EKEKIELI6 20
20
Ogwancha kwa Nyasae na ogosaria kwa mwanyabanto
1Ase rituko ria ikomi, omotienyi o gatano, omwaka o gatano na kabere, abagaaka bande b’Abaisraeli bagacha koboria amang’ana korwa ase Omonene, bagaikaransa ase obosio bwane. 2Erio ring’ana ri’Omonene rigacha asende, rigantebia, 3“Aye mwanyabanto, kwana nabagaaka abwo b’Abaisraeli, obatebie ng’a aya naro Omonene Nyasae agoteba: Inee! Nigo mwachire koboria momanye amang’ana korwa asende? Ekeene, buna inche inde moyo, tingwancha mborigwe amang’ana nainwe. Ninche Omonene natebire ayio.
4“Aye mwanyabanto, Inee, noganetie kobanachera ekina? Aye nobanachere ekina? Onye naboigo rirorio bamanyie ogokora kw’okogechia gwe chisokoro chiabo, 5obatebie ng’a aya naro Omonene Nyasae agoteba: Ase rituko riria nachorete Abaisraeli, nigo nariete eira y’ogotiana ase ororeria rwa Yakobo, nkeorokia na kwemanyekania asebare, agwo ase ense ya Misiri. Nigo natianete asebare, ngateba: Inche ninche Omonene, Nyasae oino. 6Rituko riria nigo natianete asebare, nkabatebia ng’a nimbarusie korwa ase ense ya Misiri, mbaire ase ense konya nabanyoreire, ense entenenku ere namabeere na amooke, ense ere nobonene goetania chinse chionsi. 7Nkabatebia iga: Kera oyomo oino tiga atugute korwa asare ebinto bi’okogechia ebio anchete korigereria, timobaisa gwesoyia ase ogotacheneka ase engencho y’emegwekano eyio Abamisiri bagosasima. Inche ninche Omonene, Nyasae oino. 8Korende abanto abwo bagasaria asende, bakaanga konyigwera. Nonya noyomo tatugutete ebinto ebio bi’okogechia banchete korigereria, gose onde tatigete emegwekano eyio Abaisraeli barenge gosasima. Erio nkarengereria kobaumorera endamwamu yane, agwo ase ense ya Misiri. 9Korende ayio nakorete nigo nayakorete ase okorenda erieta riane tirikorwa ribe eritachenegeti nebisaku ebio Abaisraeli bamenyete ase egati yabo. Ase amasio ’ebisaku ebio nemanyekanetie ase Abaisraeli ase okobarusia ase ense ya Misiri.
10“Ase ayio nkabarusia korwa ase ense ya Misiri, nkabarenta ase erooro. 11Agwo nkabaa emeroberio yane echikire, na nkaborokereria amachiko aane, na omonto orayabwate nabe moyo goetera asaro. 12Naende nkabaa Chisabato chiane chikaba ekemanyererio ase egati yane na barabwo, erio banyare komanya ng’a ninche Omonene nkobachena. 13Korende Abaisraeli bagasaria asende, agwo ase erooro; tibabwatetie emeroberio yane echikire, korende bakaanga amachiko aane ayio omonto karayabwate nabe moyo goetera asaro. Bagasaria mono Chisabato chiane, bagachikora chikaba echitachenegeti. Erio nkarengereria kobaumorera endamwamu yane agwo ase erooro, mbasirie kegima. 14Korende ayio nakorete nigo nayakorete ase okorenda erieta riane tirikorwa ribe eritachenegeti ase amasio ’abanto b’ebisaku, abwo ase narusetie Abaisraeli korwa. 15Naende nkaria eira y’ogotiana agwo ase erooro ng’a tinkobaira ase ense eria konya nabaeire, ense entenenku ere namabeere na amooke, ense ere nobonene goetania chinse chinde chionsi. 16Aya nigo nayakorete, ekiagera baangete amachiko aane, bakaanga kobwatia emeroberio yane echikire; bagakora Chisabato chiane chikaba echitachenegeti. Chinkoro chiabo nigo chianchete emegwekano yabo barenge gosasima.
