EKEKIELI6 16
16
Yerusalemu tori omwegenwa
1Ring’ana ri’Omonene rigacha asende, rigantebia: 2“Aye mwanyabanto, manyia Yerusalemu okogechia kwaye. 3Tebia Yerusalemu ng’a aya naro Omonene Nyasae akoyotebia:
“Aye nigo kwaiboreretwe ase ense ya Kanani. Iso nigo arenge Omoamori, na nyoko n’Omohiti orenge. 4Rituko kwaiboretwe ororera rwao tirwanachetwe, gose tigwasibetigwe namache orabe, gose tikwaagetwe omonyo, gose tikwabekeretwe eanga y’obwana. 5Monto onde takororerete amabeebe agokorere ring’ana nonya nerimo ase ayio, gose gokororera amabera; korende nigo gwatugutetwe isiko aarabu, ekiagera rituko erio kwaiboretwe nigo kwagechetwe.
6“Ekero naetete agwo ase kwarenge, ngakorora gokwegara‐garia ime ase amanyinga ao, nkagotebia: Buna oraire ase amanyinga ao ime, obe moyo; ee, nkagotebia: Buna oraire ase amanyinga ao ime, obe moyo. 7Nkagokinia okamenteka okaba chilifu ne chilifu, buna ebimeri bire ase riroba. Ogakina okaba omonene na omonyakieni: chimbeere chiao chigakina, na etukia yao boigo; korende nonya naboigo, nigo kwarenge getirianda, tikwabegete kende.
8“Ekero naende naetete asore, ngakorigereria, nkarora ng’a gwaikire engaki y’ogwanchwa. Nkagotuba nomwambaro one, nkabisia obogetirianda bwao. Naende ngakora okobwatana kw’ogotianania naye, erio aye okaba oyone. Nabo Omonene Nyasae atebire.
9“Erio nkagosibia namache, ngasibia amanyinga ao onsi na kogoaka amaguta. 10Ngakobekera eanga eroisirie ere nebieni ao ao, ngakobekera na ebikoroto bie risankwa riterere ri’eng’iti ya rooche. Ngakoboyia egetambaa ki’egatani engiya, naende ngakobekera egietubo ki’ariri. 11Nkagochabera nebinto bi’obwari, na ase amaboko ao ngakobekera chibangiri, ne chisonoi igoti riao. 12Nkabeka ebonyi ase emioro yao, na ebigera ase amato ao, na egutwa enseera ase omotwe oo. 13Ase ayio, aye ogachaberwa ne chitahabu, ne chifeta, ne chianga chiao nigo chiarenge echi’egatani engiya, na echi’ariri, na echiroisirie chire nebieni ao ao. Boigo okaria endagera yaroiseretigwe nobosie obonuke, na okaria obooke, na amaguta. Erio okaba omonyakieni mono, ogasesenigwa, ogaikera ekerengo ki’oboruoti. 14Okamanyekana ase ebisaku ase engencho y’oboseera bwao. Oboseera bwao nigo bwarenge oboikeranu, ekiagera ninche nakoboete.” Nabo Omonene Nyasae atebire.
15“Korende aye nigo gwasemeretie oboseera bwao, erio ogekora omotayayi, ekiagera kwamanyekanete mono, ogekayayia ase abaeti bonsi, ogechwara ase onde bwensi. 16Okaira chianga chiao, ogachabera aase aimokererete igoro akaba nebieni ao ao, na aroro agwo ogakorera obonyaka bwao. Amang’ana anga buna ayio tana gokorekana korwa kare, na tagokorekana nonya ng’ake. 17Naende okaimokia ebinto biao ebiya bie chitahabu na ebie chifeta nakoete, erio okeroiseria emegwekano ogosasima enga abasacha, erio ogakora obonyaka nero. 18Naende okaira chianga chiao chiare nebieni ao ao, ogatuba emegwekano eria, na okabeka amaguta aane na ubani yane ase amasio abo. 19Omogati one nakoete, na obosie obonuke, na amaguta amaya, na obooke, ebio okabirua ase emegwekano eyio koba rimisu rigiya rikoyegwenera; ee, nabo gwakorete.” Nabo Omonene Nyasae atebire.
20“Naende okaira abana bao, abamura na abaiseke, abwo kwanyiborerete, okabarua bakaba ebing’wanso ase emegwekano eyio, okabasiria. Inee! Obonyaka obwo bwao ne ring’ana rike? 21Nering’ana rike aye kwaruete abana baane bakaba ebing’wanso bi’ogosambwa ase emegwekano eyio? 22Ase engaki eyio kwarenge gokora ebibe bi’okogechia, na obotayayi, tikwainyorete amatuko aria ay’oboke bwao, ekero kwarenge getirianda otabegete kende, na kwarenge kwegaragaria ime ase amanyinga ao.”
