EKEKIELI6 18
18
1Ring’ana ri’Omonene rigacha asende naende, rigantebia: 2“Ninki engencho y’omorabaaro oyo okoiranererwa gokwanwa ase ense y’Abaisraeli:
“Abaise barire amasabibu amabese amaroro,
na amaino ’abana babo abeire nobokang’iti?
3“Omonene Nyasae nigo agoteba iga: Ekeene buna inche inde moyo, timokogenderera gokwana omorabaaro oyo ase ense y’Abaisraeli. 4Naama! Emioyo y’abanto bonsi neyane; koreng’ana buna omoyo o ise ore oyone, boigo noyo bw’omwana ore oyone. Omonto oyio ogokora ebibe, nere orakwe.
5“Origererie orore omonto ore omoronge, ogokora ayare boronge na ekeene. 6Ere tari koria ebing’wanso bikoruegwa igoro ase ebitunwa, gose tari korigereria emegwekano Abaisraeli bagosasima; tari gokora obonyaka nomokungu bw’omonto onde, gose tari koba nomokungu ekero are nomotienyi, 7gose tari gokorera monto onde bobe, korende nigo akoirania egento omonto amoete koba intenenera ase esira. Ere tari koura onde gento kiaye, korende nigo akoa oyore nenchara endagera, na oyore getirianda omobekera eanga. 8Ekero akorua singo tari kwementera gento gose koboria ebitoki. Nigo agotanga amaboko aye takora obobe; nigo akonacha ekina kia boronge ase egati y’omonto na omonto onde. 9Omonto oyio aise gokora bo, na abwatie emeroberio yane echikire, na abwate amachiko aane, na akore ayare boronge, oyio nigo are omonyaboronge; ekeene, nabe moyo. Nabo Omonene Nyasae atebire.
10“Ande omonto oyio nabe ng’a oiboire omwana omomura oyore omoibi na omoiti, gose abe ogokora erimo ri’ayio 11ise omonyene atakorete, korende arie ebing’wanso bikoruegwa ase ebitunwa igoro, naende akore obonyaka nomokungu bw’omonto onde. 12Ere nigo agokorera abataka na abaremerwa bobe, na kourereria abanto ebinto biabo, gose tari koirania egento aetwe koba intenenera, ere nigo akorigereria emegwekano egosasimwa na gokora ay’okogechia. 13Ekero akorua singo nigo akwementera egento ase okoboria ebitoki. Inee! Omonto buna oyio nabe moyo? Yaya takoba moyo. Ekiagera akorire okogechia okwo gwonsi goika akwe. Okomocha kw’ogoiteka kw’amanyinga aye nkobe igoro yaye.
14“Ande omonto oyio nabe ng’a oiboire omwana omomura, ere arore ebibe bionsi ise akorete, korende airoke na takora amang’ana buna ayio. 15Ere taria ebing’wanso bikoruerwa ase ebitunwa igoro, gose tarigereria emegwekano Abaisraeli bagosasima, gose takora obonyaka nomokungu bw’omonto onde; 16tagokorera monto onde bobe, gose takoira egento koba intenenera, gose takourereria omonto enibo yaye, korende nigo arabe okoa oyore nenchara endagera, na oyore getirianda amobekere eanga. 17Naende nigo aratange okoboko kwaye takorera oyochandegete bobe, na abe tari koboria ebitoki gose kwementera egento, korende nigo arendete amachiko aane na kobwatia emeroberio yane echikire. Oyio tagokwa ase engencho y’ebibe bia ise, korende ekeene, goika abe moyo. 18Ise ere ekiagera akorerete abanto bobe ase obotindi, na akaurereria oyomwabo, naende agakora aya atarenge amaya ase egati y’abanto baye, ekeene, ere goika akwe ase engencho y’ebibe biaye.
19“Inwe nigo mokoboria: Ninki keragere omwana atanyore emechando ase engencho y’ebibe bia ise? Nigo nkobairaneria iga: Ekero omwana akorire ayare amaya na amaronge, na obeire okorenda emeroberio yane echikire na ayekore, ekeene, nabe moyo. 20Omonto ogokora ebibe nere orakwe. Omwana tagochandwa ase engencho y’ebibe bia ise, gose ise tagochandwa ase engencho y’ebibe bi’omwana oye. Omonyaboronge nanyore eng’eria y’oboronge bwaye, na omonyabibe nanyore eng’eria y’obobe bwaye.
Nyasae nigo akogoka ekero omonyabibe akoonchoka
21“Korende omokori amabe karatige ebibe biaye bionsi ebio akorire, na arende emeroberio yane yonsi echikire, naende akore ayare amaya na amaronge, ekeene, nabe moyo, tagokwa. 22Ebibe biaye bionsi akorete tibikoinyorwa, erinde agambigwe, korende nabe moyo, ekiagera akorire ayare ay’oboronge. 23Aya naro Omonene Nyasae akoboria; Inee! Aye nigo okagete ng’a inche nigo ingokirie nogokwa kw’omokori amabe? Yaya, nigo nganetie omokori amabe aonchoke, atige enchera yaye embe abe moyo.
24“Korende omonyaboronge karatige oboronge bwaye na akore ebibe, naende akore okogechia okwo omokori amabe agokora, Inee, oyio nabe moyo? Yaya, oboronge bwaye bwonsi obwo konya akorire tibokoinyorwa; goika akwe, ekiagera atabete omwegenwa, korende agakora ebibe.
25“Inwe nigo mogoteba: Enchera y’Omonene teri endonge. Inwe Abaisraeli, igwa bono: Inee! Enchera yane nero etari endonge? Chinchera chiaino, tari chirochio chitari chindonge? 26Ekero omonto omonyaboronge akoonchoka otiga gokora ay’oboronge, erio okora ebibe, oyio goika akwe ase engencho y’ayio; ee, ase engencho y’ebibe akorire goika akwe. 27Korende omokori amabe karaonchoke atige ebibe akorire, na akore ayare amaya na ayare boronge, oyio natoorie omoyo oye. 28Ekiagera arengereirie aya akorete na aonchokire korwa ase ogosaria kwaye gwonsi akorete, ekeene, nabe moyo, tagokwa. 29Korende Abaisraeli nigo bagoteba: Enchera y’Omonene teri endonge. Inwe Abaisraeli, chinchera chiane nachio chitari chindonge? Inee! Chinchera chiaino tari chirochio chitari chindonge?
30“Aya naro inche Omonene, Nyasae ngoteba: Inwe Abaisraeli ase engencho y’ayio nimbanachere ekina, kera omonto anacherwe buna chinchera chiaye chire. Onchoka! Motige ogosaria kwaino gwonsi, erinde obobe bwaino tiboba ekegocha gi’okobasiria. 31Motugute ogosaria kwaino gwonsi, okwo mwakorire asende, mwenyorere chinkoro chinyia na omoika omoyia. Inwe Abaisraeli, nase ki moganetie gokwa? 32Inche tingokiri nogokwa kw’omonto onde bwensi; ase ayio oonchoka mobe moyo. Nabo Omonene Nyasae atebire.”
Currently Selected:
EKEKIELI6 18: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
