EKEKIELI6 22
22
Ebibe bia Yerusalemu
1Ring’ana ri’Omonene rigacha asende, rigantebia: 2“Aye mwanyabanto, Inee, nonachere omochie oiteire amanyinga ’abanto abange ekina? Onye nabo, yworokie ebibe biaye bionsi bi’okogechia, 3oyotebie: Aya naro Omonene Nyasae agoteba: Aye omochie gwaiteire amanyinga ’abanto ase egati‐gati yao, na gwesoirie ase ogotacheneka ase ogosasima emegwekano, bono engaki yao yaikire. 4Aye kwabeire nokomocha, ekiagera gwaitire abanto abange, naende gwesoirie ase ogotacheneka ase ogosasima emegwekano kwaroisirie. Ase engencho eyio kwagerire amatuko ao asukire gocha ang’e; gwaikire omoerio bw’emiaka yao. Bono ningotige ochaywe nabanto b’ebisaku, na ochecherigwe ne chinse chionsi. 5Abwo bamenyete ang’e naye, na abwo bare aare, mbagochecherie aye otari nerieta rigiya, oichire neburuburu. 6Rora, abagambi b’Abaisraeli bamenyete ime yao, kera oyomo nigo asemeretie chinguru chiaye omonyene ase ogoitera amanyinga. 7Aye omochie, abaise na abang’ina abare ime yao bachayirwe, na abamenyi bamenyete ime yao bakoreirwe bobe, ne chintakana na ababoraka boigo. 8Gwachayire ebinto biane ebichenu, naende gwakorire Chisabato chiane chiabeire echitachenegeti. 9Abang’achi bande bamenyete ime yao bakogera amanyinga aiteka. Abanto bao bande nigo bakoriera ebing’wanso igoro ase ebitunwa; na abande nigo bare abatomani, 10na abande nigo bagotomana nabakungu b’abaise, na abande nigo bakoba nabakungu kobare nomotienyi. 11Omonto oyomo nigo agokora ebibe bi’okogechia ase ogotomana nomokungu bw’omonto onde, na oyonde okora ay’okogechia ase okoba na moka momura oye, na oyonde okora ay’okogechia ase okoba nomoiseke omwabo, omwana o ise. 12Abanto bao bande nigo bakoegwa riaaki baita abande. Aye nigo okorua singo gwasaba ebitoki ase okwementera, aye nigo okwenyorera ebitoki ase okorianania omogisangio oo, naende kwanyebire inche. Nabo Omonene Nyasae agoteba.
13“Ase igo, rora ninduta‐rute amaboko aane igoro ase ebitoki bi’oborianania kwanyorire, na ase amanyinga ’abanto gwaitire ase egati yao. 14Ase amatuko ndarente egesusuro asore, Inee, nogenderere koba noboremu gose amaboko ao nabe ne chinguru? Ninche Omonene nakwanire ayio, goika inyaikeranie. 15Ninsiarere abanto bao gochia ase egati y’abanto b’ebisaku, na gochia ase chinse chinde. Ninsirie ogokora okobe korwa asore. 16Aye nigo orasoigwe ase ogotacheneka ase amasio ’abanto b’ebisaku, erio omanye ng’a inche ninche Omonene.”
Eriko ri’omorero ria Nyasae rigochena
17Ring’ana ri’Omonene rigacha asende, rigantebia: 18“Aye mwanyabanto, Abaisraeli babeire asende buna amabiria. Bonsi nigo banga buna etaai, ne ribati, na ekioma, ne risasi, bire ase eriko ri’omorero, ee, beonchoire babeire buna amabiria e chifeta. 19Ase ayio, aya naro Omonene Nyasae agoteba: Ekiagera inwe mwensi mwabeire buna amabiria, rora nimbasangererie, mbarente ase egati‐gati ya Yerusalemu, 20buna abanto bagosangereria amagena e chifeta, na aye chitaai, na ay’ebioma, na ay’amasasi, na ay’amabati, na bayabeka ase eriko ri’omorero ase okoyanyititora. Naboigo ndabasangererie inwe inde nendamwamu na ekeririanda, imbabeke imeo mbanyititore. 21Ee, nimbasangererie mbautere omorero bw’endamwamu yane, na inwe monyititokere imeo. 22Buna efeta ekonyititorwa ase eriko ri’omorero naboigo nainwe moranyititorwe ase egati‐gati y’omochie oyio; erio momanye ng’a ninche Omonene naumoire endamwamu yane igoro asemore.”
Ebibe bi’abaraai b’Abaisraeli
23Ring’ana ri’Omonene rigacha asende, rigantebia: 24“Aye mwanyabanto, otebie ense: Aye nigo ore ense etachenegeti, gose embura tegotwa igoro asore ase rituko ri’endamwamu yane. 25Ababani bareo bakorire emeroberio emebe, nigo banga buna chindo chikoruma chigotandorana ebi chiaitire. Barabwo basiririe emioyo y’abanto, na bairire chinibo chiabo, na ebinto bi’amagori amanene; bagerire abakungu abange batigaire bare ababoraka ase omochie ime. 26Abakuani baye basaririe ogochika kwane, na bakorire ebinto biane ebichenu biabeire ebitachenegeti. Tibakoreti ogwatananekana ase egati y’egento kere egechenu, na egetari egechenu, gose tiborokerereti abanto baatanane ebinto bitachenegeti korwa ase ebichenegete, naende bamiamirie amaiso abo ng’a tibasika Chisabato chiane, na ase enchera eyio bankorire koba buna oyo otachenegeti ase egati yabo. 27Abagambi baye nigo banga buna chisese chi’orosana chigotandorana ebi chiaitire. Baitire abanto abange ase okwenyorera ebitoki ase enchera etari ey’obwegenwa. 28Ababani babo babaakire echooka etochoganiri buya; nigo bakobarorera amaroro ’oborimo na kobaringoreria oborimo, bateba: Aya naro Omonene Nyasae agoteba, na Omonene takwaneti bo. 29Abanto b’ense eyio bakorire obobe bw’ogochanda abande, begeire obouri, naende bachandire abataka na abaremeire, boigo bakorire abamenyi bobe, batari noboronge bw’ogokora bo. 30Nkarigia omonto ase egati yabo oranyare koagacha orwaki, na gotenena ase obosio bwane aase agwo atagoretwe, erinde akengere ense eyio, timbaisa koyesaria, korende tinanyorete onde. 31Ase ayio naumoire ekeririanda kiane igoro asebare; nabasiririe nomorero bw’endamwamu yane. Ogokora kwabo nkobairanere. Nabo Omonene Nyasae atebire.”
Currently Selected:
EKEKIELI6 22: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