17“Nonya naboigo nkabarorera amabera, gose tinabasiretie kegima agwo ase erooro. 18Nigo nakurerete abana babo agwo ase erooro, nkabatebia: Inwe timobaisa kobwatia emeroberio eyio chisokoro chiaino chiachigete, gose timobaisa konara chingencho chiabo, gose timobaisa gwesoyia ase ogotacheneka ase ogosasima emegwekano yabo. 19Inche ninche Omonene, Nyasae oino; mobwatie emeroberio yane echikire. Mobwatie amachiko aane na koyakora! 20Morende Chisabato chiane chibe chinchenu, erinde chibe ekemanyererio ase egati yane nainwe; erio nario moranyare komanya ng’a inche ninche Omonene, Nyasae oino.
21“Korende abana baria bagasaria asende; tibabwatetie emeroberio yane echikire, na tibarendete amachiko aane na tibayakorete, amachiko ayio omonto karayabwate nabe moyo goetera asaro. Bagakora Chisabato chiane chikaba echitachenegeti. Erio nkarengereria kobaumorera ekeririanda kiane, erinde endamwamu yane eerere igoro yabo agwo ase erooro. 22Korende tinakorete bo, ekiagera nigo narendete erieta riane tirikorwa ribe eritachenegeti ase amasio ’abanto b’ebisaku abwo ase narusetie Abaisraeli korwa. 23Erio nkaria eira y’ogotiana, agwo ase erooro, ng’a mbasiarere ase egati y’ebisaku, na kobaserebania gochia ase chinse chionsi. 24Nigo nakorete bo, ekiagera tibabwatete amachiko aane na tibayakorete, korende nigo baangete koigwera emeroberio yane echikire, na bagakora Chisabato chiane chikaba echitachenegeti, na amaiso abo nigo arigereretie emegwekano eyio chisokoro chiabo chiarenge gosasima.
25“Erio nkabaa emeroberio echikire etarenge emiya, na amachiko atarenge kobarentera obogima. 26Nkabatiga bagesoyia ase ogotacheneka goetera ase ebiegwa biabo, nkabatiga bagasamba abana babo bonsi abatangi bakaba ebing’wanso. Nigo nakorete ayio ase okobaondokia, banyare komanya ng’a inche ninche Omonene.
27“Ase ayio, aye mwanyabanto, kwana n’Abaisraeli, obatebie ng’a aya naro Omonene Nyasae agoteba: Ase amang’ana ayio chisokoro chiaino nigo chiandamete ase ogotaba abegenwa asende. 28Nkabarenta ase ense eyio nabarierete eira ng’a nimbayee. Na aase aande onsi baroche aimokererete igoro, gose emete yabwate chinsagia chinyinge, nao barenge koruera ebing’wanso biabo na okoruegwa konde, ebio biarenge okogechia asende. Aroro agwo bakaruera ebing’wanso bire ne rimisu rigiya, na bakaumora okoruegwa kwabo kw’ebinyugwa. 29Erio nkababoria: Aase agwo aimokererete igoro ase mogochia naaki? Ase ayio, aase buna agwo nigo akorokwa Aase Aimokererete Igoro Agosasimerwa, nabo akorokwa goika rero iga. 30Ase ayio, tebia Abaisraeli ng’a aya naro Omonene Nyasae akoboria: Inee! Nainwe nigo mwesoirie ase ogotacheneka ase okobwatia chingencho chie chisokoro chiaino na gokora obokayayu ase ogosasima emegwekano yabo y’okogechia? 31Nonya ngoika rero iga, ekero mokorua ebiegwa biaino, na gosamba abana baino babe ebing’wanso, nigo mogwesoyia ase ogotacheneka ase ogosasima emegwekano yaino yonsi. Naende inwe Abaisraeli, Inee, ninyanchete momborie amang’ana? Ekeene buna inche inde moyo, tingwancha momborie. Ninche Omonene Nyasae natebire ayio. 32Amang’ana mokorengereria tagoikeranigwa nonya ng’ake, ekiagera nigo mogoteba: Ntoganetie tobe buna abanto b’ebisaku binde na abe chinse chinde, tosasime emete na amagena.
