EKEKIELI6 14
14
Nyasae okoragereria ogosasimwa kw’emegwekano
1Abagaaka bande b’Abaisraeli bagacha asende, bagaikaransa ase obosio bwane. 2Erio ring’ana ri’Omonene rigacha asende, rigantebia: 3“Aye mwanyabanto, abanto aba baeire emegwekano bagosasima ribaga koba ase chinkoro chiabo, na emegwekano eyio yabeire ekegocha gekobaraa gochia gokora ebibe. Inee! Ninyanche abanto banga buna abwo baborie amang’ana korwa asende?
4“Ase igo, kwana nabarabwo, obatebie ng’a aya naro Omonene Nyasae agoteba: Omonto onde bwensi bw’Abaisraeli orae emegwekano yaye agosasima ribaga ase enkoro yaye, na emegwekano eyio ebe ekegocha gekomoraa gochia gokora ebibe, naende abe ogocha ase omobani, oyio ninche Omonene omonyene ndamoiranerie buna agwenerete ase engencho y’emegwekano yaye emenge agosasima. 5Erio nario ndanyare koirania chinkoro chi’Abaisraeli gocha asende, abwo baatananirwe korwa asende ase engencho y’emegwekano yabo bagosasima.
6“Ase ayio, tebia Abaisraeli ng’a aya naro Omonene Nyasae agoteba: Eitie moonchoke, motige gosasima emegwekano yaino; onchoka motige ebibe biaino bionsi bi’okogechia.
7“Omonto onde bwensi bw’Abaisraeli, gose omomenyi omenyete ase egati yabo, oreatanane korwa asende na koa emegwekano eyio ribaga ase enkoro yaye, eyio ekoba ekegocha gekomoraa gochia gokora ebibe, naende abe ogocha ase omobani komboria amang’ana goetera asare, oyio ninche Omonene omonyene ndamoiranerie. 8Nigo ndamobee, erinde abe ekiorokererio na omobayeno ogokwanwa nabanto, naende imwatanane kegima korwa ase abanto baane. Erio nario moramanye ng’a inche ninche Omonene.
9“Omobani karang’aineke akwane ring’ana ri’obobani, rirorio ninche Omonene nang’ainire omobani oyio; nindambore okoboko kwane imoite arue ase egati y’Abaisraeli, abanto baane. 10Abwo mbabogorie egesusuro ki’ebibe biabo, egesusuro ki’omobani na eki’omonto oria ochete koboria amang’ana korwa asare, nigo kerabe ekemo. 11Omonene Nyasae nigo agoteba ng’a ase enchera eyio Abaisraeli tibakorua asende bachie gosira, gose gwesoyia ase ogotacheneka nonya ng’ake ase engencho y’ogosaria kwabo gwonsi, korende mbabe abanto baane, na inche imbe Nyasae obo.”
Nuhu, na Danieli, na Ayubu
12Naende ring’ana ri’Omonene rigacha asende, rigantebia: 13“Aye mwanyabanto, onye ense egokora ebibe asende ase ogokora aya atari ay’obwegenwa, nindambore okoboko kwane igoro yaye, ninsirie endagera nyerentere enchara, naende ng’ite mwanyabanto ne ching’iti, 14nonya abanto aba batato: Nuhu, na Danieli, na Ayubu, barenge kobao, oboronge bwabo tibware gotooria monto onde bwensi, otatiga mbarabwo boka bware gotooria.” Nabo Omonene atebire.
15“Gose inse korenta ching’iti chi’orosana chintindi chichiche ase ense eyio chiyesarie ebe bosa, erinde monto onde tabaisa goeta ase ense eyio ase engencho ye ching’iti echio, 16nonya abanto abwo batato barenge koba ase ense eyio, ekeene, buna inche Omonene Nyasae inde moyo, tibare konyara gotooria abana bareo, abamura gose abaiseke. Mbarabwo boka baare gotoorigwa, korende ense ero esarigwe ebe bosa.” Nabo Omonene Nyasae atebire.
17“Gose inse gotoma omoro ase ense na ntebe: Omoro tiga oetere ense eye, naende insirie kegima mwanyabanto ne ching’iti, 18nonya abanto abwo batato barenge kobao, ekeene, buna inche Omonene Nyasae inde moyo, tibare konyara gotooria abana bareo, abamura gose abaiseke, korende mbarabwo boka baare gotoorigwa.” Nabo Omonene Nyasae atebire.
19“Gose inse gotoma oborwaire bogoita ase ense eyio, ing’umore endamwamu yane egere ogoiterwa kw’amanyinga, ng’ite mwanyabanto ne ching’iti aroro, 20nonya Nuhu, na Danieli, na Ayubu barenge kobao, ekeene, buna inche Omonene Nyasae inde moyo, oboronge bwabo tibware gotooria abana bareo, abamura gose abaiseke, otatiga mbarabwo boka bware gotooria.” Nabo Omonene Nyasae atebire.
21Aya naro Omonene Nyasae agoteba: “Naki erabe emechando emenene goetania ekero ndatome ase Yerusalemu ebisusuro biane bine: omoro, na enchara, ne ching’iti chintindi, na oborwaire bogoita, erinde ng’ite na gosiria mwanyabanto amo ne ching’iti! 22Nonya naboigo mbatigare abanto bande bare moyo, amo nabana babo, abamura na abaiseke. Abwo mbasoke korwao bache asemore. Ekero barache, morigererie orogendo rwabo, na ogokora kwabo. Erio nario moraisaneke ng’a egesusuro ekio naruete igoro ya Yerusalemu, na aya onsi nayokorerete ase engencho y’ebibe biaye nay’oboronge. 23Barabwo mbabaremie, na ekero morarore chinchera chiabo, na ogokora kwabo, nigo moramanye ng’a aya nakorerete omochie oyio tinakorete engencho ende etaiyo. Nabo Omonene Nyasae atebire.”
Currently Selected:
EKEKIELI6 14: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