Obogima bwa Yerusalemu bw’obonyaka
23Ase ayio Omonene Nyasae nigo agoteba iga, “Obobe nobwao! Nyuma kogwakorire amabe aya onsi, 24okeagachera ebinyomba bi’emegwekano ogosasima, na ase kera enchera kwaagachire aase aimokererete igoro ogosasimera. 25Ase kera amatabekania e chinchera kwaagachire aase aimokererete igoro ogosasimera, kwanyakairie oboseera bwao, gwechwarire ase onde bwensi ogoeta, na gwakorire obonyaka obonge. 26Nigo gwakorete obonyaka n’Abamisiri, abanto abwo mosinyaine bare nokogania okobe; okamenta obonyaka bwao, na okagera nkagechigwa nkaba nendamwamu.
27“Rora, naramboire okoboko kwane kogoaka, nakeeirie endagera yao, naende nakorure nakobekire ase abakungu b’Abafilisti, abwo bakogechete naende barorire obosooku ase ogokora kwao kw’obonyaka, erinde bagokore buna banchete.
28“Naende ngwakorete obonyaka n’Abaasuri, ekiagera tigwaisanegete, ee, ngwakorete obotayayi nabarabwo, nonya naboigo tigwaisanegete. 29Nkwamentete obotayayi bwao, okagenda nonya ngochia ase ense y’Abakalidayo, abwo bare abaonchoreria, na barabwo boigo tibagoisanegetie.”
30Omonene Nyasae nigo agoteba iga: “Naki enkoro yao ere nokogania okonene kw’ogwanchwa, ekiagera gwakorire aya onsi, ayare buna ogokora kw’omokungu omonyaka otari korora obosooku. 31Kweagacheire ebinyomba bi’emegwekano ogosasima ase amatabekania onsi e chinchera, na ase kera enchera kwaagachire aase aimokererete igoro ogosasimera. Nonya naboigo tikwarenge buna omokungu omotayayi onde bwensi, ekiagera nigo gwachayete ogoakanerwa gwe chibesa. 32Aye omokungu omotomani nigo gwatigete omosacha oo okaba kore nabasacha abaao! 33Abasacha nigo bakorwa chibesa baa abakungu abatayayi, korende aye nigo okorua echiao kwaa abanchi bao ase okobaebereria bache korwa chinsemo chionsi bakore obonyaka naye. 34Aye nigo ore nogwatananeka korwa ase abakungu bande abatayayi. Monto onde tagotunyanete arigie gokora obonyaka naye, korende naye omonyene kwaruete chibesa ase obonyaka obwo. Ase ayio nigo ore nogwatananeka korwa ase abatayayi bande.
Egesusuro kia Nyasae ase Yerusalemu
35“Ase ayio, aye omotayayi, igwa ring’ana ri’Omonene!
36“Aya naro Omonene Nyasae agoteba: Obosooku bwao bwaorokigwe isiko, na obogetirianda bwao tibotubiri ekero ogokora obonyaka nabanchi bao. Naende nigo gwasasimete emegwekano yao y’okogechia na okarua abana bao bakaba ekeng’wanso ase emegwekano eyio. 37Ase ayio ninsangererie abanchi bao abwo kwegokeretie, na bonsi abwo gwanchete, na abwo kwagechete; nimbasangererie korwa ase chinsemo chionsi bagoetanane, ngwasiorie, erinde barore obogetirianda bwao. 38Ninkonachere ekina buna abakungu basaririe chiira chi’okonyuomana kwabo na buna abaiteri amanyinga bakonacherwa ekina; amanyinga ao ninyaitere inde nendamwamu ne risemi. 39Ninkobeke ase amaboko ’abanchi bao; barabwo mbatagore ebinyomba biria kweagacherete bi’emegwekano ogosasima amo naase ao aimokererete igoro. Naende mbakorusie chianga chiao, na baire ebinto biao ebiya bi’ogwechabera, bagotige kore getirianda otabegeti eanga.
40“Abwo mbagochere amo nomoganda omonene, bagoake amagena na gokobutorana nemioro. 41Mbasambe chinyomba chiao, naende bakonachere ekina ase amasio ’abakungu abange. Ningotange tokora obonyaka, na tokogenderera korua chibesa ase obonyaka naende. 42Ase enchera eyio ning’isanekie endamwamu yane asore, ne risemi riane ndirue asore, erio nario ndabe nobotoereru, gose tinkogechigwa naende. 43Ekiagera otainyorete amatuko aria ay’oboke bwao, korende kwabeire gokongechia nogokora kwao gwonsi, rora, ningoakane ogokora kwao gokoiranere, na igo togokora ogokora okwo kw’obosooku gokomenta ase ebibe binde bi’okogechia gwakorire.” Nabo Omonene Nyasae atebire.
