EKEKIELI6 21
21
Omoyio omwoge bw’Omonene
1Ring’ana ri’Omonene rigacha asende, rigantebia: 2“Aye mwanyabanto, rigereria gochia Yerusalemu, orarie ring’ana rire mamincha y’Aase Aachenu, na obane mamincha y’ense y’Abaisraeli. 3Otebie abanto b’ense eyio ng’a aya naro Omonene agoteba: Rora inche nigo inde mamincha yao, ninsomore omoyio one korwa ase ekeraaro, ninsirie korwa asore abanyaboronge amo nabakori amabe. 4Ekiagera ninsirie korwa asore abanyaboronge amo nabakori amabe, omoyio one nosomorwe korwa ase ekeraaro kiaye, oite abanto bonsi korwa irianyi goika sugusu. 5Erio abanto bonsi mbamanye ng’a ninche Omonene nasomoire omoyio one korwa ase ekeraaro kiaye, tinkoyoirania ime naende.
6“Aye mwanyabanto, ichana, ee, ichana obe buna oyo obunekire chibachwa, obe nobororo ase amasio ’abanto abwo. 7Ekero barakoborie: Nase ki oichanete iga? Obairanerie, obatebie: Nase engencho y’amang’ana amabe agochi gocha. Ekero arache, kera omonto nairianyeke ase enkoro yaye, na amaboko ’abanto bonsi naborwe chinguru; kera omonto nakwe omoyo, na amaru ’abanto bonsi nororobe abe buna amache. Naama! Amabe ayio ngocha are, goika aikeranigwe. Nabo Omonene Nyasae atebire.”
8Naende ring’ana ri’Omonene rigacha asende, rigantebia: 9“Aye mwanyabanto, bana otebe ng’a aya naro Omonene agoteba: Otebe iga:
“Omoyio otierigwe, ee, otierigwe na gosenigwa;
10otierigwe, erinde oite ogoita okonene,
osenigwe, erinde omese buna okomesa gw’enkoba.
Inee! Inatoyogokere?
Enyimbo y’omwana one nigo yachayete kera omote.
11Ase ayio omoyio oyio orurwe otierigwe,
erinde obekwe ang’e okorerwe emeremo;
otierigwe na gosenigwa, obekwe ase okoboko kw’omoiti.
12Aye mwanyabanto, rera na goichana!
Omoyio oyio orentirwe oite abanto baane,
oite na abagambi b’Abaisraeli.
Barabwo barurwe baitwe nomoyio amo nabanto baane.
Ase ayio aka amariagati ao.
13Okorengwa nkoreo.
Inee! Naki gwachayete enyimbo?
Tekonyara koba buya asore.
Nabo Omonene atebire.
14“Aye mwanyabanto, bana oake chinkobi. Tiga omoyio oyio ogochia goita omentwe chinguru ara kabere, nonya ng’ara gatato; oyio nomoyio bw’ogoita bw’oyio omonene, na omoyio oyio obaetananire ase chinsemo chionsi. 15Nabekire ensonga y’omoyio oyio agwo ase ebiita biabo bionsi, erinde chinkoro chiabo chirianyeke, na abange babo bagwe. Omoyio oyio otierigwe bwogee na komesa, osomoirwe ase ogoita. 16Ebeke ang’e oetere, orenge ensemo ya borio na eya bomosi, aande onsi ase obwoge bochigete. 17Inche boigo ning’ake chinkobi, ing’isanekie ekeririanda kiane. Ninche Omonene nakwanire.”
Omoro bw’omoruoti o Babeli
18Naende ring’ana ri’Omonene rigacha asende, rigantebia: 19“Aye mwanyabanto, eroiserie chinchera ibere chikworokia ase omoro bw’omoruoti o Babeli oraetere. Echio ibere nigo chirarwe ase ense eyemo. Naende otenenie ekemanyererio ase amatabekania ’omochie. 20Bworokie enchera ase omoro oraetere, eyemo gochia ase Raba ase ense y’Abaamoni, na eyende ase Yerusalemu, omochie ogiteire chindwaki, ase ense y’Abayuda. 21Omoruoti o Babeli nigo ateneine ase amatabekania e chinchera chiria ibere ogokora oboringoria; nigo agotierania chinsara, na okoboria korwa ase ebinyasae biaye, naende nigo akorigereria riini.#21:21 korigereria riini, engencho y’Abababeli y’okomanyera amabe na amaya 22Ase okoboko kwaye gw’okorio obomera nigo bokogwera Yerusalemu, erinde abekeo ebikorero bi’ogotagorera, arere okorera kw’ogoita na goaka eriogi ri’esegi. Nigo arabekeo ebikorero bi’ogotagorera ebiita, na koagacha chiburi ne chindwaki chi’ogwekengera. 23Korende ase abanto ba Yerusalemu amang’ana ayio nigo ararorekane koba oboringoria bw’oborimo, ekiagera bariereranete eira y’ogotianania. Korende nigo aragere ebibe biabo biinyorwe, erinde babwatwe. 24Ase ayio, aya naro Omonene Nyasae agoteba: Ekiagera mwagerire ebibe biaino biainyoirwe, na ogosaria kwaino gwakorirwe kororekane maiso marore, na ase ayio onsi mwakorire, ebibe biaino biarorekanire, ee, ekiagera mwainyoirwe iga, inamobwatwe nokoboko gwe chinguru.”
25“Aye otachenegeti, aye omokori amabe ore omogambi bw’Abaisraeli, rituko riao ri’okonyora egesusuro ki’omoerio ki’ebibe biao riaikire. 26Rusia egetambaa kia motwe amo negutwa. Amang’ana takogenderera koba buna are bono. Ayio konya akeeigwe naimokererigwe igoro, na ayio konya aimokererigwe igoro nakeeigwe. Nabo Omonene Nyasae agoteba. 27Ning’onchorane oboruoti obo, ee, nimboonchorane, nimboonchorane; tibobao nonya ng’ake goika oyio oboruoti obo bore obwaye achiche, oyio nere ndaboe.
Omoyio na Abaamoni
28“Aye mwanyabanto, bana otebe ng’a aya naro Omonene Nyasae agoteba igoro y’Abaamoni, na igoro y’okorama kwabo, otebe:
“Omoyio, ee, omoyio osomoirwe ase ogoita,
otierigwe na gosenigwa,
nigo okomesa buna enkoba.
29“Nigo bakobarorera inwe amaroro ’oborimo, na kobaringorera ay’oborimo, bateba ng’a monyare koba abamogotacha ebigoti bi’abakori amabe abwo batachenegeti, ekiagera rituko riabo riachire baraegwe egesusuro ki’omoerio ki’ebibe biabo.
30“Irania omoyio ase ekeraaro kiaye! Agwo ase ense mwatongeretwe, ense y’obobiare bwaino, nao ndabanachere ekina. 31Nimbaumorere ekeririanda kiane, na mbautere omorero bw’endamwamu yane; nimbabeke ase amaboko ’abanto abatindi, abamanyete goita na gosiria kegima. 32Inwe mobe chinko chigouterwa omorero; amanyinga aino naiterwe igoro ase ense. Timokoinyorwa nonya ng’ake. Ninche Omonene nakwanire ayio.”
Currently Selected:
EKEKIELI6 21: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