Nyasae okorua egesusuro na amabera
33“Omonene Nyasae nigo agoteba iga: Ekeene, buna inche inde moyo, nindambore okoboko kwane kore nokobua na ning’umore ekeririanda kiane, nimbe nkobagambera inwe. 34Ee, ase okoboko kwane kore nokobua koramboire, na ase okoumora ekeririanda kiane, nimbarusie korwa ase abanto b’ebisaku, mbasangererie korwa ase chinse echio mwasiareretwe gochia. 35Erio mbarente ase erooro y’abanto b’ebisaku, na aroro agwo nimbanachere ekina obosio ase obosio. 36Nimbanachere inwe ekina buna nanacherete chisokoro chiaino ekina, agwo ase erooro y’ense ya Misiri. Nabo inche Omonene Nyasae natebire.
37“Nimbaetie inwe inse y’enyimbo yane y’oborisia, mbasoyie ase egesibo gi’okobwatana. 38Ninyatanane korwa asemore abatari koigwera, na abasaririe asende. Nimbarusie korwa ase ense eria bare abamenyi, korende barabwo tibagosoa ase ense y’Abaisraeli. Erio nario moramanye ng’a inche ninche Omonene.
39“Aya naro Omonene Nyasae akobatebia inwe Abaisraeli: Kera oyomo oino agenderere gosasima omogwekano oye! Korende ase engaki erache ekero morabe mokonyigwera timokora erieta riane richenu ribe eritachenegeti ase okorua ebiegwa biaino na gosasima emegwekano yaino. 40Inche Omonene Nyasae nigo ngoteba iga: Agwo ase egetunwa kiane egechenu, egetunwa egetambe ki’Abaisraeli, nao Abaisraeli bonsi bare ase ense barabe bagonkorera. Aroro agwo nimbanchere, na aroro agwo ninyanchere okoruegwa kwaino, na ebiegwa biaino bire ebiya mono, amo nebinto bionsi morabe mogwatanana bibe ebichenu. 41Ekero ndabe nabarusirie korwa ase abanto b’ebisaku na kobasangereria korwa ase chinse echio nabasiarerete gochia, erio nimbanchere buna ogotioka kwe rimisu rigiya. Ase amasio ’abanto b’ebisaku ninyeorokie asemore inde omochenu. 42Ekero ndabarente ase ense y’Abaisraeli eyio nariete eira na gotiana ng’a ninyee chisokoro chiaino, erio momanye ng’a inche ninche Omonene. 43Agwo ase ense eria namoinyore chinchera chiaino, na ogokora kwaino gwonsi, ase okwo mwabeire mogwesoyia ase ogotacheneka; inwe mwegeche abanyene ase engencho y’amabe onsi mwakorire. 44Inwe Abaisraeli, ekero ndabakorere amaya ase engencho y’erieta riane, tinkobakorera koreng’ana ne chinchera chiaino chimbe, gose koreng’ana nogokora kwaino kw’obosareku; erio nario moramanye ng’a inche ninche Omonene. Nabo Omonene Nyasae atebire.”
Omorero ase Irianyi
45Ring’ana ri’Omonene rigacha asende, rigantebia: 46“Aye mwanyabanto, rigereria gochia ensemo ya irianyi, oyerarerie ring’ana rire mamincha yaye, na obane igoro ye rinani ri’ense ya Negebu. 47Otebie rinani ria Negebu iga: Igwa ring’ana ri’Omonene. Aya naro Omonene Nyasae agoteba: Rora, nintongie omorero ime yao, noro nosambe osirie emete emebese, na emiomo yonsi. Omorero oyio ekebemberi tokorimigwa, na amasio ’abanto bonsi korwa irianyi goika sugusu nasambwe noro. 48Abanto bonsi mbarore ng’a inche ninche Omonene nayotongirie, tokonyara korimigwa nonde.”
49Erio ngateba, “Ayee, Omonene Nyasae! Abanto aba nigo bagokwana igoro yane baboria: Inee! Omonto oyo tari gokwana ase emebayeno?”
Currently Selected:
EKEKIELI6 20: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