Buna ng’ina omosubati are, nabo nomosubati oye are
44“Rora, omonto onde bwensi oganetie gokwana omoreng’anio, nigo arakwane igoro yao, atebe: Buna ng’ina omosubati are, nabo nomosubati oye are. 45Aye omosubati nigo onga nyoko, oria bwangete omosacha oye, na abana baye; naende nigo onga basubati bamino, abwo bangete abasacha babo, na abana babo. Nyoko nigo arenge Omohiti na iso n’Omoamiori orenge.
46“Mosubati omino omonene nere Samaria, oyio omenyete amo nabaiseke baye ensemo yao ya sugusu, na mosubati omino omoke nere Sodomu, oyio omenyete amo nabaiseke baye ensemo ya irianyi. 47Aye tigwaisanegete ase okobwatia chinchera chiabo, gose aria gwakorete koreng’ana nokogechia kwabo, korende ase engaki enke yoka aye ogakora ayare amabe kobua ayabo, ase chinchera chiao chionsi.
48“Omonene Nyasae nigo agoteba iga: Ekeene, buna inche inde moyo, Sodomu, mosubati omino, na abaiseke baye, tibarakora buna aye gwakorire amo nabaiseke bao. 49Naama! Ebi nabio biarenge ebibe bia Sodomu, mosubati omino: Ere amo nabaiseke baye nigo barenge abaenenu na abaigotu b’endagera, naende nigo barenge nobotoereru, korende tibechanderete abataka na abaremerwa. 50Nigo barenge abamwenu, na bakaba bagokora ay’okogechia ase obosio bwane, Ase ayio, ekero naroche amang’ana ayio, nigo nabarusetieo.
51“Samaria tiyakorete ebibe, nonya nekeng’ese kereng’aine ebiao; aye gwakorire ebibe ebinge bi’okogechia kobua emechie eyio. Ase engencho eyio kwagerire basubati bamino barorekanire bare abanyaboronge, ekero ebibe biao bikoreng’anigwa nebiabo. 52Bono aye bogoria obosooku bwao bw’ogochaywa, ekiagera kwagerire basubati bamino banyorire obotamero. Ebibe biao bi’okogechia biabeire ebinge kobua ebiabo; bono barabwo nigo bakororekana ng’a nabanyaboronge bare gokobua. Ase ayio, kabe nobosooku bw’ogochaywa, ekiagera kwagerire basubati bamino barorekanire bare abanyaboronge.
Sodomu na Samaria neiranerigwe amaya abo
53“Inche ninsibore abasibwa b’emechie eye: abasibwa ba Sodomu amo nab’abaiseke baye, na aba Samaria amo nab’abaiseke baye. Boigo naye Yerusalemu ningosibore kore ase egati yabo, 54erinde obogorie ogochaywa kwao orore obosooku ase engencho y’ayio onsi gwakorire, na ase enchera eyio nobarentere okoremia. 55Aya naro arabe ase abasubati bamino: Sodomu na abaiseke baye nabairanerigwe amaya abo, babe buna barenge ritang’ani, na Samaria na abaiseke baye mbairanerigwe amaya abo, babe buna barenge ritang’ani. Naye boigo na abaiseke bao moiranerigwe amaya aino, mobe buna mwarenge ritang’ani. 56Inee! Sodomu, mosubati omino, tabete omobayeno kwarenge gokwana ase okomochaya, ekero kwarenge noboenenu. 57Ekero keria ebibe biao konya bitaraorokigwa maiso marore? Bono kwabeire buna ere. Abaiseke b’ense ya Edomu, na ab’Abafilisti, abwo bagoetanaine ase chinsemo chiao chionsi, nigo bagochayete. 58Bono goika obogorie egesusuro ki’ogokora kwao okobe, na okogechia kwao gwonsi.” Nabo Omonene atebire.
Okobwatana kw’ogotianania nkogenderere goika kare na kare
59“Aya naro Omonene Nyasae agoteba: Ningokorere koreng’ana buna gwakorire, ekiagera gwachayire eira gwatianete, na gwasaririe okobwatana kw’ogotianania. 60Nonya naboigo ning’inyore okobwatana kw’ogotianania nakorete naye ase amatuko aria ay’obobe bwao, ninkore naye okobwatana kw’ogotianania koragenderere goika kare na kare. 61Erio aye oinyore ogokora kwao obe nobosooku, ekero oraire basubati bamino abanene na abake. Ninkobae babe abaiseke bao, korende tari ase engencho y’okobwatana kwane kw’ogotianania koria nakorete naye. 62Ninkong’ie okobwatana kwane kw’ogotianania koria nakorete naye; erio nario oramanye ng’a inche ninche Omonene. 63Ekero ndabe nakwabeire aya onsi gwakorire, aye noyainyore erinde oumate okirekiri, tomumora omonwa oo, ase engencho y’obosooku bwao. Nabo Omonene Nyasae atebire.”
Currently Selected:
EKEKIELI6 16: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
