EKEKIELI6 13
13
Obobani bore mamincha y’ababani abasacha abang’ainereria
1Ring’ana ri’Omonene rigacha asende, rigantebia: 2“Aye mwayabanto, bana mamincha y’ababani b’Abaisraeli, abwo bakobana amang’ana akorwa ase ebirengererio biabo abanyene, obatebie: Igwa ring’ana ri’Omonene!
3“Aya naro Omonene Nyasae agoteba: Obobe nobw’ababani abwo abariri bakobwatia emeika yabo abanyene, na tibabwati korora konde gwonsi bagokwana. 4Inwe Abaisraeli, ababani baino nigo banga buna ebibwe bimenyete ase amaturi. 5Barabwo tibatiirete gochia aase atagoire, gose tibagiterete Abaisraeli chindwaki, erinde bekengere ase esegi ye rituko ri’Omonene. 6Amaroro abo nay’obong’ainereria, na oboringoria bwabo nobw’oborimo. Barabwo nigo bagoteba iga: Omonene otebire bo. Korende Omonene tabatometi. Nonya naboigo, nigo basemeretie ng’a Omonene naikeranie amang’ana abo babanire. 7Inee! Tari amaroro ’obong’ainereria barorire, naende nigo bakoringoria oboringoria bw’oborimo, ekero bagokwana ng’a Omonene otebire bo, na inche Omonene tinkwaneti ayio?
8“Ase ayio aya naro Omonene agoteba: Ekiagera mwakwanire ay’obong’ainereria naende mwarorire amaroro ay’oborimo, rora, inche nigo inde mamincha yaino. Nabo Omonene atebire. 9Okoboko kwane ngoake ababani abwo bakorora amaroro ’obong’ainereria, naende nigo bakoringoria oboringoria bw’oborimo. Barabwo tibakobeera ase omosangererekano bw’abanto baane, gose tibakorikwa amo n’Abaisraeli, gose tibagosoa ase ense y’Abaisraeli. Erio nario moramanye ng’a inche ninche Omonene Nyasae.
10“Ababani abwo basiririe abanto baane, babaebereirie na kobatebia: Omorembe; na omorembe tori aande. Ekero abanto baagachire orwaki barabwo nigo bakoroaka echooka etochoganiri buya. 11Ase ayio goika otebie ababani abwo bagoaka orwaki orwo echooka eyio ng’a orwaki orwo narogwe. Embura y’omoubera netwe amo namagena amanene, na ekembugu‐mbugu biroiyerie inse. 12Ekero orwaki orwo rorabe rwagure inse, Inee, abanto tibakobaboria: Ng’ai echooka eria mwaroagete ere bono?
13“Ase ayio, aya naro Omonene Nyasae agoteba: Nintome ekembugu‐mbugu inde nendamwamu na ekeririanda, nintome embura ere ne chinguru, naende ase endamwamu yane nintome embura ere namagena amanene, nsarie bionsi kegima. 14Erio inyiyerie inse orwaki orwo mwaagete echooka, erinde oboroso bwaye botuborwe. Ekero orwaki orwo roragwe, inwe imoitwe mokwereo. Erio nario moramanye ng’a inche ninche Omonene.
15“Ase ayio ning’umore endamwamu yane eerere ase okoiyeria orwaki roria na gosiria baria baroagete echooka eria. Erio nimbatebie: Orwaki roria tiroiyo, nonya mbaria baroagete echooka tibaiyo. 16Abwo nabwo barenge ababani baria b’Abaisraeli babanete igoro ya Yerusalemu, na baroche amaroro ay’omorembe, nonya omorembe torengeo. Nabo Omonene Nyasae atebire.
Obobani bore mamincha y’ababani abakungu abang’ainereria
17“Aye mwanyabanto, barigererie abakungu b’abanto bao, abwo bakobana amang’ana akorwa ase ebirengererio biabo abanyene, obane amang’ana are mamincha yabo. 18Obatebie ng’a aya naro Omonene agoteba:
“Obobe nobwabo abakungu abwo bakobarera ebimoya bire namaebi, babisiba ase amaboko abo, naende babarera ebitambaa bagotuba emetwe y’abanto abake na abanene, erinde babarichania. Inee! Inwe abakungu aba, nigo mogochia korigia abanto baane na kobarichania, mobasirie, erinde inwe mogenderere koba moyo na kwenyorera ebitoki? 19Inwe mwankorire nabeire buna nigo inde oyotachenegeti ase egati y’abanto baane, ase okogania esairi eichire roe, na ebisamunye bi’omogati. Mwaitire abatagwenerete goitwa, na abagwenerete goitwa mwatigire koba moyo. Ayio nigo mwayakorire ase okong’ainereria abanto baane, abwo bagwancherana nay’oborimo.
20“Ase ayio, aya naro Omonene Nyasae agoteba: Rora nagechire ebimoya bire namaebi, ebio mokobwatera abanto buna nechinyoni mokobwata; nimbibutore korwa ase amaboko aino, erinde nsibore abanto abwo mwabwatire, barabwo batame buna chinyoni. 21Boigo nintandore ebietubo biaino, ndusie abanto baane korwa ase amaboko aino, tibakogenderera koba abooswa asemore. Erio nario moramanye ng’a inche ninche Omonene.
22“Ase engencho y’oborimo bwaino mwagerire abanyene oboronge baichanire ase chinkoro chiabo, abwo inche ntaichanetie. Nigo mwagerire abakori amabe koba noboremu, erinde tibaonchoka batige chinchera chiabo chi’obobe, erinde batoorie obogima bwabo. 23Ase ayio timokogenderera korora amaroro ay’obong’ainereria, gose kwenaria oboringoria. Nindusie abanto baane korwa ase amaboko aino. Erio nario moramanye ng’a inche ninche Omonene.”
Currently Selected:
EKEKIELI6 13: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
