwo ogechete, baria kwagechetigwe nabarabwo okabatiga. 29Barabwo mbakogeche mono, bakoure ebinto biao bionsi, ebio gwechanderete okabinyora. Nigo baragotige kore getirianda, otari na gento ogwetuba. Erio obosooku bw’obonyaka bwao bororekane. Obosooku bwao na obonyaka gwakorire 30biakorenteire amang’ana ayio, ekiagera gwakorire obonyaka nabanto b’ebisaku, na ogwesoyia ase ogotacheneka ase ogosasima emegwekano yabo. 31Aye kwabwatirie chingencho chia mosubati omino. Ase engencho eyio ninkoe egekombe ki’egesusuro buna eki naruete asare.
32“Aya naro Omonene Nyasae agoteba:
“Aye nonywere egekombe ki’egesusuro giaetwe mosubati omino,
kere ekegare naende egetambe gochia inse.
Nosekererwe ase ogochaywa,
ekiagera egekombe ekio nigo geichire.
33Nigo oratinde mono, naende obe nobororo obonge.
Egekombe ekio gia Samaria, mosubati omino,
negekombe ki’obwoba na ogosirigwa.
34Nigo orabetererigwe onywe okoore ekenyugwa ekio gionsi,
ee, goika omene ebisamunye biaye kogiatekire,
naende oarie chimbeere chiao nabirobio.
Ninche Omonene Nyasae nakwanire ayio.
35“Ase ayio, aya naro Omonene Nyasae agoteba: Ekiagera kwanyebire inche, naende kwaonchokire, kwang’eire omogongo, goika obogorie egesusuro ekio ase engencho y’obosooku na obonyaka bwao.”
Egesusuro kia Nyasae ase Ohola na Oholiba
36Omonene agantebia, “Aye mwanyabanto, Inee, nonachere Ohola na Oholiba ekina? Onye nabo, obatebie ogokora kwabo gw’okogechia. 37Barabwo bakorire obotomani, na baiteire amanyinga ’abanto namaboko abo; bakorire obotomani nemegwekano yabo bagosasima. Basambire abana babo banyiborerete babeire endagera y’emegwekano eyio. 38Tari ayio oka bakorete asende, korende ase rituko erio nigo bakorete Aase aane Aachenu akaba aatachenegeti, naende bagakora Chisabato chiane chikaba echitachenegeti. 39Nigo banyenyete abana babo bakaba ebing’wanso ase emegwekano yabo bagosasima ase rituko erio bachete Aase aane Aachenu, bagaakora akaba aatachenegeti. Rora, amang’ana ayio naro bakorete ase enyomba yane ime.
40“Naende nigo batomete amang’ana bakarangeria abanto korwa chinse chi’aare. Barabwo bagacha, na ase engencho yabo aye ogesibia, ogeaka amaiso ao chirangi ao ao, na ogechabera nebinto ebiya. 41Erio ogaikaransa igoro ase egeikaransero ki’obonene, na emesa iyarenge bosio bwao, na igoro ase emesa eria okabekao ubani yane, na amaguta aane. 42Amariogi ’okwoga akaigugwa korwa agwo, na amo nabanto barengeo batari namasikani; abande abagotinda bakarentwa korwa ase erooro, na barabwo bakabekera abakungu ebigera ase amaboko abo, ne chigutwa chingiya ase emetwe yabo. 43Erio nkeboria: Inee! Abanto aba abanyaka nigo bagochia gokora obonyaka nomokungu oyo okorire obonyaka ase engaki entambe? 44Barabwo bakaba bagosoa ase omokungu oyio buna abasacha bagosoa ase omokungu omotayayi. Ase igo abasacha abwo bagasoa ase Ohola na Oholiba bagakora obonyaka. 45Abanto abanyaboronge mbabanachere ekina buna ekio abakungu abatomani na abaiti bakonacherwa, ekiagera barabwo nigo bare abatomani, na baiteire amanyinga ’abanto namaboko abo.”
46Aya naro Omonene Nyasae agoteba: “Nimbarentere omoganda bw’abanto babakorere bobe na kobasakora. 47Abanto abwo mbabaake amagena, naende mbabaite nemioro yabo. Boigo mbaite abana babo, abamura na abaiseke, basambe chinyomba chiabo nomorero. 48Ase enchera eyio ninsirie obonyaka boria korwa ase ense yaino, erinde abakungu bande beorokererie tibabaisa gokora obonyaka buna obwo. 49Egesusuro ki’obonyaka bwaino nkebe igoro yaino, ee, imonyore egesusuro ki’ebibe biaino bi’ogosasima emegwekano. Erio momanye ng’a inche ninche Omonene Nyasae.”
Currently Selected:
EKEKIELI6 23: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
